भाइरल ज्वरोको प्रकोप : १ बालिकाको मृत्यु, २ सयभन्दा बढी बिरामी

तुलाराम पाण्डे

कालीकोट — खाडाचक्रमा भाइरल ज्वरोको प्रकोप फैलिएको छ । खाडाचक्र २ मेग्र, कायगडा, पोरिपाल्नी, ३ र ४ नम्बर वडाको ताडीलगायत सबैजसो वडामा मौसमी भाइरल ज्वरो फैलिएको हो ।

जिल्ला अस्पताल मान्ममा भाइरल ज्वरोले थला परेर भर्ना भएकी खाडाचक्र २ की २१ वर्षीया सरिता विश्वकर्मा र उनका २ वर्षीय छोरा किरण । तस्बिर : तुलाराम/कान्तिपुर

ज्वरोले घरघरमा बिरामी परेको खाडाचक्र २, का वडाध्यक्ष विर्षसिं विश्वकर्माले बताए । उनका अनुसार सबैभन्दा बढी मेग्र गाउँमा ज्वरोका बिरामी छन् । एकै घरका ९ जनासम्म ज्वरोले थलिएको उनले जानकारी दिए ।

भाइरल ज्वरोले खाडाचक्र २, का राजमुकार मल्लकी ६ वर्षीया छोरी रासनीको मृत्यु भएको वडा कार्यालयले जनाएको छ । उनी मान्मस्थित बाल विकास स्कुलमा नर्सरीमा अध्ययनरत थिइन् । ३ दिनदेखि ज्वरोले थलिएकी उनको बुधबार घरमै उनको मृत्यु भएको हो ।

कडा ज्वरो आउने, टाउको दुख्ने, घाँटी दुख्ने, खाना निल्न कठिनाइ हुने, बान्ता हुनेलगायत लक्षण बिरामीमा देखिने गरेको जिल्ला अस्पतालले जनाएको छ । ज्वरोका बिरामी दैनिक बढिरहेको जिल्ला अस्पताल प्रमुख डा. भीष्म पोखरेलले बताए । ‘ज्वरो कडा खालको छ,’ उनले भने, ‘१ सय १ डिग्रीभन्दा ज्वरो आएका बिरामी अस्पताल आएका छन्, अन्य बिरामी घरमै थलिएका छन् ।’ उनले भाइरल ज्वरो फैलिएको सातादिन पुगिसकेको जानकारी दिए । पुराना बिरामीको ज्वरो निको भए पनि नयाँ बिरामी थपिने क्रम बढेको उनले बताए ।

अस्पताल भर्ना भएको ४ दिन भए पनि निको नभएको खाडाचक्र २, की २१ वर्षीया सरिता विश्वकर्माले बताइन् । उनका २ वर्षीय छोरा किरण पनि बिरामी छन् । अस्पतालको औषधिले ज्वरो कम भए पनि टाउको दुख्ने र बान्ता हुने क्रम नरोकिएको उनको भनाइ छ । जिल्ला अस्पताल भर्ना भएको ४ दिन भइसक्दा पनि ज्वरो ठीक नभएको शुभकालिका २, भर्ताकी सरस्वती शाहीले बताइन् ।

उनी एकमहिने छोरासहित जिल्ला अस्पतालमा भर्ना भएकी छिन् । भाइरल ज्वरोका बिरामीे शुभकालिका गाउँपालिका, सान्नीत्रिवेणी, पचालझरना, पलातालगायत ठाउँबाट पनि आइरहेको जिल्ला अस्पतालले जनाएको छ 

प्रकाशित : भाद्र १३, २०७६ १०:०२
प्रतिक्रिया
पठाउनुहोस्

कुदुमा डिप बोरिङबाट पानी

कान्तिपुर संवाददाता

जाजरकोट — भेरी नगरपालिका १३, कुदुमा खानेपानीको समस्या समाधान भएको छ । डिप बोरिङ प्रणालीबाट भूमिगत पानी निकालेपछि कुदुमा खानेपानीको समस्या समाधान भएको हो ।

बोरिङमार्फत १ सय ५२ मिटर जमिनमुनिको पानी निकालिएको छ । भेरी नगरपालिकाले ४५ लाख लागतमा बोरिङ प्रणालीको खानेपानी योजना बनाएको नगरप्रमुख चन्द्रप्रकाश घर्तीले बताए ।

उनका अनुसार योजनाबाट ४ सय ६५ घरपरिवार लाभान्वित भएका छन् । ‘विद्युतको सहायताले जमिनमुनिको पानी निकालेर स्थानीयलाई वितरण गरिएको हो,’ उनले भने, ‘अब बोरिङबाट आधा घण्टामा २ हजार लिटर पानी निकाल्न सकिनेछ ।’ पानीको हाहाकार भइरहने कुदु क्षेत्रमा शुद्ध पिउने पानी पुर्‍याउन थप योजना निर्माणको काम भइरहेको उनले बताए ।

बोरिङमार्फत १ महिनाभर पानी तान्दा सय युनिट विद्युत् खपत हुने गरेको योजनाका अपरेटर राजेश बीसीले वताए । पानी तान्न लाग्ने विद्युत् महसुल खर्चका लागि प्रत्येक घरधुरीबाट मासिक सय रुपैयाँ उठाइएको उनले बताए । बीसीका अनुसार स्थानीय बासिन्दाको आवश्यकताअनुसार बोरिङ सञ्चालन गरी पानी निकाल्ने गरिएको छ । यसअघि कुदुका बासिन्दा १ घण्टा टाढाको भेरी नदीमा गई खानेपानी ल्याउन बाध्य थिए । केही स्थानीयले कुवाको धमिलो तथा दूषित पानी ल्याएर उपभोग गर्दै आइरहेका थिए ।

बोरिङ प्रणालीबाट पिउने पानी सुविधा पुगेपछि वर्षौंको सास्ती घटेको स्थानीय नरबहादुर बस्नेत बताउँछन् । ‘मुहान गाउँ नजिक नहुँदा खानेपानीका लागि स्थानीयले वर्षौंदेखि सास्ती व्यहोर्दै आएका थिए, पटकपटकको प्रयासपछि नयाँ प्रविधिबाट पानी निकाल्न सफल भएका छौं,’ उनले भने, ‘बोरिङबाट निस्कने पानीलाई शुद्धीकरणको पहल भइरहेको छ ।’ उनले सिँचाइ अभावमा कुदु फाँटको सयौं रोपनी बाँझै रहेको पनि बताए ।

प्रकाशित : भाद्र १३, २०७६ १०:०१
पूरा पढ्नुहोस्
प्रतिक्रिया
पठाउनुहोस्