कान्तिपुर वेबसाईट
AdvertisementAdvertisement

म्याग्दीको पहिरोमा बेपत्ता थप एकको शव फेला

रासस

काठमाडौँ — म्याग्दीको धवलागिरि गाउँपालिका–६ मराङमा तीन दिनअघिको पहिरोमा हराइरहेका थप एक जनाको शव भेटिएको छ ।

मराङको कुम्रीका खिमबहादुर जुग्जालीको शव भेटिएसँगै म्याग्दीको धवलागिरि, मालिका र रघुगङ्गा गाउँपालिकामा शुक्रबारको पहिरोमा परिएर मृत्यु हुनेको संख्या २८ जना पुगेको प्रहरी नायब उपरीक्षक किरनजंग कुँवरले जानकारी दिए ।

प्रहरीका अनुसार बेपत्ता भएका तीन जना जीवितै सम्पर्कमा आएका छन । चार जना अझै बेपत्ता छन् । मराङका १९, मालिका–७ बिमका आठ र रघुगङ्गा–६ ठाडाखानीका एक जनाको शव भेटिएको छ ।

पहिरोले पुरिएका मालिका–७ बिमकी एलिसा केसी, धवलागिरि–६ कल्लेनीकी जनिमा केसी, सबिन पुन र दुखुखोलामा बेपत्ता भएकी मालिका–६ की गीता रोका भेटिएका छैनन् ।

प्रहरीका अनुसार पहिराको जोखिममा रहेका धवलागिरि गाउँपालिकाका ५९०, मालिकाका १९६, रघुगङ्गाका ८५ र बेनी नगरपालिकाका २५ जनालाई सुरक्षित ठाउँमा सारिएको छ ।

पहिरोमा घाइते भएका १२ जनाको हेलिकप्टरबाट उद्धार गरिएकामा सात जनाको बेनी अस्पताल, एक जनाको काठमाडौँ र चार जनाको मणिपाल शिक्षण अस्पताल पोखरामा उपचार भइरहेको छ ।

प्रकाशित : असार २८, २०७७ २२:२२
प्रतिक्रिया
पठाउनुहोस्

कोरोना खोपको परीक्षण सफल भएको रुसी विश्‍वविद्यालयको दाबी

एजेन्सी

मस्को — रुसले कोरोना भाइरस(कोभिड-१९)विरुद्धको खोपको परीक्षण सफल भएको दाबी गरेको छ । रुसको सेचनोव विश्वविद्यालयले कोभिड-१९ विरुद्धको खोप स्वयंसेवकमा परीक्षण गर्दा सफल भएको दाबी गरेको हो ।

तस्बिर : रुसी समाचार संस्था तास

रुसी समाचार संस्था ताससँग कुरा गर्दै प्रमुख अनुसन्धानकर्ता इलिना स्मोलयारचुकले परीक्षणमा खोप प्रभावकारी देखिएको दाबी गरेकी छिन् ।

उनले ताससँगको कुराकानीमा भनेकी छिन्, 'सोध पूरा भएको छ र यसबाट खोप पूर्ण रुपमा सुरक्षित रहेको पनि प्रमाणित भएको छ ।' उनका अनुसार खोप परीक्षण गरिएका स्वयंसेवकहरुलाई १५ जुलाईदेखि २० जुलाईसम्ममा डिस्चार्ज गरिनेछ । इलिना सेचनोव विश्वविद्यालयको सेन्टर फर क्लिनिकल रिसर्च अन मेडिकेसन्सकी प्रमुख हुन् ।

विश्वविद्यालयबाट डिस्चार्ज गरिए पनि स्वयंसेवकहरु आफूहरुको निगरानीमा रहने उनले बताइन् । विश्वविद्यालयले जुन १८ मा १८ जना स्वयंसेवकलाई कोभिड-१९ विरुद्धको खोप लगाएको थियो भने २३ जुनमा अन्य २० जनाको समूहमा परीक्षण गरेको थियो । विश्वविद्यालयले खोपको सफल परीक्षण भएको दाबी गरेसँगै भारतस्थित रुसी दूतावासले ट्वीटमार्फत कोभिड-१९ विरुद्ध विश्वकै पहिलो खोपको सफल परीक्षण भएको उल्लेख गरेको छ ।

कोरोना संक्रमणका हिसाबले रुस विश्वमै चौथो स्थानमा छ । आइतबार साँझसम्म रुसमा संक्रमितको संख्या ७ लाख २६ हजारभन्दा बढी पुगेको छ । रुसमा कोरोनाबाट ११ हजार ३ सय १८ जनाको मृत्यु भएको छ भने संक्रमण पुष्टि भएकामध्ये करिब ५ लाख निको भएका छन् ।

यसअघि बेलायतको अक्सफोर्ड विश्वविद्यालय र केही अमेरिकी कम्पनीले पनि कोभिड-१९ विरुद्धको खोपको परीक्षण सुरु गरिसकेका छन् ।

अहिले विश्वभरका अनुसन्धानकर्ता कोभिड–१९ को खोपको आविष्कारमा जुटेका छन् । अहिलेसम्म विभिन्न मुलुकमा गरी १४५ भन्दा धेरै प्रकारका खोपको परीक्षण भइरहेको दाबी गरिएको छ । साधारणतया खोप निर्माणको प्रक्रिया १० देखि २० वर्षभन्दा लामो हुने गरे पनि कोभिड–१९ को सुरक्षित तथा उपयोगी खोप एक वर्षभित्रै निर्माण गर्ने भन्दै वैज्ञानिकहरू दिनरात काम गरिरहेका छन् ।

सम्बन्धित समाचार

प्रकाशित : असार २८, २०७७ २२:१६
पूरा पढ्नुहोस्
प्रतिक्रिया
पठाउनुहोस्
×