चिनी मिल चलाउन पहल
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
रौतहट — बर्सेनि घाटा बेहोर्नुपरेको भन्दै दुई वर्षदेखि बन्द रहेको गरुडा नगरपालिकास्थित श्रीराम सुगर मिल सञ्चालन गर्न पहल थालिएको छ । मिलको अवस्था बुझ्न संघीय संसद्को उद्योग तथा वाणिज्य र श्रम तथा उपभोक्ता हित समितिको टोली दुई दिनअघि रौतहट आएर फर्केको छ । टोली आएपछि मिल सञ्चालन हुने आशा पलाएको भन्दै स्थानीय किसान खुसी छन् । मिल बन्द हुँदा दुई दशकदेखि उखु खेती गर्दै आएका किसान र मिलमा काम गर्ने मजदुर मारमा परेका थिए ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![चिनी मिल चलाउन पहल](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2022/third-party/chini-meal-1372022042526-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
श्रम समितिका सदस्य एवं पूर्वश्रम तथा रोजगारमन्त्री रामेश्वरराय यादवको संयोजकत्वमा सरिताकुमारी गिरी, उमाशंकर अरगरिया र समितिका सचिवलगायतका पदाधिकारी रौतहट आएका हुन् । समितिले स्थानीय किसान, कर्मचारी युनियन, मजदुर संघका पदाधिकारीलगायतलाई भेटेको छ । मिल बन्द हुनुको कारण, किसानका समस्याबारे छलफल भएको उखु उत्पादक संघका अध्यक्ष अशोक यादवले बताए । ‘थोरै भए पनि मिल सञ्चालन हुने आशा पलाएको छ । हामी सहयोग गर्न तयार छौं,’ उनले भने । मिलका मेसिनरी सामान दिन प्रतिदिन खिया लाग्दै गएको छ ।
करोडौं घाटा बेहोर्नुपरेको र बाध्यात्मक परिस्थितिबाट व्यवस्थापन पक्षले ०७७ साउन १० देखि मिल बन्द गरेको हो । सञ्चालकले कर्मचारीहरूलाई न्यूनतम पारिश्रमिक दिनसमेत आर्थिक अभाव रहेको जनाएका थिए । मिलले अहिलेसम्म २ अर्ब १७ करोड ७५ लाख रुपैयाँ घाटा बेहोरेको जनाएको छ । संसदीय समितिका सदस्य यादवले छलफलपछि आफू उत्साहित भएको बताए । ‘किसानलगायत सबैको चाहना उद्योग सञ्चालन होस् भन्ने हो,’ उनल भने, ‘मिल बन्द भएको बारे सञ्चालकसँग छलफल गर्छौं । मिल सञ्चालन हुने वातावरण तयार पार्छौं ।’ २६ वर्षदेखि सञ्चालनमा रहेको चिनी मिल बन्द हुँदा सिजनल, रेगुलर र करार गरी ३२५ जना कर्मचारीको रोजगारी गुमेको थियो ।
मिल स्थापनाको केही वर्षसम्म मुनाफामा चलेको थियो । बारा, पर्सा, रौतहटका किसानको एक सिजनमा ३० लाख क्विन्टलसम्म उखु क्रसिङ गर्ने मिलको लक्ष्य थियो । तर पछिल्लो १० वर्षयता १५/२० लाख क्विन्टलभन्दा कम क्रसिङ गर्न थालेपछि घाटा सुरु भएको हो । २४ सैं घण्टा सञ्चालन हुनुपर्ने मिल विभिन्न कारणले बन्द
हुने पुगेको हो । मिल बन्द हुने वर्ष १३ दिन मात्र उखु क्रसिङ गरेको थियो । मिलले किसानलाई ०७१ सालदेखिको झन्डै ३५ करोडभन्दा बढी रकम भुक्तानी गरिसकेको छ । मिल स्थापना हुँदा जिल्लामा १२ हजार उखु किसान रहेकामा अहिले घटेर ५ हजार पुगेको संघले जनाएको छ । अहिले जिल्लामा बाबा वैद्यनाथ चिनी मिल सञ्चालनमा छ ।
![](https://assets-cdn.ekantipur.com/uploads/source/ads/900-x-100-0172024023126.gif)