काज सरुवाले शिक्षकविहीन विद्यालय

कान्तिपुर संवाददाता

सल्यान — एकमात्र स्थायी शिक्षकलाई नगरपालिकाले काजसरुवा गरेपछि बागचौर–२ चिल्ढालेस्थित भानुभक्त आधारभूत विद्यालय शिक्षकविहीन भएको छ ।

३ कक्षासम्म पढाइने उक्त विद्यालयका अमरबहादुर केसीलाई नगरपालिकाले शिवरथको निराजन माविमा सरुवा गरेको छ । कार्यरत एकमात्र शिक्षकको सरुवाले भानुभक्तको पठनपाठन प्रभावित भएको छ ।

शिशु विकास कार्यकर्ता भए पनि उनी नियमित उपस्थित नहुँदा विद्यार्थीहरू दैनिकजसो विद्यालय गएर फर्कने गरेका छन् । नगरपालिकाले गैरजिम्मेवारपूर्ण निर्णय गरेको विद्यालय व्यवस्थापन समिति अध्यक्ष प्रेमबहादुर डाँगीले बताए । ‘पठनपाठनै ठप्प हुने गरी शिक्षकलाई काज सरुवा गर्नु गैरजिम्मेवारपन हो,’ उनले भने, ‘विद्यालयमा यो राजनीतिक हस्तक्षेप हो ।’ नगरपालिकाले शिक्षक काजसरुवा गरिदिँदा भएको दरबन्दीसमेत कटौती भएको उनले बताए ।

स्थानीय अभिभावकलाई विद्यालय नै बन्द हुने हो कि भन्ने चिन्ता छ । बालबालिकाको पढ्न पाउने अधिकार संरक्षण गर्न तुरुन्त अर्को शिक्षकको व्यवस्था गर्न उनीहरूले माग गरेका छन् । विद्यालयमा १८ जना बालबालिका पढ्नछन् । नगरपालिकाले निर्णय गरेपनि अभिभावकको दबाबकै कारण विद्यालय व्यवस्थापन समितिले काजसरुवाको रमाना दिएको छैन ।

शिक्षक केसीले रमाना नपठाउँदा नगरपालिकाले काजमा पठाएको विद्यालयमा गएर काम गर्न नसकेको बताए । ‘म त दोहोरो मारमा परेको छु, एकातिर आफूले जा भनेका ठाउँमा गएर काम गर्न पाइएन, अर्कोतिर बालबालिकाको भविष्य पनि अन्योलमा परेको छ,’ उनले भने, ‘नगरपालिकाले विद्यालयमा शिक्षक दरबन्दी हेरेर काज सरुवा गरेको भए ठीक हुने थियो ।’ पढ्नका लागि विद्यालय गएका बालबालिका खेलेर फर्केको थाहा पाउँदा दुःख लाग्ने गरेको उनले बताए ।

नगरपालिकाका शिक्षा शाखा प्रमुख टेकबहादुर डिसीले नगरपालिकाले नगरभित्रका विभिन्न विद्यालयका ३३ जना शिक्षकको काजसरुवा गरिएको बताए । विद्यालयको शैक्षिक गुणस्तर बृद्धि गर्न कम विद्यार्थी भएका विद्यालयबाट शिक्षकको काज सरुवा गरेर बढी विद्यार्थी भएको विद्यालयमा पठाएको उनको भनाइ छ । भानुभक्त आधारभूत विद्यालयलाई ३ कक्षाबाट झारेर १ मा ल्याउने तयारी भएको उनले बताए ।

प्रकाशित : भाद्र २९, २०७६ १०:४६
प्रतिक्रिया
पठाउनुहोस्

अस्पतालमा छैनन् हेलिप्याड

चाँदनी कठायत

वीरेन्द्रनगर — कर्णाली प्रदेश सरकारले वैशाखमा तीनजना सुत्केरीको हेलिकोप्टरमार्फत उद्दार गरी सुर्खेत ल्यायो । उनीहरूलाई हेलिकोप्टरबाट झारेर एयरपोर्टदेखि अस्पताल पुर्‍याउन भने थप सकस भयो । हेलिकोप्टरबाट सुर्खेत पुर्‍याउनु जत्तिकै समय थप लाग्यो ।

जाजरकोटको नलगाडबाट बिरामी उपचारार्थ लगिँदै । फाइल तस्बिर : कान्तिपुर

हुम्ला अदानचुलीका भीम परियारले प्रदेश अस्पतालमा हेलिप्याडको व्यवस्था नहुँदा हिमाली जिल्लाबाट उद्दार गरिएका गम्भीर प्रकृतिका बिरामीले सुर्खेत विमानस्थलदेखि अस्पताल बीचको स्थलमार्गमा थप समस्या झेल्नु परेको बताए ।

‘हेलिकोप्टरबाट ल्याउने बिरामी भनेकै गम्भीर प्रकृतिका हुन्छन्,’ उनले भने, ‘ती बिरामीलाई सिधै प्रदेश अस्पतालमै पुर्‍याउनका लागि हेलिप्याडको व्यवस्था त हुनैपर्छ, नत्र गम्भीर बिरामीको अवस्था जोखिमपूर्ण हुन सक्छ ।’ सुर्खेत विमानस्थलदेखि प्रदेश अस्पताल जाने बाटो खाल्डाखुल्डी भएकोले गर्भवती, सुत्केरीले सास्ती व्यहोर्नु परेको उनले बताए ।

आखिर अस्पतालमा हेलिप्याड बनाउन गाह्रो छैन । जग्गा पर्याप्त छ । आर्थिक हिसाबले समेत निकै न्यून बजेट आवश्यक पर्छ । हेलिकम्पनी सिम्रिकका पश्चिम क्षेत्र प्रमुख कमल गौतम सानोतिनो कुरामा ख्याल नगर्दा बिरामीले सुर्खेत पुगिसकेपछि पनि थप सास्ती व्यहोर्नुपरिरहेको बताए ।

नागरिक उड्डयन प्राधिकरणको एउटा स्वीकृतिपत्रको आधारमा अस्पताल हाताभित्रै हेलिप्याडको लागि स्थान बनाउन सकिने उनको भनाइ छ । प्रदेशको सामाजिक विकास मन्त्रालयले कर्णालीका दुर्गम क्षेत्रका अस्पतालमा हेलिप्याड बनाउने नीति बनाएको छ । एक महिनाअघि हुम्ला अस्प्तालमा हेलिप्याड उद्घाटनसमेत भइसकेको छ । तर, दुर्गम बस्तीबाट अधिकांश बिरामी सिधै आउने सुर्खेतस्थित प्रदेश अस्पतालमा भने हेलिप्याड बनाउनेबारे सरकार मौन छ ।

अहिले सुत्केरीलाई विमानस्थलमा ल्याई एम्बुलेन्समार्फत प्रदेश अस्पतालमा पुर्‍याउने गरिएको छ । अत्यधिक रक्तस्राव भई दुर्गममा उपचार सम्भव नभएका बिरामीको उद्दार गरिरहँदा प्रदेश सरकारले बिरामीले भोग्न सक्ने जोखिमलाई भने छायाँमा पारेको छ । सामाजिक विकास मन्त्रालयका सचिव मानबहादुर बिकले प्रदेश अस्पतालमा हेलिप्याडको आवश्यकता नदेखिएकाले पहल नभएको बताए ।

‘बिरामी उद्दार गर्दा एयरपोर्टमा एम्बुलेन्स तयारीका साथ राखिएको हुन्छ,’ उनी भन्छन्, ‘प्रदेश अस्पताल र एयरपोर्टबीचको दुरी पनि लामो नभएकाले खासै समस्या हुँदैन, एयरपोर्ट पनि सुविधायुक्त नै छ ।’ प्रदेश अस्पतालका मेडिकल सुपरिटेन्डेन्ट डा. डम्बर
खड्काले भने अस्पतालमा हेलिप्याड आवश्यक भएको महसुस गरी योजनामा राखिएको बताए । छिट्टै नै प्रक्रिया पुर्‍याएर हेलिप्याड सञ्चालनमा ल्याइने उनको भनाइ छ ।

९ जिल्लामा १५ हेलिप्याड बन्दै
चालु आर्थिक वर्षमा उद्योग, पर्यटन, वन तथा वातावरण मन्त्रालयले आपतकालीन अवस्थामा उद्धार र अन्य कार्यका लागि ९ जिल्लाका १५ स्थानमा हेलिप्याड बनाउन लागेको छ । हेलिप्याड बनाउने स्थानभित्र प्रदेश अस्पताल भने परेको छैन । हेलिप्याड बनाउन १ करोड ५० लाख रुपैयाँ विनियोजन गरिएको मन्त्रालयका सुचना अधिकारी शेरबहादुर रोकायाले बताए ।

रुकुम पश्चिमको खोरियाडाँडा र आठबिसकोट, डोल्पाको रिम्न र दुनै, जुम्लाको तिला र खिच्चने, जाजरकोटको दल्ली, दैलेखको भगवतीमाई र ठाटीकाँध, कालिकोटको कुमालगाउँ, मेहलमुडी र महाबै, मुगुको छायाँनाथ र मुगमकार्मारोङ र हुम्लाको खार्पुनाथमा हेलिप्याड बन्ने मन्त्रालयले जनाएको छ ।

सडकको पहुँच नपुगेको स्थानमा हेलिकप्टरबाट विपतको व्यवस्थापन गराउन हेलिप्याड बनाउन लागिएको रोकायाको भनाइ छ । हेलिप्याड अन्य कामका लागिसमेत प्रयोग हुन सक्नेछ । विभिन्न सामाजिक कार्यमा जोड दिनसमेत हेलिप्याड सबै जिल्लामा जरुरी रहेको उनको भनाइ छ । सूचना अधिकारी रोकायाले यातायात समस्याका कारण कर्णालीका दुर्गम भेगका बासीन्दा स्वास्थ्य सेवाबाट बञ्चित रहेकाले पनि हेलिप्याडको अवधारणा अगाडि सारिएको बताए ।

प्रकाशित : भाद्र २९, २०७६ १०:४५
पूरा पढ्नुहोस्
प्रतिक्रिया
पठाउनुहोस्