सर्लाहीको जंगलमा शिशुको शव भेटियो

ईश्वरपुर नगरपालिका–१३ स्थित सागरनाथ जंगलमा अन्दाजी १७ महिनाको शिशु (छोरी) को शव फेला परेको प्रहरीले जनाएको छ ।

वस्तुभाउ चराउन जंगल गएका स्थानीयहरूले सोमबार साँझ घर फर्किने क्रममा गाडेको अवस्थामा शिशुको टाउको देखेपछि प्रहरीलाई खबर गरेका थिए ।

स्थानीयको खबर पाएलगत्तै घटनास्थल पुगेको इलाका प्रहरी कार्यालय केशरगन्जको प्रहरी टोलीले मुचुल्का गरी मृतक शिशुको शव पोष्टमार्टमका लागि प्रादेशिक अस्पताल मलंगवा पठाएको छ ।

शिशुको शव हेर्दा गत रातितिर हत्या गरी शव त्यहाँ गाडेको हुनसक्ने अनुमान गरिएको छ । घटनाको सम्बन्धमा अनुसन्धान सुरु गरिएको जिल्ला प्रहरी कार्यालयले जनाएको छ ।