कान्तिपुर वेबसाईट
AdvertisementAdvertisement

पहिरोबाट गण्डकी प्रदेशमा ११ को मृत्यु, १२ बेपत्ता

रासस

काठमाडौँ — बिहीबार राति परेको पानीका कारण गण्डकी प्रदेशमा ११ जनाको मृत्यु भएको छ भने १२ जना बेपत्ता भएका छन् । अविरल रुपमा परेको पानीका कारण पहिरोमा परी कास्कीमा ७, लमजुङमा ३ र म्याग्दीमा १ गरी ११ जनाको मृत्यु भएका छन् । पहिरोमा १६ जना घाइते भएका छन् ।

प्रदेश प्रहरी कार्यालय गण्डकीका प्रहरी नायब उपरीक्षक राजेन्द्रबाबु रेग्मीका अनुसार बाढीपहिरोका कारण म्याग्दी जिल्लामा १२ जना बेपत्ता भएका छन् । पोखरा महानगरपालिका–१८ सराङकोटस्थित गोठादीमा घरमाथिबाट आएको पहिरोले घरपुरिँदा घरधनी ५० वर्षीय टङ्कबहादुर थापा, निजकी श्रीमती ४५ वर्षीया सोममाया थापा, तनहुँ दमौलीका आठ वर्षीय शीतल श्रेष्ठ, ११ वर्षीया इशिका थापामगर र ६ वर्षीय सुवान थापाको मृत्यु हुनुका साथै आठ जना घाइते भएका छन् ।

त्यसैगरी पोखरा महानगरपालिका–२५ हेमजाको मेलबोटमा पहिरोले घर पुरिँदा ७० वर्षीय हिमकली अधिकारी र पोखरा–२६ पैतेडाँडामा घर पुर्दा ३५ वर्षीय दुर्गाबहादुर सुनारको मृत्यु भएको प्रहरीले जनाएको छ । अविरल वर्षाका कारण म्याग्दी जिल्लाको रघुगङ्गा गाउँपालिका–६ स्थित रापुखोलामा आएको बाढीले बगाएर ठाँडाखानीका ५० वर्षीय नलिमान छन्त्यालको मृत्यु भएको छ भने धवलागिरी गाउँपालिका–६ का चार घर पुरिँदा १० जना तथा मालिका गाउँपालिका–७ निमदुलेका ४० वर्षीया विष्णु पौडेल र चार वर्षीया छोरी ईशा पौडेल बेपत्ता भएका छन् ।

प्रहरी नायब निरीक्षक रेग्मीका अनुसार लमजुङ जिल्लाको बेँसीशहर नगरापलिका–७ सातबिसेस्थित पहिरोले घर पुरिँदा घरधनी ३२ वर्षीय दीपक तामाङ, निजकी श्रीमती २६ वर्षीय बिमाया तामाङ र ९ वर्षीय छोरा छैवाङ तामाङको मृत्यु भएको हो । सोही पहिरोका घाइते तीन जनाको स्थानीय अस्पतालमा उपचार भइरहेको छ ।

पहिरोमा परी विभिन्न जिल्लामा बङ्गुर, बाख्रा, भैँसी, गोरुलगायतका २३८ भन्दा बढी चौपाया मरेको प्रहरीले जनाएको छ । वर्षाका कारण अधिकांश सडक अवरुद्ध हुनुका साथै किसानले खेतमा लगाइएको धानबालीमा समेत ठूलो क्षति पुगेको छ ।

प्रकाशित : असार २६, २०७७ १९:०२
प्रतिक्रिया
पठाउनुहोस्

बबईमा पानी बढेपछि स्थानीयलाई सतर्क रहन प्रशासनको आग्रह

कमल पन्थी

बर्दिया — बिहीबार रातिबाट परेको अविरल वर्षाले बबईमा जलस्तर बढ्दै गएको छ । जिल्ला प्रहरी कार्यालका अनुसार बबईमा जलस्तर ४ दशमलव १३ मिटर मापन गरिएको जनाएको छ । 



बाढी आउन ६ दशमलव १ मिटर भएकोले स्थानीय प्रशासनले बबई तटिय क्षेत्रका बासिन्दालाई सतर्कता अपनाउन भनेको छ । अविरल वर्षासँगै बबईमा जलस्तर बढ्दै गएपछि सर्तकता अपनाइएको स्थानीय प्रशासनले जनाएको छ । दाङमा पानी पर्नासाथ बबईमा बाढीको जोखिम हुने गरेको छ । प्रमुख जिल्ला अधिकारी लिलाधर अधिकारीले सुरक्षा निकायका नेपाली सेना, सशस्त्र प्रहरी र नेपाल प्रहरीका तीनै अंगका गोताखोरलाई उद्धार कार्यका लागि तयारी अवस्थामा रहन निर्देशन दिएको बताए । शुक्रबार बबईमा तीनै अंगका गोताखोरलाई बबई नदीको भेलमा प्रशिक्षण दिइएको छ ।

०७१ सालमा आएको बाढीले ३४ जनाको ज्यान जानुका साथै जिल्लाको अधिकांश भूभाग डुबानमा परेको थियो । त्यसताका ३० हजार बढी बाढीले प्रभावित भएका थिए । बाढीले बारबर्दिया नगरपालिका—१ ढुग्रवा र गुलरिया नगरपालिका—४ को रामपुर टप्पु गाउँ बगाएको थियो । ०७४ सालमा बाढीले २० हजार बढी प्रभावित हुनका साथै ४ जनाको ज्यान गएको थियो ।


प्रकाशित : असार २६, २०७७ १८:५४
पूरा पढ्नुहोस्
प्रतिक्रिया
पठाउनुहोस्
×