कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १२४

गाउँपालिका अध्यक्षमाथि आक्रमण गर्ने ३ जना पक्राउ

गाउँपालिकाका अध्यक्ष यशवन्त यादवले भने- 'चुनाव जितेपछि ममाथि तेस्रोपल्ट आक्रमण भएको छ ।'
भूषण यादव

वीरगन्ज — पर्साको सखुवाप्रसौनी गाउँपालिकाका अध्यक्ष यशवन्त यादवमाथि आक्रमण गरेको आरोपमा प्रहरीले तीन जनालाई पक्राउ गरी अनुसन्धान अगाडि बढाएको जनाएको छ ।

गाउँपालिका अध्यक्षमाथि आक्रमण गर्ने ३ जना पक्राउ

गाउँपालिका कार्यालयबाट आइतबार साँझ घर फर्किने क्रममा अध्यक्ष यादवमाथि आक्रमण भएको थियो । अध्यक्ष चढ्ने गाउँपालिका कार्यालयको ना १ झ १६८७ नम्बरको गाडीको सीसा पनि फुटेको छ ।

सँगै रहेको ना २ च ८६६ नम्बरको निजी कार तोडफड गरी आगजनी गरिएको बताइएको छ । यादवसँगै रहेका ऋषिकुमार सहनी र नगेन्द्रप्रसाद यादव पनि घाइते भएका छन् । सहनीको हात भाँचिएको छ भने यादवको टाउकोमा चोट लागेको छ ।

प्रहरी उपरीक्षक रमेश बस्नेतका अनुसार तोडफोड र आगजनीमा संलग्न रहेका तीन जनालाई नियन्त्रणमा लिइएको छ । अध्यक्षमाथि आक्रमण भएको सूचना पाउनासाथ एसपी बस्नेत घटनास्थल पुगेका थिए ।

‘आक्रमण गर्ने तीन जनालाई नियन्त्रणमा लिई थप अनुसन्धान अगाडि बढाएका छौं,’ एसपी बस्नेतले भने । गाउँपालिका अध्यक्ष यादवले कार्यालयबाट घर फर्किने क्रममा आइतबार साँझ करिब ६ बजे २०/२५ जनाको समूहमा आएको भीडले गाडी रोकेर आक्रमण गरेको बताए ।

‘आक्रमण हुन थालेपछि पछाडि निजी गाडीमा रहेका सहयोगीहरू बाहिर निस्केर रोक्ने प्रयास गरे,’ अध्यक्ष यादवले भने, ‘अनि हामी त्यहाँबाट निस्कियौँ, गाउँपालिकाको गाडीको सीसा फुटेको छ, निजी कार आगजनी गरेका छन् ।’ आइतबारको आक्रमणसँगै अध्यक्ष यादवमाथि तीनपटक सांघातिक हमला भइसकेको छ ।

‘गाउँपालिका कार्यालयमा मेरो कोहीसँग पनि वादविवाद भएको छैन,’ अध्यक्ष यादवले भने, ‘ममाथि किन आक्रमण गरे ? यो राजनीतिक विवाद हैन, यो सांघातिक हमला हो, चुनाव जितेपछि ममाथि तेस्रोपल्ट आक्रमण भएको छ ।’

प्रकाशित : आश्विन १०, २०७९ १५:४०
प्रतिक्रिया
पठाउनुहोस्
जनताको राय

भ्रष्टाचार निवारण ऐन संशोधन विधेयकमा निजी क्षेत्र पनि अख्तियारको दायराभित्र पर्ने गरी प्रस्तावित व्यवस्थाबारे तपाईंको धारणा के छ ?

x
×