एम्बुलेन्सको ठक्करबाट एक जनाको मृत्यु, एक घाइते- मधेस - कान्तिपुर समाचार

एम्बुलेन्सको ठक्करबाट एक जनाको मृत्यु, एक घाइते

शंकर अाचार्य

पर्सा — एम्बुलेन्सले मोटरसाइकलाई ठक्कर दिँदा मोटरसाइकलमा सवार एक जनाको मंगलबार मृत्यु भएको छ । अर्का एक जना घाइते भएका छन् ।

जिल्ला प्रहरी कार्यालयका अनुसार मंगलबार दिउँसो साढे २ बजे वीरगन्ज महानगरपालिका वडा नं २५ अलौस्थित पदम रोड सडक खण्डमा बा २ झ ४०२० नम्बरको एम्बुलेन्सले प्रदेश २–०३–०१२प ५६०९ नम्बरको मोटरसाइकललाई ठक्कर दिएको थियो ।

एम्बुलेन्सको ठक्करपछि मोटरसाइकल चालक सखुवाप्रसौनी गाउँपालिका–४ का ४० वर्षीय जुमदिन देवान र ७० वर्षीय फजिल देवान घाइते भएका थिए । उपचारको क्रममा दिउँसो ३ बजे ७० वर्षीय फजिल देवानको मृत्यु भएको हो ।

दुर्घटनापछि उनीहरूलाई उपचारका लागि तत्कालै एलएस न्यूरो अस्पताल वीरगन्जमा लगिएको थियो । घाइते जुमदिन देवानको भने उपचार भइरहेको छ । एम्बुलेन्स चालक वीरगन्ज महानगरपालिका वडा नं १९ का ४० वर्षीय जियालाल यादवलाई प्रहरीले नियन्त्रणमा लिएको छ ।

प्रकाशित : भाद्र २८, २०७९ १६:५३
प्रतिक्रिया
पठाउनुहोस्

मेरो अभिव्यक्तिलाई लिएर पानी बन्द गरिनु न्यायपूर्ण हुन सक्दैन : नेता पौडेल

रासस

तनहुँ — नेपाली कांग्रेसका नेता रामचन्द्र पौडेलले आफ्नो अभिव्यक्तिलाई लिएर पानी बन्द गरिनु न्यायपूर्ण हुन नसक्ने बताएका छन् । तनहुँको म्याग्दे–१ गुणादीका स्थानीयवासीले दमौली आउने पानी बन्द गरिदिएपछि पौडेलले मंगलबार प्रेस विज्ञप्ति जारी गरी आफ्नो भनाइलाई विभिन्न माध्यमबाट तर्कसहितका व्याख्यासहित प्रेसित हुँदा गुणादीवासीको भावनामा ठेस पुगेकामा क्षमायाचना गरेका छन् । 


नेता पौडेलले एकआपसमा सरसल्लाह गरेर समस्या समाधान खोज्न सम्बन्धित सबैमा आग्रह गरेका छन् । शुक्रबार दमौलीमा आयोजित कार्यक्रममा नेता पौडेलले गुणादीको पानीका विषयमा बोलेपछि स्थानीयवासीले त्यसबारेमा आपत्ति जनाउँदै दमौली आउने पानीको मुहान बन्द गरी दिएका छन् ।

पौडेलले जनताको स्वास्थ्य र जनताको हितविपरीत कुनै काम गर्नु राम्रो नभएको बताउँदै त्यसतर्फ ध्यान पुर्‍याउन आग्रह गरेका छन् । गुणादीका स्थानीयवासीले पानीको मुहान बन्द गरिदिएपछि दमौलीमा पानीको अभाव सुरु भएको छ ।

प्रकाशित : भाद्र २८, २०७९ १६:४७
पूरा पढ्नुहोस्
प्रतिक्रिया
पठाउनुहोस्
×