कान्तिपुर वेबसाईट
AdvertisementAdvertisement

बागलुङ नगरमा २६ करोड बेरुजु

प्रकाश बराल

बागलुङ — बागलुङ नगरपालिकाको लेखा समितिले जनप्रतिनिधि आएपछि पनि बेरुजु बढिरहेको निष्कर्ष निकालेको छ । लेखा समितिले चालू आर्थिक वर्षको अन्त्यसम्ममा २६ करोड बेरुजु भएको देखाएको हो । सुशासन र आर्थिक पारदर्शिता कायम गराउन जनप्रतिनिधिले धेरै मेहनत गर्नुपर्ने सुझावसहित समितिले नगरपरिषद्मा उक्त प्रतिवेदन पेस गरेको छ ।

समितिका अनुसार बागलुङ नगरपालिकामा गत वर्षसम्म २६ करोड रुपैयाँ बेरुजु देखिएको हो । चालू वर्षका सबै योजना फर्छ्योट गरिसक्दा उक्त रकम अझै बढ्ने समितिका संयोजक कमल खड्काले बताए । स्थानीय सरकार सञ्चालन ऐनले प्रमुख प्रशासकीय अधिकृत र जनप्रतिनिधिलाई बेरुजु घटाउने अधिकार दिएको छ । उनीहरूको बेवास्ताले बेरुजु बढेको भन्दै तत्काल चासो दिन सुझावसमेत दिइएको छ । सातौं नगरपरिषदले बेरुजु घटाउन प्रमुख प्रशासकीय अधिकृतलाई निर्देशन पनि दिएको छ । गत वर्ष मात्रै बागलुङ नगरमा ५ करोड बेरुजु बढेको हो । असुलीको दर भने न्यून छ । ५ करोड बेरुजु थपिएकै वर्ष ४७ लाख मात्र असुली भएको खड्काले बताए ।

महालेखा परीक्षकको प्रतिवेदनले सामाजिक सुरक्षा कार्यक्रम सञ्चालन कार्यविधि बनाए पनि त्यसअनुसार ‘इन्ट्री’ नभएका लाभग्राहीलाई भत्ता वितरण गरेको, नगरसभाबाट विनियोजित रकमभन्दा बढी लेखाएर खर्च भराएको, आर्थिक नियमावली २०६४ को व्यवस्था पालना नभएपछि बेरुजु बढेको सुझाव पनि दिएको सदस्य अर्जुन घिमिरेले बताए । ‘उदाहरणका रूपमा कुडुले छाप खानेपानी आयोजना र रोकापाला खानेपानी आयोजनाको भुक्तानी हेरे पुग्छ,’ उनले भने, ‘स्टिमेटभन्दा बढी भुक्तानी दिँदा नगरमा बेरुजु बढेको छ, जनप्रतिनिधि र ठेकेदारबीच साँठगाँठमा मिलेको देखिन्छ ।’ ती योजनामा २ हजार ८ सय रुपैयाँ प्रतिघनमिटरमा पाइने गिटीको ५ हजार ७ सय रुपैयाँ बनाएर पेस गर्दा पनि भुक्तानी दिएको भेटिएको समितिले जनाएको छ ।

हरेक ठेक्कामा एउटै कर्मचारीले लागत स्टिमेट गर्ने, उसैले मूल्यांकन र अनुगमन गर्दा बेरुजु र भ्रष्टाचार बढेको समितिको निष्कर्ष छ । गत वर्ष महालेखा नियन्त्रकको कार्यालयले पनि ठेक्कामा लापरबाही भएको भन्दै सच्याउन निर्देशन दिएको थियो । अदालत चौतारीदेखि तित्याङको सिमलपाटातर्फको सडक ढलान गर्ने काम भुक्तानी लिएर अधुरै छाडेकाले सार्वजनिक खरिद नियमावली २०६४ अनुसार कारबाही गर्न दिइएको सुझाव पनि कार्यान्वयन भएको छैन ।

नगरपालिकाले स्थापना गरेको कोरोना कोषको हिसाब सार्वजनिक नगरिएको समेत समितिको ठहर छ । ७५ लाख ९५ हजार रुपैयाँ जम्मा भएको कोषबाट कहाँ कति खर्च भयो भन्ने हिसाब नगरपरिषद्मा समेत देखाउन नसकेको भन्दै तत्काल देखाउन आग्रह गरिएको छ । नगरपालिकाले भने ५० लाख खर्च भएको मात्र भनेको छ ।

प्रमुख प्रशासकीय अधिकृत दण्डपाणि शर्मा र नगरप्रमुख जनकराज पौडेलले तत्काल खर्चको ‘ब्रेकडाउन’ बनाएर सार्वजनिक गर्ने बताए । ‘खर्च भइरहेको, क्वारेन्टाइन र आइसोलेसनको खर्च आउने क्रम जारी हुँदा यकिन हिसाब नआएको हो,’ शर्माले भने, ‘खर्च पारदर्शी बनाउन प्रयास गरिएको छ ।’ समितिले संघीय मामिला तथा सामान्य प्रशासन मन्त्रालयको दरबन्दी चार्टसमेत सार्वजनिक नगरेको खड्काले टिप्पणी गरे । नगरपालिकाले बनाउने औद्योगिक ग्राममा अवैधानिक रूपमा सञ्चालित क्रसर उद्योग हटाउन नसक्दा डीपीआर फेल भएको उनले बताए ।

प्रकाशित : असार २८, २०७७ १२:२६
प्रतिक्रिया
पठाउनुहोस्

क्रिकेट प्रशिक्षक सिंहलाई सम्मान 

सन्तोष सिंह

जनकपुर — राष्ट्रिय क्रिकेट प्रशिक्षक नवीन सिंहलाई जनकपुरमा सम्मान गरिएको छ । प्रशिक्षक पदबाट अवकाश पाएपछि सिंहलाई जिल्ला क्रिकेट संघ धनुषाले सम्मान गरेको हो । 

क्रिकेट संघ धनुषाले शनिबार जनकपुरमा आयोजना गरेको सम्मान कार्यक्रममा प्रदेश–२ का आन्तरिक मामिला तथा कानुनमन्त्री ज्ञानेन्द्र यादवले अवकाशप्राप्त प्रशिक्षक सिंहलाई कदर पत्र र दोसल्ला ओढाएर सम्मान गरेको हो । जनकपुरमा क्रिकेटलाई जीवन्त बनाउन अहोरात्र सेवा गरेको र अवकाशपछि पनि क्रिकेटमा लाग्नका लागि हौसला बढाउन सम्मान गरिएको क्रिकेट संघ धनुषाका उपाध्यक्ष शोभाकान्त पाण्डेले बताए ।

प्रशिक्षक सम्मान कार्यक्रममा मन्त्री यादवले समय अनुकुल खेलकुदको व्यवस्थापन नहुँदा राष्ट्रिय खेलकुदमा जनकपुरको प्रभाव घटेको बताए । क्रिकेट संघले आयोजना गरेको सम्मान कार्यक्रममा जनकपुरका दर्जनभन्दा बढी संघ संस्थाले प्रशिक्षकको कार्यको प्रशंसा गर्दै सम्मान गरेका थिए ।

सम्मानित सिंह कुवेतमा सम्पन्न भएको १९ वर्षमुनिको उमेर समूहको एसीसी महिला क्रिकेट प्रतियोगिता २०१२ च्याम्पियन टीम र २०१४ मा १९ वर्षमुनिको पुरुषको नेपाली क्रिकेट टोलीको मुख्य प्रशिक्षकको जिम्मेवारी पाएका थिए । कक्षा ९ पढदा क्रिकेटमा होमिएका सिंह २५ वर्षसम्म खेलेर २५ वर्ष प्रशिक्षक भएर काम गरे ।

२०५२ देखि राष्ट्रिय खेलकुद परिषद(राखेप)मा प्रशिक्षकका रुपमा आवद्ध भएका सिंह असार २२ गते अवकाश पाएका हुन । उनले अवकाशपछि जनकपुरमा अन्तर्राष्ट्रियस्तरको खेलकुद एकेडेमी स्थापनाको तयारीमा जुटेको बताए ।

प्रकाशित : असार २८, २०७७ १२:१८
पूरा पढ्नुहोस्
प्रतिक्रिया
पठाउनुहोस्
×