पौडेललाई सहारा खेलकुद पत्रकारिता पुरस्कार- गण्डकी - कान्तिपुर समाचार

पौडेललाई सहारा खेलकुद पत्रकारिता पुरस्कार

कान्तिपुर संवाददाता

पोखरा — कान्तिपुर टेलिभिजनका पोखरा संवाददाता इन्द्रप्रसाद पौडेललाई यस वर्षको सहारा खेलकुद पत्रकारिता पुरस्कार प्रदान गरिएको छ ।

पोखराको सहारा क्लबले आफ्नो २२ औं वार्षिकोत्सवका अवसरमा मंगलबार उनलाई पुरस्कार प्रदान गरेको हो ।

गण्डकी प्रदेशका आर्थिक मामिला तथा योजनामन्त्री किरण गुरुङले पौडेललाई पुरस्कार हस्तान्तरण गरे । क्लबले हरेक वर्ष प्रदान गर्ने उक्त पुरस्कारको राशि २० हजार ५ सय ५५ रुपैयाँ रहेको छ ।

पुरस्कार हस्तान्तरण गर्दै मन्त्री गुरुङले नियमावलीको अभावमा खेलकुदमा छुट्टिएको बजेट खर्च हुन नसकेको बताए । उनले गत आर्थिक वर्षमा कोरोना महामारीले गर्दा पनि बजेट खर्च हुन नसकेको बताउँदै यस वर्ष पूर्वाधार निर्माणको काम नरोकिने उल्लेख गरे ।

उक्त अवसरमा क्लबले उत्कृष्ट सदस्यको रुपमा प्रकाश रानामगरलाई सम्मान गर्‍यो । क्लबका महासचिव रामजीप्रसाद अधिकारीले गत आर्थिक वर्ष २०७६/०७७ को प्रगति विवरण तथा आगामी नीति तथा कार्यक्रम प्रस्तुत गरे ।

कास्कीको अन्नपूर्ण गाउँपालिका ३ स्थायी घर भइ हाल पोखरा–८ मा बस्दै आएका पौडेल २०६२ देखि कान्तिपुर टेलिभिजनमा आवद्ध छन् ।

प्रकाशित : भाद्र ३०, २०७७ १९:४६
प्रतिक्रिया
पठाउनुहोस्

समस्यामा परेकालाई रसुवागढी नाकाबाट आउन दिने निर्णय

विकास आयोजनामा आवश्यक पर्ने प्राविधिक जनशक्ति विदेशबाट ल्याउनका अनुमति
कान्तिपुर संवाददाता

काठमाडौँ — सरकारले समस्यमा परेकाहरुलाई रसुवागढी नाकाबाट आउन निर्णय गरेको छ । सोमबार बसेको मन्त्रिपरिषद् बैठकले चीनतर्फको रसुवागढी नाकाबाट समस्यामा परेका नेपाली नागरिकहरुलाई आउन दिने निर्णय गरेको हो ।

सरकारले असोज ३० गतेसम्म अन्तर्राष्ट्रिय सीमा नाका बन्द गर्ने निर्णय गरेको छ । दार्चुलाको खलंगा पुलघाट र इलामको पशुपति नगर नाका आवश्यकता अनुसार दुवै देशको सहमतिमा खोल्न सकिने निर्णय पनि सरकारले गरेको छ । सरकारले अन्य १० नाकाबाट प्रवेश दिइरहेको छ ।

यस्तै सरकारले विकास आयोजनामा आवश्यक पर्ने प्राविधिक जनशक्ति विदेशबाट ल्याउनका लागि पनि अनुमति खुला गरेको छ । त्यसका लागि पीसीआर परीक्षण गरी रिपोर्ट नगेटिभ हुनुपर्ने आयोजनाले व्यवस्था गरेको क्वरोन्टिनमा बस्नुपर्ने सर्तहरु राखिएको छ ।

यस्तै, हिमाल आरोहण र पदयात्राका लागि नेपाल आउने विदेशी नागरिकहरुलाई कार्तिक ३० गतेबाट (अक्टोबर १७) अनुमति दिने निर्णय पनि सरकारले गरेको छ ।

प्रकाशित : भाद्र ३०, २०७७ १९:४३
पूरा पढ्नुहोस्
प्रतिक्रिया
पठाउनुहोस्
×