चौथो अधिवेशन सुरु : बजेट र विकासबारे असन्तुष्टि

कान्तिपुर संवाददाता

वीरेन्द्रनगर — कर्णाली प्रदेशसभाको चौथो अधिवेशनको सुरुमै बजेट कार्यान्वयन नभएकोप्रति चिन्ता व्यक्त गरिएको छ । बैठकमा बोल्ने सांसदले बजेट कार्यान्वयन नहुँदा विकास अवरुद्ध भएको बताए ।

प्रमुख प्रतिपक्षी दल नेपाली कांग्रेस संसदीय दलका नेता जीवनबहादुर शाहीले करिब २० मिनेट लामो

आफ्नो मन्तव्यमा कर्णाली सरकारले चालु आवमा ल्याएको बजेट, विकास योजना र कार्यान्वयनको गतिलाई व्यङयात्मक शैलीमा असफलताको फेहरिस्त सुनाए । ‘हामी २८ अंकका अनुयायी हौं,’ उनले भने, ‘तर ती अंकभित्र देखिएका विकास सपनाको अवस्था के छ ?’ कर्णाली प्रदेश सरकारले २८ अर्ब २८ करोड २८ लाख २८ हजार रुपैयाँको बजेट ल्याएको र बजेट कार्यान्वयनमा असफलता देखिएकोप्रति उनको कटाक्ष थियो ।


नेता शाहीले कर्णालीमा सुविधासम्पन्न हाइटेक नर्सरी स्थापना गर्न कृषिमन्त्रीसँग छलफल गरी बजेटबारे समेत टुंगो लगाएको भए पनि अन्ततः शक्तिका भरमा काम भएको आरोप लगाए । ‘गाडी नपुगेको ठाउँमा १ करोडले हाइटेक नर्सरी बनाउन पुग्दैन भनेर भनेकै हो,’ उनले भने, ‘काम भएन भने बजेट फिर्ता गर्ने भनी वचन पनि दिएका थियौँ, तर ८४ लाख मात्रै बजेट आएछ ।’


नेता शाहीले सार्वजनिक लेखा समितिले कसैलाई दोष नलगाएको भन्दै सरकारले जवाफ नदिएकोप्रति असन्तुष्टि जनाए । ‘सार्वजनिक लेखा समितिलाई हेपियो,’ उनले भने, ‘सरकारले कानमा तेल हालेर बस्यो, जवाफ त दिनुपर्ने हो नि ?’ डीपीआरमा पनि करोडौँको खेल भएको कुरा सुन्नमा आएको भन्दै उनले सार्वजनिक लेखा समितिले यसप्रति चासो हुनुपर्ने बताए ।


नेकपा सांसद यामलाल कँडेलले सरकार जनताका न्यूनतम आवश्यकतालाई समेत पूरा गर्न चुकेको उल्लेख गरे । सरकार माननीयलाई भुलाउनतर्फ लागेको भन्दै उनले जनताले औँला ठड्याउने अवस्थामा सरकार पुगेको बताए । सत्तापक्ष र प्रतिपक्षबीच जुहारी खेल्नुभन्दा आगामी बजेटका विषयमा संसदमा छलफल हुनुपर्ने उनको भनाइ छ ।


चालु आवको बजेट कार्यान्वयनको सुस्ततालाई मध्यनजर गर्दै सरकारले आगामी बजेट र योजना बनाउनुपर्ने उनले बताए । ‘सबै माननीयलाई खुसी बनाउने नाममा फेरि पनि बजेटमा चलखेल हुन थालेको छ,’ उनले भने, ‘यसपटकको बजेट संसदमा छलफलको विषय बन्नुपर्छ, जनताको आकांक्षालाई मध्यनजर गर्दै अघि बढ्नुपर्छ ।’


सांसद कँडेलले संसद राजनीतिक थलो पनि भएको भन्दै पदका दृष्टिकोणले फरक फरक स्थानामा भए पनि जनतासँग गरेका प्रतिबद्धता पुरा गर्ने सबैको साझा जिम्मेवारी भएको बताए । ‘नेकपाका लागि विकल्प छैन,’ उनले भने, ‘जनआकांक्षाबमोजिम काम नभएका भनेर नेकपाले स्वीकार गर्नैपर्छ ।’ घटना र विषयमा छलफल गर्ने गरी

अगाडि बढेमा धेरै विवादको परिस्थिति नआउने सांसद कँडेलको भनाइ छ ।


राप्रपा सांसद सोशिला शाहीले सरकारको यही कामले जनताका समस्या जस्ताको त्यस्तै हुने बताइन् । बजेट कार्यान्वयन गर्न नसक्दा सरकार असफलतातर्फ धकेलिएको उनको भनाइ छ । सरकारको कामले गर्दा जनतामा निराशा छाएको भन्दै उनले आफ्ना कार्यकर्तालाई नियमविपरीत योजना वितरण गर्न सरकार लागि परेको आरोप पनि लगाईन् । चौथो अधिवेशनको दोस्रो बैठक सोमबार दिउँसो ३ बजे तोकिएको छ ।


–चाँदनी कठायत प्रकाशित : जेष्ठ ११, २०७६ ०९:४३

प्रतिक्रिया
पठाउनुहोस्

शिक्षक नहुँदा सामूहिक पढाइ

विद्यालयका २ भवनमध्ये एक २०७२ मा आएको भूकम्पले कामै नलाग्ने गरी भत्काएको छ
विप्लव महर्जन

सल्यान — शारदा नगरपालिका १०, मधनास्थित कालिका प्राथमिक विद्यालयमा शिक्षक अभाव भएपछि ३ वटा कक्षाका विद्यार्थीले एउटै कोठामा पढदै आएका छन् । विद्यालयमा एकमात्र शिक्षक कार्यरत हुँदा सामूहिक पठनपाठन हुने गरेको हो ।

शिक्षक तथा कक्षाकोठा अभावमा एउटै कोठामा बसेर पढ्दै गरेका सल्यानको शारदा नगरपालिका १० स्थित कालिका प्राविका बालबालिका । तस्बिर : विप्लव/कान्तिपुर 

विद्यालयमा शिक्षक दीपक थापा मात्र कार्यरत छन् । २०६४ मा स्थापना गरिएको विद्यालय सुरुमा कक्षा ५ सम्म सञ्चालित थियो । विद्यालय सञ्चालन भएको केही वर्षमा शिक्षक तथा विद्यार्थी अभाव भएपछि कक्षा ३ मा झारिएको हो ।

विद्यालयमा ४० विद्यार्थी अध्ययनरत छन् । सामुहिक पढाउँदा पठनपाठन प्रभावकारी हुन नसकेको उनको भनाइ छ । आफूमात्रै कार्यरत रहँदा विद्यालयको पढाइ गुणस्तरीय हुन नसकेको उनले बताए ।

छुट्टै राखेर एउटा कक्षालाई पढाउँदा अर्को कक्षाका विद्यार्थी खेल्न जाने गरेकाले एउटैमा राखेर पढाइरहेको थापाले जानकारी दिए । विद्यालयमा १ बाल शिक्षा सहयोगी कार्यकर्तासमेत कार्यरत छिन् । तर, उनले शिशुको मात्र पठनपाठन गर्ने भएकाले समस्या भएको विद्यालयले जनाएको छ । ‘विद्यालयको कामकाजले बाहिर जाँदा पठनपाठन बन्द हुने गरेको छ,’ उनले भने, ‘विद्यालयका प्रशासनिक कामहरू पनि गर्नुपर्ने भएकाले समस्या भइरहेको हो ।’ उनले पटकपटक शिक्षक माग गर्दा पनि विभिन्न निकायबाट बेवास्ता भइरहेको जनाए ।

बालबालिकालाई पढाउने भन्दा पनि विहान १० बजेदेखि दिउँसो ३ बजेसम्म कसरी विद्यालयमा टिकाउने भन्ने ठूलो चुनौती भएको थापा बताउँछन् । उनका अनुसार विद्यालयमा शिक्षक मात्र होइन, अन्य पूर्वाधारको समेत अभाव छ । उनले कार्यालय सहयोगीको कामसमेत आफै गर्नुपर्ने बाध्यता रहेको सुनाए । ‘एउटा कक्षाको कोर्स पढाउँदा अर्को कक्षाको पढाइमा डिस्टर्ब हुने गरेको छ,’ उनले भने, ‘केही समय एउटा कक्षाको पढाइ सकेर अर्को कक्षाका विद्यार्थीलाई लेख्न दिन्छु अनि अर्कोलाई पढाउँछु ।’

विभिन्न कामले शिक्षक बाहिर गइरहने भएकाले विद्यार्थीहरू बेलाबेलामा पठनपाठनबाट वञ्चित हुने गरेको अभिभावकको गुनासो छ । अभिभावकका अनुसार शिक्षक अभावमा विद्यार्थीले जसरी सिक्नुपर्ने हो त्यहीअनुसार सिक्न सकेका छैनन् ।

विद्यालयका २ भवनमध्ये एक भवन २०७२ मा आएको भूकम्पले कामै नलाग्ने गरी भत्काएको छ । अहिले ३ कोठे जीर्ण भवनमा पढाइ भइरहेको छ । एउटा कोठामा बालशिक्षा र अर्को कोठामा १ देखि ३ कक्षाका विद्यार्थीलाई पढाउने गरिएको छ । तेस्रो कोठामा विद्यालयका सामग्री राखिएका छन् ।

विद्यालयले शैक्षिक सामग्री अभावको समस्यासमेत वर्षौंदेखि भोग्दै आइरहेको छ । जिल्ला शिक्षा कार्यालयको खारेजीपछि स्थानीय तहले समेत बेवास्ता गर्दा आफूले ७ महिनाको तलब नपाएको शिक्षक थापाको गुनासो छ । चालु आवदेखि शारदा नगरपालिकाले तलबको व्यवस्था गर्ने जनाए पनि अहिलेसम्म नदिएको थापाले दुःखेसो पोखे ।

प्रकाशित : जेष्ठ ११, २०७६ ०९:४३
पूरा पढ्नुहोस्
प्रतिक्रिया
पठाउनुहोस्
×