डढेलो निभाउन जाँदा जलेर एकजनाको मृत्यु, दुई घाइते 

नौ घर जलेर नष्ट 
बिप्लब महर्जन

सल्यान — छत्रेस्वरी गाउँपालिका ६ तुसारे सिमपानीस्थित इन्द्रेनी सामुदायिक वनमा लागेको डढेलोले बस्ती छुन थालेपछि  डढेलो निभाउन जाँदा स्थानीय ६५ वर्षीया पेन्टी बोहराको जलेर मृत्यु भएको छ । आगो निभाउन गएका ४२ वर्षीय खगेन्द्र बोहरा र मायादेवी बोहरा घाइते भएका छन्। 

इन्द्रनी सामुदायिक वनमा लागेको डढेलोले बस्ती भेटाउँदा रामकाडामा आगोले जल्दै गरेको एक घर । तस्बिरः बिप्लव महर्जन/कान्तिपुर 

घाइते दुवैलाई उपचारको लागि जिल्ला अस्पताल सल्यानमा ल्याइएको छ । मायादेवी मृतक पेन्टी बोहराकी बुहारी रहेको जिल्ला प्रहरी कार्यालय सल्यानका प्रहरी निरीक्षक पञ्चलाल गोलेले बताए ।

बिहीबारदेखि लागेको डढेलो निभाउन नसक्दा शुक्रबार बेलुकी तिर तुसारे सिमपानी नजिकै रहेको बस्ती रामकाँडामा छ घर र चार गोठ गरि १० घरगोठ जलेर नष्ट भएको उनले जानकारी गराए ।

उनका अनुसार क्षतिको पूर्ण विवरण आउन बाँकी छ । डढेलोका कारण रामकाँडाका जीतबहादुर रानाको दुई घर, ओमबहादुर राना, टुल्कबहादुर राना, पदमबहादुर राना, गौरीलाल लगायतको छ घर र चार गोठ जलेर नष्ट भएका छन् ।

डढेलोका कारण घर नष्ट हुनुका साथै घरमा भएका सम्पूर्ण सामग्री लत्ताकपडा, खाद्यान्न घरमा राखेको पैसा, गरगहना जलेर नष्ट भएको सामुदायिक वनका अध्यक्ष रामबहादुर बुढाथोकीले बताए ।

डढेलोले बस्ती भेटाएपछि स्थानीयलाई बचाउन शुक्रबार सुरक्षित ठाँउमा स्थानान्तरण गरिएको भए पनि बिहान डढेलो निभाउने क्रममा एकजनाको ज्यान गएको वडा अध्यक्ष चुडामणि दशौदीले बताए ।

शुक्रबार बस्तीमा लागेको आगो निभाउन प्रहरी सेना, सशस्त्र प्रहरी सफल भए पनि राति हावाहुरी चलेपछि पुनः डढेलो फैलिदाँ जोखिम बढ्दै गएको उनले जानकारी गराए ।

हुरीबतासका कारण जिल्लाका विभिन्न जंगलमा लागेको डढेलो निभाउन गाह्रो भएको सशस्त्र प्रहरी प्रमुख डिएसपी विमल डाँगीले जानकारी गराए ।

प्रकाशित : वैशाख २८, २०७६ १४:३२
प्रतिक्रिया
पठाउनुहोस्

छुट्टाछुट्टै घटनामा दुईको मृत्यु 

बिप्लब महर्जन

सल्यान — सोमबार भएको छुट्टाछुट्टै घटनामा सल्यानमा दुई जनाको मृत्यु भएको छ । शारदा नगरपालिका-४ साहुलोलामा छानाबाट खसेर शारदा नगरपालिका ५ रानीकोट घर भएका वर्ष ४० का तप्तबहादुर नेपाली र शारदा नगरपालिका ११ हिवल्चास्थित स्वास्थ्यचौकी निर्माणको लागि रा १ ख १४१७ नम्बरको मिनी ट्रकबाट सिमेन्ट झार्दा मार्बलले च्यापिएर सिद्धकुमाख गाउँपालिका २ घर भएका वर्ष ३७ का रामबहादुर चलाउनेको मृत्यु भएको हो । 

रानीकोट घर भएका तप्तबहादुर नेपाली साहुटोलामा एक स्थानीयको घरको छाना उधार्दै गर्दा छानाबाट खसेका थिए । उनलाई उपचारको लागि जिल्ला अस्पताल लैजाँदा बाटैमा मृत्यु भएको र मार्बलले च्यापिएका रामबहादुर चलाउनेको स्वास्थ्यचौकी हिवल्चामा उपचार गर्ने क्रममा मृत्यु भएको प्रहरीले जनाएको छ ।
जिल्ला प्रहरी कार्यालय सल्यानका अनुसार रा १ ख १४१७ नम्बरको मिनी ट्रकले स्वास्थ्यचौकी भवन निर्माणको लागि सिमेन्ट , मार्बल लगेको थियो । सिमेन्ट झारेपछि मार्बल झार्न गएका चलाउने काठको बारा फत्किदा मिनी ट्रक भित्रै मार्बलले च्यापिएका थिए । उनको टाउको बाहेक शरिरका सबै भाग च्यापिएको थियो । स्वास्थ्यचौकीमा ग्लुकोज पानी चराउदै गर्दा उनको मृत्यु भएको थियो ।

चलाउने स्वास्थ्यचौकी भवन निर्माणको पेटी ठेकेदार रहेका थिए । मार्बलले च्यापिएर मृत्यु भएका चलाउनेको शव पोष्टमार्टमको लागि जिल्ला अस्पताल ल्याइएको जिल्ला प्रहरी कार्यालय सल्यानका प्रनाउ वीरेन्द्रबहादुर शाहीले बताए ।

प्रकाशित : वैशाख ९, २०७६ १३:२९
पूरा पढ्नुहोस्
प्रतिक्रिया
पठाउनुहोस्