मनाङमा कीटाणुनाशक औषधि छर्न थालियो

कारोना भाइरस (कोभिड–१९) को जोखिम न्यूनीकरणका लागि चामेको पदमार्ग क्षेत्र, बजार र सरकारी कार्यालय आउनेजाने बाटोमा कीटाणुनाशक औषधि छर्किइएको हो । स्वास्थ्य कार्यालय मनाङको सहयोगमा नेपाल प्रहरी र सशस्त्र प्रहरीले कीटाणुनाशक औषधि छरेको प्रमुख जिल्ला अधिकारी पुष्पराज पौडेलले बताए ।

औषधि छर्कन चामे गाउँपालिका अध्यक्ष लोकेन्द्र घले, डीएसपी मेखबहादुर कुँवर, सशस्त्र प्रहरी बल नेपाल ३२ नम्बर गुल्म चामेका डीएसपी रमेश भुवाजीलगायत आफैं खटिएका थिए । कोरोना भाइरस संक्रमण हुन नदिन सरोकारवालाको सहयोगमा कीटाणुनाशक औषधि छर्न थालिएको प्रजिअ पौडेलले बताए ।जिल्ला स्वास्थ्य कार्यालयबाट ३० लिटरको कीटाणुनाशक औषधि ल्याएर छर्किइएको हो ।

चामेको तल्लो बजार, सरकारी कार्यालय जाने माथिल्लो बजार साथै चामेको बीच भागबाट तल्लो र माथिल्लो क्षेत्र जाने चक्रीय अन्नपूर्ण पदमार्ग र सडक दायाँबायाँ शुक्रबार कीटाणुनाशक औषधि छरिएको डीएसपी मेखबहादुर कुँवरले बताए ।