विषादी सेवनबाट बालिकाको मृत्यु

भीमबहादुर सिंह

जाजरकोट — कुशे गाउँपालिका ८, बिजुलीडाँडामा विष सेवनबाट एक बालिकाको ज्यान गएको छ । बिजुलीडाँडा बस्ने चित्रबहादुर रोकायकी अढाई वर्षीय छोरी प्रवेशिका रोकायको विष सेवनबाट आइतबार मृत्यु भएको हो । 

घरमा कोही नभएको अवस्थामा कोठामा राखेको तरकारी खेतीमा प्रयोग हुने थाइराइड नामको विषादी खाँदा उनको ज्यान गएको प्रहरी नायव उपरीक्षक श्यामबहादुर खत्रीले बताए । बालिकाले विषादी खानेकुरा होला भनेर खाएको अनुमान खत्रीको छ ।

घटनाबारे अनुसन्धानका लागि प्रहरी टोली घटनास्थल पुगेको उनले बताए ।

बालिकाको शव पोस्टमार्टमका लागि जाजरकोट अस्पताल ल्याउन लागेको प्रनाउ खत्रीले बताए ।

प्रकाशित : भाद्र ८, २०७६ १६:४०
प्रतिक्रिया
पठाउनुहोस्
ADVERTISEMENT

टोर्नाडोको नेपाली नामकरण ‘घुम्रपात’

रासस

काठमाडौँ — गत चैत १७ गते साँझ बारा र पर्सामा आएको ‘टोर्नाडो’को नेपाली नाम ‘घुम्रपात’ नामकरण गर्न सिफारिस गरिएको छ । ऊर्जा, जलस्रोत तथा सिँचाइ मन्त्रालयअन्तर्गतको जल तथा मौसम विज्ञान विभागले एक अध्ययन समिति बनाई सो नाम सिफारिस गरेको हो ।

लामो छलफल र अध्ययनपछि ‘टोर्नाडो’ घुमीघुमी आउने र त्यसले उत्पात मच्चाउने भएकाले उक्त दुवै कार्य समेटिने गरी सो शब्द सिफारिस गरिएको विभागका महानिर्देशक सरजु वैद्यले जानकारी दिए ।
विभागका महानिर्देशकको संयोजकत्वमा गठित ८ सदस्यीय मौसमविद्सहितको टोलीले स्थलगत तथा अन्य अध्ययन गरी विभिन्न ६ नाम छनोट गरेको थियो । ती ६ नाममध्ये समितिमा ‘भोटिङ’ गरी ‘घुम्रपात’ शब्दलाई छनोट गरेर सो नामकरण गर्न सिफारिस गरिएको हो । ‘घुम्रपात’ नयाँ शब्द भएकाले नेपाली शब्दकोषमा पनि राख्नका लागि पहल गरिने बताइएको छ ।

उक्त भीषण हावाहुरीबाट भएको क्षति, नाम, टोर्नाडो भएको पुष्टिका आधार, कसरी आएको थियो भन्ने मौसमी अवस्थाको जानकारी, हावाको गति, लम्बाइ र चौडाइ, स्थानीयको अनुभवलगायत मौसमी गतिविधिको विश्लेषण गरेर समितिले प्रतिवेदन तयार गरेको महानिर्देशक वैद्यले बताए । समितिले उक्त प्रतिवेदन दुई हप्ताअघि मन्त्रालयमा बुझाइसकेको छ । मन्त्रालयले आवश्यक तयारी गरी उक्त प्रतिवेदन सार्वजनिक गर्ने जनाएको छ ।
बारा र पर्सामा भीषण हावाहुरी आएलगत्तै जल तथा मौसम विज्ञान विभागको नेतृत्वमा एकीकृत पर्वतीय विकासका लागि अन्तर्राष्ट्रिय केन्द्र (इसिमोड) र द स्मल अर्थ नेपाल संस्थाका ६ सदस्यीय मौसमविद्को टोलीले गत चैत २० देखि २४ गतेसम्म प्रभावित क्षेत्रको स्थलगत अध्ययन गरेको थियो । टोलीले उक्त मौसम प्रणाली ‘टोर्नाडो’ भएको तथ्य सार्वजनिक गरेको छ ।
विभागका वरिष्ठ मौसमविद् डा अर्चना श्रेष्ठ नेतृत्वको उक्त टोलीले ड्रोन क्यामेराबाट क्षतिको अवस्थाबारे भिडियो र तस्बिर लिनाका साथै प्रभावित क्षेत्रका स्थानीयवासीसँग जानकारी लिएको थियो । यसबाहेक भू–उपग्रहबाट लिइएका तस्बिरको समेत अध्ययन गरी विश्लेषण गरिएको थियो । ‘टोर्नाडो’ पर्साको जगत्नाथपुरबाट सुरु भई बाराको बैरियामा पुगेर कमजोर भएको थियो ।

प्रकाशित : भाद्र ८, २०७६ १६:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×