ब्रेललिपिले बढायो आत्मविश्वास

पढाइमा राम्रो गरेकाले उनलाई एकै पटक कक्षा ३ बाट ६ मा लगियो । अहिले आफूमा आत्मविश्वास बढेको उनको भनाइ छ । ‘रोकिएको पढाइलाई निरन्तरता दिन पाएको छु,’ शिववरणले भने, ‘पढाइसँगै क्रिकेट खेलमा पनि सफलता पाएको छु । यही वर्ष काठमाडौंमा नेत्रहीन राष्ट्रिय क्रिकेटमा मधेस टिमबाट खेल्दै उत्कृष्ट प्रदर्शनसमेत गर्न सफल भएँ ।’ दिव्य युवा क्लब बिरञ्चीबर्वा पर्साले सोमबार वीरगन्जमा गरेको किशोरी सशक्तीकरणका लागि शिक्षा कार्यक्रम जिल्ला सल्लाहकार समितिको समीक्षामा उनले अनुभव सुनाए । कार्यक्रममा परियोजनाबाट लाभान्वित अरुले पनि अनुभव सुनाएका थिए ।

सन् २०१८ देखि पर्साको धोबिनी र जगरनाथपुर गाउँपालिकामा सञ्चालित शिक्षा कार्यक्रमले ७ सय ६८ सीमान्तकृत तथा अपांगता भएका किशोरकिशोरीको शिक्षा र आयआर्जनमा पहुँच बढाएको जानकारी कार्यक्रममा दिइयो । इङ्गेज परियोजनाका संयोजक गणेशसिंह ठकुरीले भीएसओ नेपालको आर्थिक र ह्यान्डीक्याप इन्टरनेसनलको प्राविधिक सहयोग तथा दिव्य युवा क्लबको साझेदारीमा सञ्चालित कार्यक्रम समुदायका लागि लाभकारी भएको बताए । ‘११ विद्यालयमा गुनासो सुनुवाइ समिति क्रियाशील बनाउन सफल, पालिका र विद्यालयस्तरमा र बालिका तथा समावेशी शिक्षा सञ्जाल गठन गर्न सफल भएका छौं,’ उनले भने, ‘कार्यक्रममार्फत २ सय २९ जना किशोरी व्यवसाय गरी आम्दानी गर्न सफल छन् । उनीहरू टेलरिङ, ब्युटिसियन, बुटिक, चुरा बनाउने, बाख्रापालन, किराना पसलजस्ता व्यवसाय गरिरहेका छन् ।’

उनका अनुसार ३ सय ७४ जना विद्यालयबाहिर रहेका किशोरी पढ्न कक्षामा नियमित आएका छन् । पालिकास्तरमा समावेशी शिक्षा नीति र बालिका तथा समावेशी शिक्षा सञ्जाल कार्यविधि पास गराउन सफल भएको उनले बताए ।