झरी लागेपछि डोजर चलाइँदा घरबस्ती जोखिममा

प्रकाश बराल

बागलुङ — साताअघि काठेखोला गाउँपालिकामा पहिरोले घर पुर्दा एक महिलाको ज्यान गयो । बिहीबार पनि सदरमुकाम बागलुङ बजारदेखि सिगाना, बरेङ हुँदै शान्तिपुर जोड्ने सडकमा दर्जन ठाउँ पहिरो खसेको छ ।

बरेङ गाउँपालिका–१ धुल्लुबास्कोटमा दुई घर जोखिममा परेपछि परिवार छिमेकीकहाँ आश्रय लिन बाध्य छन् ।

पर्वतमा रहेको पूर्वाधार विकास कार्यक्रमको १ करोड ५० लाख र सडक विभागको १ करोडमा सडक स्तरोन्नति गर्ने भन्दै बर्खा लागेपछि काम थाल्दा पहिरोको जोखिम झन् बढेको छ ।

काठेखोलादेखि पहिलो खण्डमा विभाग र दोस्रो खण्डमा पूर्वाधारले काम थालेका हुन् । जिप र ट्याक्टरमार्फत नियमित खाद्यान्न ढुवानी हुँदै आएको सडक पहिरोले अवरुद्ध भएपछि स्थानीयले सास्ती खेपेको बागलुङ नगरपालिका–८ का वडाध्यक्ष राजन जीसीले बताए । ‘काम त पहिले नै थालेका थिए, लामो समय गरेनन्, वर्षाले छोपेपछि डोजर लगाउँदा यो गति भयो,’ उनले भने

मध्यपहाडी लोकमार्गको बिहुँ खण्डमा पनि झरीमै माटो र ग्राभेल बिछ्याउने काम भइरहेको छ । पहिरोले नाली थुनिएपछि सडकबाटै भेल आउँदा घरटहरामा क्षति पुग्न थालेको काठेखोला–५ का वडाध्यक्ष शिवप्रसाद कँडेलले बताए । इनारपानीनजिकै झन्डै ५ सय मिटर सडक चर्केपछि सवारीसाधन जोखिम मोलेर आउजाउ गरिरहेका छन् । लोकमार्ग भत्केर खानेपानी पाइप बगाउँदा सदरमुकाममा पानी आपूर्ति रोकिएको छ ।

बर्खा लागेपछि काम थाल्ने प्रवृत्तिले भएका संरचना पनि बिग्रने र दुर्घटना बढ्ने गरेको जिल्ला समन्वय समितिका प्रमुख राजेन्द्र ढुंगानाले बताए । ‘पैसा निकासा गर्ने निहुँमा वर्षातमा मात्रै काम गर्ने चलन नहटेसम्म दुर्घटना पनि रोकिन्न,’ उनले भने, ‘अनुगमनका क्रममा सांसद विकास कोषको रकमले गरिएका र प्रदेश सरकारको पूर्वाधार कार्यालयको काममा बढी जोखिम देखियो ।’

कालीगण्डकी करिडोरको बेवास्ताले बानपा–१३ को पैयुँपाटास्थित कालाखोलानजिकै ५ वटा घर बग्ने अवस्थामा पुगेका छन् । ३ घरमा पहिरो खस्ने जोखिम छ । गत वर्षदेखि ५ घरले पाल टाँगेर पहिरो जाने स्थानको पानी तर्काएका छन् । जाली, पर्खाललगायत संरचनामा लगानी नगरिँदा यस्तो जोखिम निम्तेको हो । नगरपालिका र गाउँपालिकाले विनियोजन गरेका अधिकांश योजनामा पनि असार लागेपछि मात्रै काम गर्ने प्रवृत्ति बढेको छ । ‘स्थानीय पालिकाले आफ्नो बजेट समयमै खर्चन सक्नुपर्ने हो तर उनीहरू पनि कमिसन खान असारमै खर्चन थालेका छन्,’ अधिवक्ता राम शर्माले भने, ‘अधिकांश जनप्रतिनिधि कमिसन खाने धुनमा लाग्दा काम ढिला र कमजोर भएको हो ।’ नागरिक तहबाट गरिएको अनुगमन र सुझाव नटेर्नेलाई कारबाही हुने नीति आवश्यक रहेको उनले बताए ।

बजारभित्रै सास्ती

असारे विकासले सदरमुकाम बागलुङ बजारमै पनि सास्ती थपिएको छ । असार १ गते लकडाउन खुकुलो भए पनि मुख्य बजार प्रवेश गर्न स्थानीयले बासिन्दा घुमाउरो बाटो हिँड्न बाध्य छन् ।

हल्लन चोक, जिपपार्क र ट्राफिक चोकमा स्तरोन्नतिका नाममा काम अलपत्र छाडिएको छ । बाटो थुनिँदा सामान झार्न नसकिएको पसल सञ्चालकहरूको गुनासो छ । नगरपालिकाको चोक सुधार, नाली निर्माण र ढल व्यवस्थापनको बजेट असार लागेपछि मात्र खर्चन लागिएको हो ।

झरी परेपछि भत्काएर छाडिएका सडकमा सवारी गुड्न पाएका छैनन् । बोकेर सामान ल्याउँदा हेटौंडाबाट ल्याएको भाडाभन्दा बजार भित्र्याउन बढी खर्च लागेको बागलुङ नगरपालिका–२ का सुमन भुसालले बताए ।

प्रकाशित : असार १५, २०७७ १२:४९
प्रतिक्रिया
पठाउनुहोस्

सुस्मिताको हत्याका आरोपी सार्वजनिक

सुवास विडारी

हेटौंडा — हेटौंडा उपमहानगरपालिका–४, कर्राकी सुस्मिता थापाको हत्याको आरोपमा मकवानपुर प्रहरीले सोमबार  चार जनालाई सार्वजनिक गरेको छ ।

प्रहरीले आर्थिक, मानसिक र यौनजन्य हिंसापश्चात् सुनियोजित रुपमा परिवारबाटै उक्त हत्या भएको निष्कर्ष निकाल्दै उनीहरुलाई सार्वजनिक गरेको हो । घटनामा संलग्न रहेको आरोपमा मृतक थापाका ५८ वर्षीय ससुरा प्रकाश थापा, ५० वर्षीया सासू तुलसा थापा, २३ वर्षीया नन्द सीता थापा र २७ वर्षीया अमाजू दुर्गा थापालाई पत्रकार सम्मेलन गरी सार्वजनिक गरिएको हो ।

सुस्मिता आफ्नै घरको भान्सा कोठामा असार २ गते मृत अवस्थामा भेटिएकी थिइन् । प्रहरीले सुस्मिताको हत्या आरोपमा मृतकका ससुरा र नन्दलाई असार ४ गते नै पक्राउ गरी ज्यानसम्बन्धी कसुर मुद्दामा अनुसन्धन प्रक्रिया सुरु गरेको थियो । प्रहरीले १३ दिनको अनुसन्धानपश्चात् घटनाको टुंगो लगाएको जिल्ला प्रहरी कार्यालय मकवानपुरका प्रहरी उपरीक्षक सुशीलसिं राठौरले जानकारी दिए ।

उनको हत्या असार १ गते राति १० बजेको समयमा नै भएको अनुसन्धानबाट खुलेको छ । ‘भान्सा कोठामा नन्द सीतासँग खाना खाइरहेको अवस्थामा एक्कासि ससुराले पछाडिबाट काठले सुस्मितालाई हानेको देखिन्छ । ससुराले काठले हानेपछि नन्दले लोरोले हानेर उनको हत्या भएको देखिन्छ,’ प्रहरी उपरीक्षक राठौरले नौ महिना अगाडि ससुराली कपिलवस्तुबाट फर्केने क्रममा नवलपरासीको दाउन्नेमा सवारी दुर्घटनामा सुस्मिताका पतिको निधन भएको बताए ।

‘पतिको निधनपश्चात् नियमितजसो सुस्मितालाई परिवारबाटै यातना भइरहेको देखिन्छ,’ प्रहरी उपरीक्षक सिंहका अनुसार सुसराले मृतक बुहारीलाई बाथरुममा जबर्जस्ती करणीको प्रयास समेत भएको अनुसन्धानको क्रममा खुलेको छ । ‘आफूले गरेको करणी प्रयास बाहिर आउँदा सामाजिक प्रतिष्ठा जाने र छोराको निधनपश्चात् प्राप्त रकमको विषयलाई लिएर मारेको देखिन्छ,’ राठौरले भने ।

प्रहरीका अनुसार मृतककी पतिको निधनपश्चात् दुर्घटना, बिमा, सामाजिक सुरक्षा कोष तथा कार्यरत संस्थाबाट करिब ५५ लाख ६० हजार तीन सय २४ रुपैयाँ प्राप्त भएको रकमको विषयलाई लिएर समेत परिवारमा कलह अवस्था सिर्जना भएको थियो । बिमाको रकम दश लाख ६३ हजार नौ सय चौध रुपैयाँ समेत भने ससुराले झिकिसकेको प्रहरीले जनाएको छ ।

सम्बन्धित सामचार

प्रकाशित : असार १५, २०७७ १२:४८
पूरा पढ्नुहोस्
प्रतिक्रिया
पठाउनुहोस्
×