तनहुँमा एकै परिवारका ४ जनासहित ५ जनामा कोरोना- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

तनहुँमा एकै परिवारका ४ जनासहित ५ जनामा कोरोना

सम्झना रसाइली

तनहुँ — जिल्लाको व्यास नगरपालिका–१ चारकुनेमा आइतबार एकै परिवारका ४ जनामा कोरोना भाइरस पुष्टि भएको छ । गत शुक्रबार ब्यास–१ की ६९ वर्षीय वृद्धामा कोरोना पोजिटिभ देखिएपछि उनकै परिवारका सदस्यहरुको परीक्षण गर्दा रिपोर्ट पाजिटिभ आएको नगरपालिकाका स्वास्थ्य शाखा प्रमुख प्रमोद सोतिले बताए ।


‘पोखरामा गरिएको परीक्षणमा ती महिलामा कोरोना देखिएपछि उनका परिवारले आफै पोखरा गएर परीक्षण गरेका थिए’, उनले भने, ‘अवस्था सामान्य रहेका उनीहरुलाई दमौली अस्पतालको आइसोलेसनमा राखिएको छ ।’ संक्रमण हुनेमा ९ वर्षीय बालक, १३ वर्षीया बालिका, ४० वर्षीय पुरुष र ३६ वर्षीय महिला रहेको जनाइएको छ ।

यस्तै, वृद्धामा कोरोना पोजिटिभ देखिएपछि कन्ट्याक ट्रेसिङ मार्फत १०२ जनाको स्वाब संकलन गरी परीक्षणका लागि पठाइएको र रिपोर्ट आउन बाँकी रहेको नगरपालिकाले जनाएको छ । त्यस्तै, जिल्लाको भानु नगरपालिका–४ का ३० वर्षीय पुरुषमा पनि कोरोना संक्रमण पुष्टि भएको छ । संक्रमित हुने पुरुष नगपालिकाकै कर्मचारी रहेको नगरपालिकाका स्वास्थ्य शाखा प्रमुख ऐश्वर्यचन्द्र भट्टराईले बताएका छन् ।

हालसम्म जिल्लामा २१८ जनामा कोरोना संक्रमण पोजिटिभ देखिएकोमा १८० जना निको भएर घर फर्किएका जिल्ला स्वास्थ्य कार्यालयले जनाएको छ ।

प्रकाशित : श्रावण ३२, २०७७ १३:५३
प्रतिक्रिया
पठाउनुहोस्

जयपृथ्वी राजमार्गमा फेरि पहिरो

वसन्तप्रताप सिंह

बझाङ — बाढीले सडक बगाएपछि यातायात अवरुद्ध भएको जयपृथ्वी राजमार्गमा फेरि पहिरो गएको छ । राजमार्गको कचाली खोला र सुवेडाको बीचमा पर्ने डिलमुगामा पहिरो गएको हो ।

शनिबार रातिबाट सुरु भएको पहिरो खस्ने क्रम आइतबार दिउँसो पनि जारी छ । पहिरोले सडकको १५ मिटर भागमा क्षति पुर्‍याएको छ । पहिरोले स्थानीय दीपकराज जोशीको घरमा पनि क्षति पुगेको छ भने सुवेडाका स्थानीयको खेतीयोग्य जमिन र त्यहाँ लगाइएको तरकारी तथा धानबाली नष्ट भएको छ । यस्तै पहिरोमा परेर सुवेडा जिउला सिँचाइ आयोजनाको २० मिटरजति पक्की नहर बगेको र बिजुलीका दुइटा पोलसमेत भाँचिएको जोशीले बताए ।

पहिरो आएको स्थानबाट तल स्थानीयको खेतीयोग्य जमिन र घर परेकाले सडकबाट ढुंगामाटो पन्छाउन कम्तीमा ५ दिन लाग्ने सडक डिभिजन कार्यालयका सब इन्जिनियर इन्द्रराज जोशीले जानकारी दिए । उनका अनुसार ठूलो पहिरोले ल्याएको ढुंगामाटो ट्रिपरमा हालेर ओसार्नुपर्ने भएकोले सडक खोल्ने अझै समय लाग्छ । ‘पहिरो कसरी हटाउने भन्ने विषयमा स्थानीय, डिभिजन सडक कार्यालय र सुरक्षा निकायबच छलफल भइरहेको छ,’ उनले भने ।


यसैबीच गत साउन २६ गतेको बाढीले बगाएको जयपृथ्वी राजमार्गको जालीबगर खण्ड पुनर्निर्माणको काम अन्तिम चरणमा पुगेको डिभिजन सडक कार्यालयले जनाएको छ । बाढीले बगाएको सडकमा १५ मिटर ग्याबिन जाली हालिएको र बाँकी ३ मिटर सडक निर्माणको काम सोमबारसम्म सकिने सब–इन्जिनियर जोशीले बताए ।

बझाङलाई अन्य जिल्लासँग जोड्ने एक मात्र विकल्प रहेको राजमार्ग लामो समयदेखि अवरुद्ध हुँदा सदरमुकाम चैनपुरलगायत जिल्लाको माथिल्लो भेगमा दैनिक उपभोग्य वस्तुहरूको अभाव देखिन थालेको छ । निर्माण सामग्री ढुवानी गर्न तथा आपत्कालीन अवस्थाका बिरामीलाई जिल्लाबाहिर पठाउन समस्या भएको छ ।

प्रकाशित : श्रावण ३२, २०७७ १३:३९
पूरा पढ्नुहोस्
प्रतिक्रिया
पठाउनुहोस्
×