डन्डामा पीसीआर मेसिन- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

डन्डामा पीसीआर मेसिन

कान्तिपुर संवाददाता

नवलपरासी — गण्डकी प्रदेशको राजधानी पोखराबाहिर पहिलोपल्ट पूर्वी नवलपरासीमा कोरोना परीक्षण गर्ने पीसीआर मेसिन सञ्चालनमा आउने भएको छ । चीन सरकारको सहयोगमा प्राप्त उक्त मेसिन डन्डास्थित जिल्ला अस्पताललाई हस्तान्तरण गरिएको हो ।

यसअघि प्रदेशमा पोखरामा दुई सरकारी र एक निजी प्रयोगशालामा मात्रै कोरोना परीक्षण हुँदै आएको थियो । पूर्वी नवलपरासीबाट पठाइएको स्वाबको रिपोर्ट आउन एक सातासम्म लाग्थ्यो । जिल्ला अस्पतालमा पीसीआर परीक्षण सुरु हुने भएपछि झन्डै एक सय ८० किलोमिटर टाढा स्वाब पठाउनुपर्ने बाध्यताको अन्त्य भएको छ ।

संघीय सांसद तिलक महतले मेसिन हस्तान्तरण गर्दै परीक्षणको दायरा बढाउन सकिने बताए । जिल्ला अस्पतालमै १० शय्याको आईसीयू र भेन्टिलेटर राख्न आफूले पहल गरिरहेको र बजेट निकासा भइसकेको उनले जानकारी दिए ।

स्वास्थ्य कार्यालय प्रमुख केशव चापागाईंले पीसीआर मेसिन जडान गरेपछि सञ्चालनका लागि माइक्रो भाइरोलोजिस्ट (पीसीआर ल्याब विज्ञ) ल्याएर जिल्लाको प्रयोगशालामा काम गर्नेलाई सिकाइने र स्वाब परीक्षणको नजिता सार्वजनिक गर्ने तयारी भएको बताए । उनका अनुसार पीसीआर मेसिन २४ घण्टा सञ्चालन गर्न कम्तीमा १५ देखि २० जना दक्ष जनशक्ति आवश्यक पर्छ । २४ घण्टा मेसिन सञ्चालन गर्न सके दिनमा ४ सय नमुनाको रिपोर्ट निकाल्न सकिने उनको दाबी छ ।

पूर्वी नवलपरासीमा शल्यक्रिया गर्ने अस्पताल नभएका कारण यहाँका बिरामी चितवन रेफर हुँदै आएका छन् । जिल्लामा शनिबारसम्म १ हजार ३ सय जना कोरोना संक्रमित भइसकेका छन् । कोरोनाकै कारण १२ जनाको मृत्यु भइसकेको छ ।

प्रकाशित : कार्तिक १, २०७७ २२:२३
प्रतिक्रिया
पठाउनुहोस्

राप्रपा अध्यक्ष थापा अस्पताल भर्ना, अवस्था सुधारोन्मुख

कान्तिपुर संवाददाता

काठमाडौँ — कोरोना भाइरस संक्रमित बनेका राप्रपा अध्यक्ष कमल थापा अस्पताल भर्ना भएका छन् । टाउको दुख्ने, ज्वरो आउने र श्वासप्रश्वासमा समस्या देखिएपछि अध्यक्ष थापा शुक्रबार चाबहिलस्थित ओम अस्पतालमा भर्ना भएका हुन् ।

पूर्वउपप्रधानमन्त्री रहेका थापाको सघन उपचार कक्ष (आईसीयू)मा उपचार भइरहेको अस्पतालका प्रबन्ध सञ्‍चालक बाबुकाजी कार्कीले शनिबार विज्ञप्तिमार्फत जनाएका छन् । उनका अनुसार थापाको उपचारमा मेडिकल डाइरेक्टर समेत रहेका डा. विश्वनाथ कोइराला, डा. सुबोध सागर ढकाल, डा.प्रमेश सुन्दर श्रेष्ठ लगायतको टोली संलग्न रहेको छ ।

चिकित्सकहरुका अनुसार अध्यक्ष थापाको स्वास्थ्य अवस्था सुधारोन्मुख रहेको छ । उनमा ज्वरो नियन्त्रणमा आएको र श्वासप्रश्वासको समस्या समेत नदेखिएको विज्ञप्तिमा उल्लेख छ ।

थापालाई स्वास्थ्य समस्या देखिएपछि परीक्षण गर्दा बुधबार कोरोना पोजिटिभ देखिएको थियो ।

प्रकाशित : कार्तिक १, २०७७ २०:१५
पूरा पढ्नुहोस्
प्रतिक्रिया
पठाउनुहोस्
×