१० दिनमै सीडीओको सरुवा

गत भदौ २७ गते जिल्ला प्रशासन कार्यालय सप्तरीमा प्रजिअको रुपमा हाजिर भएका नुरहरि खतिवडालाई बुधबार मुख्यमन्त्री तथा मन्त्रिपरिषद्को कार्यालय मधेस प्रदेश जनकपुर सरुवा भएको छ । उनको स्थानमा गृह मन्त्रालयबाट भुपेन्द्र थापा बिहीबार नयाँ प्रजिअको रुपमा सप्तरी आएका छन् ।

एक वर्षदेखि सप्तरीका प्रजिअ रहेका जनार्दन गौतमको उदयपुर सरुवा भएपछि भदौ २७ मा नयाँ प्रजिअको रुपमा जिल्ला प्रशासन कार्यालय संखुवासभाबाट खतिवडा सप्तरी आएका थिए । जिल्लाको वस्तुस्थिति बुझ्दै गरेको र निर्वाचन तयारीमा जुट्नै लागेका बेला अचानक खतिवडाको सरुवा भएर बिहीबार नयाँ प्रजिअ भुपेन्द्र थापा जिल्लामा आएका हुन् ।

सप्तरीका प्रजिअ १० दिनमै सरुवा भएको बारे बोल्दै गृह मन्त्रालयका प्रवक्ता फणीन्द्रमणि पोखरेलले भने, ‘कर्मचारी प्रशासनमा बुझ्नुपर्ने हुन्छ । कहिलेकाहीँ कर्मचारी आफैँले पनि सरुवा मागेर जाने गर्छन् । १० दिनमै प्रजिअ सरुवा भयो के गर्ने ?’