संक्रमितको सम्पर्कमा रहेका गलकोटका १०९ जनाकै पीसीआर रिपोर्ट नेगेटिभ

गत मंगलबार पर्सामा कोरोना भाइरस (कोभिड १९) पोजिटिभ पुष्टि भएका मध्ये १४ जना बागलुङबाट गएका थिए । उनीहरु वैशाख १३ गते पर्सा पुगेका थिए । क्वारेन्टाइनमा बसेकै बेला भएको परीक्षणमा उनीहरुलाई पोजिटिभ देखिएको थियो ।

गलकोट नगरपालिका वडा नं. ३ को हटिया बजार, वडा नं. ५ को हरिचौर बजार र आसपासका क्षेत्रमा घर बनाउने डकर्मी, सिकर्मी र विभिन्न फेन्सीहरुमा काम गर्ने ८० जना मजदुरलाई नगरपालिकाले वैशाख ११ गते बस रिजर्भ गरेर पठाएको थियो । उनीहरु १३गते पर्सा पुगेका थिए । फर्काएकामध्ये एउटै बसमा सवार रौतहट र बारा जिल्लाका मजदुरमा भने संक्रमण भेटिएको छैन । गलकोटका कसैलाई पनि संक्रमण नभेटिएपछि पर्साको एक क्वारेन्टाइनमा बस्दा उनीहरुमा संक्रमण भएको हुन सक्ने स्वास्थ्य कार्यालय बागलुङका प्रमुख सुरज गुरौले बताए । ती मजदुर लगेका बस चालक र सहचालकको पनि पीसीआर रिपोर्ट नेगेटिभ आइसकेको छ ।

गण्डकी प्रदेश सरकारले शंकास्पद सबैको अनिवार्य पीसीआर परीक्षण गर्ने निर्णय गरेपछि शुक्रबार र शनिवार स्वाब संकलन भएको थियो । ७ जना स्वास्थ्यकर्मी गलकोट गएर संकलन गरेको स्वाबको पीसीआर रिपोर्ट आइतबार राति मात्र आएको हो । सबैजना नेगेटिभ भएपछि सिल गरिएको गलकोटमा सोमबार बिहानदेखि सामान्य चहलपहल सुरु भएको छ ।

‘लकडाउनलाई कडाइका साथ पालना गरिएको छ, सिल गरेपनि औषधि र तरकारी ढुवानीमा व्यवस्थापन गरिएको थियो,’ गलकोट नगरपालिकाका प्रमुख भरत शर्मा गैरेले भने, ‘संक्रमणको जोखिम कम भएको छ, अझै चनाखो बन्दैछौं ।’ भारतको सिमानामा रोकिएका ४० जना स्थानीय सोमबार बागलुङ आउने क्रममा छन् । उनीहरुबाट पनि संक्रमणको जोखिम हुने भएकोले प्रभावकारी क्वारेन्टाइनको व्यवस्थापन गर्न लागिएको प्रमुख जिल्ला अधिकारी गौलोचन सैंजुले बताए ।