समाजका अगुवालाई विपत् व्यवस्थापन तालिम
वीरेन्द्रनगर – नेपाली सेनाले समाजका अगुवालाई विपत् प्रतिकार्य तालिम दिएको छ । नयाँ सवुज गणले वीरेन्द्रनगर नगरपालिकाका जनप्रतिनिधि र संघसंस्थाका प्रतिनिधिलाई सोमबारदेखि चारदिने तालिम दिएको हो ।
नगरपालिकाका प्रमुख प्रशासकीय अधिकृत टीकाराम ढकालका अनुसार तालिममा ६४ जना सहभागी छन् । उनीहरूलाई विपत् व्यवस्थापन कसरी गर्ने भन्नेबारे तालिम दिइएको उनले बताए । सेनाले तालिमपछि समुदायका अगुवाले अरुलाई विपत्बाट बचाउने कला सिकाउन सक्ने अपेक्षा गरेको छ ।
गणपति झुलेन्द्रबिक्रम बस्नेतले भुकम्प, बाढीपहिरो, आगलागीजस्ता विपत्बाट बच्न र बचाउन अगुवालाई तालिम दिइएको बताए । विपत्बाट प्रभावित स्थानका बासिन्दालाई पनि तालिम दिइने उनको भनाइ छ । वीरेन्द्रनगर नगरपालिकाका प्रमुख देवकुमार सुवेदीले स्थानीय बासिन्दालाई विपतबाट कसरी जोगिने भन्ने विषयमा थाहा नहुँदा सुर्खेतमा धेरैले ज्यान गुमाउनुपरेको बताए ।
उनले अघिल्ला वर्ष सम्झँदै भने, ‘अहिले पनि विपत्मा सेना र प्रहरीको भर पर्नुपर्ने अवस्था छ, यो तालिमले थोरै भए पनि त्यस्तो अवस्थालाई कम गर्नेछ ।’
प्रकाशित : आश्विन २८, २०७६ ११:३७
