छुट्टा छुट्टै अभियोगमा दुई पक्राउ
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
रुकुम पश्चिम — फरक फरक दुई घटना संलग्न २ जनालाई प्रहरीले पक्राउ गरेको छ । बलात्कार मुद्दामा अदालतबाट दोषी करार भएका १ जना र विद्यालयमा अभद्र व्यवहार गर्ने अर्को गरी २ जनालाई पक्राउ गरिएको प्रहरीले जनाएको छ ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![छुट्टा छुट्टै अभियोगमा दुई पक्राउ](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2019/third-party/arrest-2542018021316-1000x0-0812019102543-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
बाँफिकोट गाउँपालिका–१ लागिमका ६३ वर्षीय भद्रबहादुर कामीलाई लुकीछिपी रहेको अवस्थामा पक्राउ गरिएको जिल्ला प्रहरी कार्यालयका प्रमुख प्रहरी नायव उपरीक्षक सुमित खड्काले बताए । कामी विरुद्ध परेको बलात्कारको मुद्दामा सुनुवाइ गर्दै तुलसीपुर उच्च अदालत दाङले दोषी ठहर गरी ५ वर्ष कैद सजाय तोकेको थियो ।
अदालतको फैसला भएदेखि नै फरार रहेका कामीलाई प्रहरीको विशेष टोलीले बुधवार उनकै गाउँबाट पक्राउ गरेको हो । २०७५ मङ्सिर २७ गते गरेको फैसलामा कामीलाई दोषी ठहर्याई ५ वर्षको कैद सजाय तोकिएको थियो ।
विद्यालयमा पुगेर शिक्षक र विद्यार्थीलाई अभद्र व्यवहार गरेको अभियोगमा एक शिक्षक पक्राउ परेका छन् । त्रिवेणी गाउँपालिका–१०को बालबोध आधारभूत विद्यालयको राहत कोटाका शिक्षक ४६ वर्षीय खिमलाल ओली पक्राउ परेका हुन् ।
मादक पदार्थ सेवन गरेर विद्यालयमा प्रवेश गरी अन्य शिक्षक/स्टाफ तथा विद्यार्थीमाथि अभद्र व्यवहार गरेको उजुरीको आधारमा शिक्षक ओलीलाई पक्राउ गरिएको प्रहरीले जनाएको छ ।
कक्षा कोठामा पढाइरहेका शिक्षकलाई अश्लील गालीगलौज तथा विद्यार्थीको पोसाक समेत च्यातिदिएको विद्यालयले जनाएको छ । शिक्षक विरुद्ध प्रहरीले सार्वजनिक हित, स्वास्थ्य, सुरक्षा, नैतिकता विरुद्धको कसुर मुद्दामा म्याद थप समेत गरेको छ ।
जिल्ला प्रशासन कार्यालयबाट १० दिनको म्याद थप गरी आवश्यक अनुसन्धान भइरहेको डीएसपी खड्काले बताए ।
![](https://assets-cdn.ekantipur.com/uploads/source/ads/900-x-100-1-0282024055738.gif)