डायलसिस गर्न रकम जुटेन

कान्तिपुर संवाददाता

वीरेन्द्रनगर — वीरेन्द्रनगर नगरपालिका ८, इत्रामका पर्वत पन्तको दुबै मिर्गौला काम नगर्ने भएपछि घरमै थलिएर बसेका छन् । थप उपचारका लागि परिवारले खर्च जुटाउन नसक्दा २५ वर्षीया पन्त पीडामा छन् । 

आर्थिक स्थिति निकै कमजोर भएका कारण परिवारले उनको मिर्गौला डायलाइसिस र प्रत्यारोपणका लागि रकम जुटाउन सकेको छैन । गत भदौमा सामान्य समस्या देखिएको ठानेर वीरेन्द्रनगरस्थित देउती नर्सिङ होममा उनलाई जचाउन लगियो । तर त्यहाँ उपचार नै सम्भव नभएपछि पन्तलाई उनको परिवारले काठमाडौस्थित त्रिभुवन विश्वविद्यालय, शिक्षण अस्पताल पुर्‍याए । करिब दुई हप्तापछि मात्रै उनको दुबै मिर्गौला फेल भएको थाहा पाएपछि अस्पतालले डायलासिस गर्न सुझाव दिँदै गत असोज १९ गते डिस्चार्ज गरिदियो ।

‘सबै जाँच गर्दा डेढ लाख बढी खर्च भयो,’ आमा कालिरा पन्तले भनिन्, ‘रोग पत्ता लागेपछि डिस्चार्ज गरिदिए, अब उपचार गर्ने पैसा छैन त्यही भएर घरमै ल्याएर राखेका छौँ ।’ मिर्गौलापीडित पन्तका बाबु जल तथा मौसम विज्ञान कार्यालयमा कार्यालय सहयोगीका रुपमा काम गर्छन् । परिवारमा अन्य कुनै आम्दानीको स्रोत छैन ।

‘अलि अलि भएको पैसा जति सक्किसक्यो,’ कालिसराले भनिन्, ‘अब उपचार गर्ने पैसा छैन, छोरालाई मृत्युको मुखमा पुगेको टुलुटुलु हेरेर बस्नुपरेको छ ।’ उपचार खर्चका लागि हात माग्ने ठाउँ पनि कतै नभएको भन्दै आमा कालिसराले अब मृत्यु कुर्नुको विकल्प आफ्ना छोराका लागि अरु केही नभएको गुनासो गरिन् ।

प्रकाशित : कार्तिक २३, २०७६ ०९:४५
ADVERTISEMENT
प्रतिक्रिया
पठाउनुहोस्
ADVERTISEMENT

अधिकांश व्यवसाय अवैध

कान्तिपुर संवाददाता

रुकुम पश्चिम — जिल्लामा सञ्चालित आधा व्यावसायिक प्रतिष्ठान अवैध रहेको पाइएको छ । दर्ताबिनै करिव ४५ प्रतिशत आर्थिक प्रतिष्ठान सञ्चालन गरेको पाइएको हो । 

अघिल्लो वर्ष गरिएको आर्थिक गणना अनुसार जिल्लामा तीन हजार ९ सय ९४ प्रतिष्ठानमध्ये एक हजार आठ सय १९ प्रतिष्ठान बिना दर्ता चलिरहेको तथ्यांक सार्वजनिक भएको हो । आर्थिक गणनाको क्रममा सोधिएको प्रश्न, गरिएको अवलोकनका आधारमा दुई हजार एक सय ७५ आर्थिक प्रतिष्ठान दर्तावाल छन् । सबै व्यवसायमध्ये ५४.५ प्रतिशत दर्ता गरेर चलाइएको पाइएको हो भने ४५.५ प्रतिशत व्यवसाय दर्ता नै छैनन । २०७५ वैशाख १ देखि जेठ ३१ गतेसम्म गरिएको आर्थिक गणनाको क्रममा जिल्लाका आर्थिक प्रतिष्ठानमा १० हजार एक सय ८० जनाले रोजगारी पाएको उल्लेख छ । जसमध्य ७३.९ प्रतिशत अर्थात् सात हजार सात सय २० जनाले दर्ता भएका प्रतिष्ठानमा काम गरिरहेका छन् भने २६.१ प्रतिशत अर्थात् दुई हजार ६ सय ६० जनाले दर्ता नभएका व्यवसायमा काम गरिरहेका हुन् । जिल्ला तथ्यांक कार्यालयले सार्वजनिक गरेको आर्थिक गणना प्रतिवेदनमा विभिन्न सूचकमाथि अध्ययन गरिएको जनाइएको छ ।

तथ्याङ्क अधिकृत मेघराज पौडेलले सबै स्थानीय तहका व्यवसायिक निकायका विभिन्न सूचकमाथि गणना गरिएको जनाए । आर्थिक गणना अनुसार सबैभन्दा बढी आर्थिक प्रतिष्ठान मुसीकोट नगरपालिकामा छन् भने कम बााफिकोट गाउापालिकामा छन् । एक हजार चार सय ३३ आर्थिक प्रतिष्ठान मुसीकोट नगरपालिकामा रहेको जनाइएको छ ।

विभिन्न सात सूचकमाथि केन्द्रीत रहेर गणनाको विश्लेषण गरिएको उनले जानकारी दिए । एक सय १७ कृषि, एक सय ८० वन तथा माछापालन, चार सय औद्योगिक प्रतिष्ठान दर्ता भएको जनाइएको छ । दर्ता भएका दुई हजार एक सय २५ थोक तथा खुद्रा व्यापार र मोटरगाडी एवं मोटरसाइकल मर्मतमा सबैभन्दा बढी तीन हजार तीन सय ३७ जनशक्तिले रोजगारी पाइरहेको तथ्यांकमा उल्लेख छ ।

प्रकाशित : कार्तिक २३, २०७६ ०९:४३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT