लमजुङका दुई अस्पतालमा फिबर क्लिनिक
(लमजुङ) — कोरोना भाइरस (कोभिड–१९) संक्रमणको आशंका भएका बिरामीको जाँच तथा उपचारका लागि लमजुङका दुई वटा सामुदायिक अस्पतालमा फिबर क्लिनिक सञ्चालन गरिएको छ ।
बेंसीसहरस्थित लमजुङ जिल्ला सामुदायिक अस्पताल र सुन्दरबजारस्थित नमुना सामुदायिक अस्पतालमा फिबर क्लिनिक सञ्चालन गरिएको हो । बहिरंग (ओपीडी) सेवा बन्द गरेका दुवै अस्पतालले आकश्मिक कक्षमा जानुअघि ज्वरो, रुघाखोकीका बिरामीलाई फिबर क्लिनिकमै जााच गर्न थालेका छन् । अस्पतालको टिकट काउन्टरअगाडि त्रिपाल टाागेर क्लिनिक सञ्चालन गरिएको लमजुङ सामुदायिक अस्पतालका प्रमुख हेमन्त श्रेष्ठले बताए ।
उनका अनुसार क्लिनिकमा चिकित्सकहरुले बिहान ९ बजेदेखि अपरान्ह ४ बजेसम्म सेवा दिइरहेका छन् । शुक्रबार भने ९ बजेदेखि २ बजेसम्म मात्रै सेवा दिइने उनले बताए । ‘घाउ तथा चोटपटक लागेकालाई भने इमरजेन्सीमै उपचार गरिएको छ,’ उनले भने ।
उक्त अस्पतालमा ५ बेड क्षमताको आइसोलेसन कक्षसमेत बनाइएको छ । संक्रमणको आशंका देखिएका बिरामीलाई आइसोलेसनमा राखेर उपचार गर्ने गरिएको अस्पतालले जनाएको छ ।
सुन्दरबजार नगरपालिका प्रमुख जनकराज मिश्रका अनुसार ज्वरो आउने, रुघाखोकी लाग्नेजस्ता लक्षण देखिएका बिरामीका लागि नमुना सामुदायिक अस्पतालमा फिबर क्लिनिक सञ्चालन गरिएको हो । कोरोना भाइरसको संक्रमण जस्तो लक्षण देखिएका बिरामीलाई अस्पतालमा बनाइएको ८ बेड क्षमताको आइसोलेसन कक्षमा राखेर उपचार गरिने उनले जानकारी दिए ।
लमजुङमा आइसोलेसन कक्ष तयार गरिए पनि हाल उपचारार्थ बिरामी छैनन् । केही दिनअघि लमजुङ जिल्ला सामुदायिक अस्पतालको आइसोलेसनमा एक बिरामीको उपचार गरिएको थियो । सोपश्चात् उनलाई काठमाडौंको पाटन अस्पताल लगेर भर्ना गरी स्वाब परीक्षण गर्दा कोरोना संक्रमण नेगेटिभ देखिएको थियो ।
फिबर क्लिनिक सञ्चालन गर्ने अस्पताललाई सरकारले १० लाख रुपैयाा बजेट विनियोजन गरेको छ ।