भारतबाट फर्किएका ३ युवा क्वारेन्टाइनमा
गोरखा — भारतबाट फर्किएका तीन युवालाई सामूहिक क्वारेन्टाइनमा राखिएको छ । भैरहवाको वेलहिया नाकामा अलपत्र परेका उनीहरुलाई गोरखा प्रशासनको समन्वयमा उद्धार गरिएको हो ।
उनीहरुलाई सहिद लखन गाउँपालिका–२, आरुबोटस्थित बालज्योति प्राथमिक विद्यालयको क्वारेन्टाइनमा राखिएको गाउँपालिकाका अध्यक्ष रमेश थापाले बताए ।
थापाका अनुसार भारतबाट फर्किए लगत्तै गोरखा अस्पतालमा उनीहरुको स्वास्थ्य जाँच गरिएको थियो । ‘स्वास्थ्य चौकीबाट स्वास्थ्यकर्मी पठाएर शरीरको तापक्रम नाप्ने काम पनि भइरहेको छ,’ उनले भने । उनीहरुको स्वास्थ्य अवस्था सामान्य रहेको स्वास्थ्यकर्मीले बताएका उनले जानकारी दिए ।
गाउँपालिकाभित्र विदेशबाट फर्किएका ५३ जना होम क्वारेन्टाइनमा रहेको उनले बताए । विदेशबाट फर्किएकाहरुको स्वास्थ्य अवस्थाका बारेमा स्वास्थ्य कार्यालयका फोकल पर्सनले बुझ्ने गरेका छन् ।
प्रकाशित : चैत्र २०, २०७६ १८:५५