गण्डकीमा कोरोना संक्रमितको संख्या ९९४ पुग्यो

लालप्रसाद शर्मा

पोखरा — गण्डकी प्रदेशमा कोरोना संक्रमितको संख्या ९ सय ९४ पुगेको छ । प्रदेश क्षयरोग केन्द्र पोखरा, पोखरा स्वास्थ्य विज्ञान प्रतिष्ठान, राष्ट्रिय जनस्वास्थ्य प्रयोगशाला र भरतपुर अस्पताल चितवनमा गरिएको परीक्षणमा २८ नयाँ संक्रमित थपिएसँगै गण्डकीमा संक्रमितको संख्या हजारनजिक पुगेको हो ।

प्रदेश स्वास्थ्य निर्देशनालयका अनुसार पछिल्लो पटक संक्रमित हुनेमा पूर्वी नवलपरासीका १२, गोरखाका ३, कास्की र तनहुँका १/१, स्याङजाका ८ र बागलुङका ३ जना रहेका छन । पूर्वी नवलपरासी र कास्कीका संक्रमितलाई आइसोलेसनमा राखिसकिएको छ ।

गोरखाका एक जनालाई कोरोना अस्पताल भरतपुर चितवनमा राखिएको र अन्यलाई सम्बन्धित जिल्लाको आइसोलेसनमा लैजाने तयारी भइरहेको निर्देशनालयले बिहीबार विज्ञप्तिमार्फत जनाएको छ । गण्डकीमा संक्रमितमध्ये २ सय १४ जना निको भएका छन । स्याङ्जाका दुई संक्रमितको मृत्यु भएको छ । अझै ३ सय २ जनाको स्वाब परीक्षणको नतिजा आउन बाँकी छ ।


प्रकाशित : असार १७, २०७७ १०:२७
प्रतिक्रिया
पठाउनुहोस्

कांग्रेस सांसद ज्ञानकुमारी छन्त्यालको निधन

कान्तिपुर संवाददाता

काठमाडौँ — नेपाली कांग्रेसकी सांसद ज्ञानकुमारी छन्त्यालको ६३ वर्षको उमेरमा बुधबार निधन भएको छ । सहिद गंगालाल राष्ट्रिय हृदय केन्द्रमा उपचारका क्रममा बुधबार बिहान सांसद छन्त्यालको निधन भएको कांग्रेस सचेतक पुष्पा भुसालले जानकारी दिइन् ।

छन्त्याल कांग्रेसबाट समानुपातिक कोटामा प्रतिनिधिसभा सदस्यमा निर्वाचित भएकी थिइन् ।

बागलुङको ढोरपाटन स्थायी घर भएकी छन्त्याल लामो समयदेखि महिला अधिकारका क्षेत्रमा लामो समयदेखि लड्दै आएकी थिइन् । उनी २०३६ सालमा सक्रिय राजनीतिमा प्रवेश गरेकी थिइन् ।

उनी नेपाली कांग्रेसको दशौं महाधिवेशनदेखि हालसम्म महाधिवेशन प्रतिनिधि थिइन् । त्यस्तै २०५९ सालदेखि २०७१ साल माघसम्म उनी नेपाल महिला संघ बागलुङको जिल्ला उपसभापतिको जिम्मेवारीमा थिइन् । उनी संसदको कृषि, सहकारी, पशुपन्छी तथा वातावरण समितिकी सदस्य पनि थिइन् ।

प्रकाशित : असार १७, २०७७ १०:११
पूरा पढ्नुहोस्
प्रतिक्रिया
पठाउनुहोस्
×