एक शिक्षकको भरमा विद्यालय- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

एक शिक्षकको भरमा विद्यालय

विप्लव महर्जन

सल्यान — त्रिवेणी गाउँपालिकास्थित कालिका प्रावि मुलाबारीमा पाँच कक्षाको पढाइ दुई कोठामा सञ्चालन हुने गरेको छ । विद्यालयमा शिक्षक शोभाजंग केसीमात्र कार्यरत छन् । उनले कक्षा १ देखि ३ सम्मलाई एउटा कोठा तथा कक्षा ४ र ५ का विद्यार्थीलाई अर्को कोठामा राखेर चार वर्षदेखि सामूहिक रूपमा पढाउँदै आएक छन् । 

सामूहिक रूपमा पढाउँदै सल्यानको लक्ष्मी आधारभूत विद्यालयकी शिक्षिका । यो विद्यालय पनि एक शिक्षकको भरमा चलेको छ । तस्बिर : विप्लव/कान्तिपुर

शिक्षक अभावले लामो समयदेखि विद्यालयले पठनपाठनको समस्या भोग्दै आइरहेको छ । शिक्षक केसी प्रशासनिक कामकाजले बाहिर जाँदा पठनपाठन बन्द हुने गरेको छ । विद्यालयमा कक्षा १ देखि ५ सम्म पठनपाठन भइरहेको छ । निजी तथा राहत दरबन्दीका कुनै पनि शिक्षक नभएपछि पठनपाठनमा समस्या भएको हो ।


विद्यालयमा ८३ विद्यार्थी भर्ना भए पनि पठनपाठन प्रभावकारी नहुँदा ४२ मात्र नियमित उपस्थित हुने गरेका छन् । एकमात्र दरबन्दी भएकाले उनले प्रधानाध्यापकको कामसमेत गर्दै आइरहेको बताए । केसी गाउँबाहिर गएको बेला बालबालिका दिनभरि विद्यालयको चौरमा खेलेर घर फर्कने गरेका छन् ।


विद्यालयमा कम्तीमा तीन जना शिक्षक आवश्यक भएको भन्दै पटकपटक विभिन्न निकायको ध्यानाकर्षण गराए पनि बेवास्ता हुँदै आइरहेको प्रधानाध्यापक केसीको गुनासो छ । ‘कहिले एउटा कक्षा र कहिले अर्को कक्षा गर्दा एकछिन पनि फुर्सद पाइँदैन,’ उनले भने, ‘एउटा कक्षाका विद्यार्थीलाई लेख्न लगाएर अर्को कक्षामा पढाउन जाने गरेकी छु ।’ विद्यालयमा एक्लै कार्यरत भएकाले पठनपाठन प्रभावकारी नभएको उनले गुनासो गरे । स्थानीय तह गठनपछि पनि पटकपटक शिक्षकको माग गरे पनि बेवास्ता भएको उनी बताउँछन् ।


सामूहिक रूपमा पठनपाठन गराउँदा शिक्षण प्रभावकारी नभएको उनको दुःखेसो छ । साबिक जिल्ला शिक्षा कार्यालयले विद्यालयमा २०७० सालमा एक शिक्षिकालाई काजमा पठाएको थियो । एक वर्ष नबित्दै उनको काज फिर्ता भएपछि फेरि समस्या भएको विद्यालयले जनाएको छ । २०६१ सालमा स्थापना भएको विद्यालयमा २०७३ सम्म एक सय १८ जना विद्यार्थी अध्ययनरत थिए । शिक्षककै अभावका कारण अहिले ३० विद्यार्थी नजिकैको निजी विद्यालयमा गएका छन् ।


विद्यालय व्यवस्थापन समितिकी अध्यक्ष दुर्गीकुमारी रोकाले दरबन्दीका लागि विभिन्न निकायमा दर्जनौंपटक पुगे पनि बेवास्ता भएपछि पठनपाठनमा समस्या भएको बताइन् । विद्यालयको भरपर्दो आर्थिक स्रोत नहुँदा निजी स्रोतमा शिक्षक राख्न नसकिएको उनले गुनासो गरिन् । ‘अहिले गाउँपालिकामा शिक्षकको व्यवस्था गर्न माग गरिएको छ,’ उनले भनिन्, ‘आश्वासन त पाइएको छ,

तर शिक्षकको व्यवस्था कहिले हुने हो भन्नेबारे जनप्रतिनिधिले समेत स्पष्ट जवाफ दिंदैनन् ।’

प्रकाशित : चैत्र १६, २०७५ ०८:५३
प्रतिक्रिया
पठाउनुहोस्

गाडी दुरुपयोग गर्नेलाई माफी

कान्तिपुर संवाददाता

रुकुम पश्चिम — मेलामा सरकारी गाडीको दुरुपयोग गरेका सरकारी कार्यालयले माफी पाएका छन् । माघ १६ गते मुसिकोट नगरपालिका ७ साँखमा लागेको पापिनी मेलामा सरकारी सवारीसाधनसहित गएका कर्मचारीलाई जिल्ला प्रशासनले पहिलो पटक भन्दै कारबाही नगरी माफी दिएको हो । 

प्रमुख जिल्ला अधिकारी शम्भुप्रसाद रेग्मीले गाडी दुरुपयोगको विषयमा सबै कार्यालयले गल्ती स्वीकारसहितको पत्र लेखेर आगामी दिनमा नदोहोर्‍याउने जवाफ दिएकाले एक पटकलाई माफी दिएको बताए । ‘गाडी दुरुपयोगको विषयमा एक पटकलाई माफी दिइएको छ, आगामी दिनमा यस्तो गतिविधि भएमा कारबाही हुन्छ,’ प्रजिअ रेग्मीले भने, ‘सतर्कता केन्द्रलाई पनि यही व्यहोराको जवाफ पत्र पठाएका छौं ।’

मेलामा आधा दर्जन बढी सरकारी कार्यालयले गाडी तथा मोटरसाइकल दुरुपयोग गरेको सामाजिक सञ्जालमार्फत सार्वजनिक भएपछि प्रशासन कार्यालयले त्यसबारे सम्बन्धित कार्यालयसँग जवाफ माग गरेको थियो । मेलामा सरकारी गाडी प्रयोग गरिएपछि जिल्ला प्रशासनले अनुसन्धानसमेत गरेको थियो ।

प्रशासनको अनुसन्धानपछि मेलामा विभिन्न कार्यालयका सात सवारीसाधन दुरुपयोग भएको पाइएको थियो । मुसिकोट नगरपालिकाको एक गाडी र दुई मोटरसाइकल तथा सरकारी वकिल कार्यालय, शिक्षा विकास तथा समन्वय इकाईका एक/एक गाडी मेलामा गएको पाइएको थियो ।

त्यस्तै, हुलाक कार्यालय र घरेलु कार्यालयका एक/एक मोटरसाइकल प्रयोग भएको थियो । प्रशासनको लिखित स्पष्टीकरणपछि सबै कार्यालयले उक्त विषयमा जवाफ पठाएका थिए । मेलामा सरकारी कार्यालयको सवारीसाधन दुरुपयोग भएको खबर बाहिरिएपछि राष्ट्रिय सतर्कता केन्द्रले समेत यस विषयमा जानकारी दिन जिल्ला प्रशासनलाई पत्र काटेको थियो ।

प्रकाशित : चैत्र १६, २०७५ ०८:५२
पूरा पढ्नुहोस्
प्रतिक्रिया
पठाउनुहोस्
×