लकडाउन अवज्ञा गर्नेलाई रंगशालामा - गण्डकी - कान्तिपुर समाचार

लकडाउन अवज्ञा गर्नेलाई रंगशालामा 

लालप्रसाद शर्मा

पोखरा — लकडाउन उल्लंघन गर्ने झन्डै २०० भन्दा बढीलाई प्रहरीले पोखराका विभिन्न स्थानबाट नियन्त्रणमा लिएर पोखरा रंगशालामा दिनभर राखेको छ । उनीहरुलाई भलिबल प्रशिक्षण केन्द्र र बास्केटबल कोर्टमा सामाजिक दूरी कायम गरी राखिएको थियो । 

सरकारी आदेशलाई लत्याएर सडकमा हिँडिरहेका २३२ जनालाई नियन्त्रणमा लिएर सम्झाइबुझाइ गरिएको कास्की प्रहरीका प्रवक्त डिएसपी राजकुमार केसीले बताए । केसीका अनुसार पहिलो चरणमा १८७ र दोस्रो चरणमा ४५ जनालाई नियन्त्रणमा लिइएको थियो । उनीहरुलाई लकडाउन, कोरोना भाइरस महामारी, जोगिने उपायलगायत विषयमा कक्षा दिइएको थियो ।


मदन भण्डारी स्पोर्ट्स एकेडेमीले उनीहरुलाई खानेपानी व्यवस्था गरेको थियो ।

प्रकाशित : चैत्र १५, २०७६ १८:५७
प्रतिक्रिया
पठाउनुहोस्

कपिलवस्तुमा १ सय ८७ शय्याको क्‍वारेन्टाइन, ८ बेडको आइसोलेसन

मनोज पौडेल

कपिलवस्तु — कोरोना भाइरसका शंकास्पद बिरामीका लागि कपिलवस्तुका स्थानीय तहले १ सय ८७ शय्याको क्वारेन्टाइन स्थलको तयारी थालेका छन्। जिल्ला विपद् व्यवस्थापन समितिले जिल्लाका १० वटै स्थानीय तहसँग समन्वय गरी तयारी तीव्र पार्न आग्रह गरेपछि क्वारेन्टाइन कक्ष निर्माण अघि बढेको हो।

संक्रमितको उपचारका लागि ८ बेडको आइसोलेसन कक्षसमेत तयार गरिएको छ।

कृष्णनगर नगरपालिकामा ७४, कपिलवस्तु नगरपालिकामा ११ र विजयनगर गाउँपालिकामा १६ बेडको क्वारेन्टाइन बनाइएको छ। त्यस्तै, शिवराज नगरपालिकामा १४, महाराजगन्ज नगरपालिकामा ३५ र वाणगंगा नगरपालिकामा ४ बेडको क्वारेन्टाइन तयारी अवस्थामा छन्।

बुद्धभूमि नगरपालिकामा ४, मायादेवी गाउँपालिकामा २०, यशोधरा गाउँपालिकामा ५ र शुद्धोदन गाउँपालिकामा ४ बेडको क्वारेन्टाइन बनिसकेका छन्। सदरमुकामस्थित कपिलवस्तु जिल्ला अस्पतालमा ४, वाणगंगाको पिपरा अस्पतालमा २ र शिवराज अस्पताल बहादुरगन्जमा भने २ बेडको आइसोलेसन वार्ड निर्माण गरिएको छ।

‘शंकास्पद बिरामीको उपचारका लागि पूर्वतयारी गरिएको हो,’ प्रमुख जिल्ला अधिकारी दीर्घनारायण पौडेलले भने, ‘जिल्लामा लकडाउनको कार्यान्वयन प्रभावकारी बनाउन लागिपरेका छौं।’

प्रकाशित : चैत्र १५, २०७६ १८:५७
पूरा पढ्नुहोस्
प्रतिक्रिया
पठाउनुहोस्
x
×