निजी विद्यालयको शुल्कको विरोध- मधेस - कान्तिपुर समाचार

निजी विद्यालयको शुल्कको विरोध

चालु शैक्षिक सत्रमा मासिकदेखि अन्य शुल्क ५० प्रतिशतसम्म बढाएको आरोप
कान्तिपुर संवाददाता

पर्सा — वीरगन्जका निजी विद्यालयले आफूखुसी चर्को मासिक तथा वार्षिक शुल्क असुल्न थालेको भन्दै यहाँका अभिभावक संघर्षमा उत्रिएका छन् । उनीहरूले अभिभावक संघर्ष समिति गठन गरेर यसै सातादेखि आन्दोलन थालेका हुन् । 

समितिले शनिबार प्रमुख जिल्ला अधिकारी उमेश ढकाल र वीरगन्ज महानगर प्रमुख राजेशमान सिंहलाई ज्ञापनपत्र बुझाउने र घण्टाघरबाट विरोध र्‍याली निकाल्ने भएको छ । अभिभावक सन्दीप साहले वीरगन्जका नाम चलेका तथा धेरै विद्यार्थी पढ्ने निजी स्कुलले अभिभावकसँग कुनै छलफल नगरी चालु शैक्षिक सत्रदेखि मासिक शुल्क ५० प्रतिशतसम्म बढाएको आरोप लगाए ।

‘हामी अभिभावकलाई कुनै जानकारी र सरसल्लाह नै नगरी मासिक तथा अन्य शुल्क बढाइएको छ,’ उनले भने । पोसाक, किताब र अन्य सामग्रीमा कमिसनखोरी बढेको, बर्सेनि किताब परिवर्तन गर्ने प्रवृत्ति बढेको र धरौटी रकम फिर्ता नगर्ने गरेकाले बाध्य भएर संघर्षमा उत्रिनुपरेको उनले बताए ।

अर्का अभिभावक मनीष मिश्रले कोरोना महामारीपछिको आर्थिक मन्दीको अवस्थालाई बेवास्ता गर्दै निजी विद्यालयले शुल्क बढाएकोमा आपत्ती जनाए । ‘विद्यालय सेवामूलक संस्था हो । तर सेवालाई व्यापार बनाइएको छ,’ उनले भने, ‘विभिन्न बहाना बनाएर धेरैजसो निजी विद्यालयले आफूखुसी मनोमानी ढंगले ५० प्रतिशतसम्म वृद्धि हुने गरी शुल्क उठाइरहेका छन् ।’ निजी विद्यालयहरुले चर्को शुल्क लिइरहे पनि सम्बन्धित निकायले अनुगमनमा ध्यान नदिएको उनको आरोप छ ।

प्रमुख जिल्ला अधिकारी ढकालले सरोकारवाला पक्षलाई राखेर समस्या समाधानका लागि छलफल गर्ने बताए । ‘अभिभावकको लिखित गुनासो आएको छ,’ उनले भने, ‘यस सम्बन्धमा सरोकारवाला सबै पक्षलाई राखेर छलफल गरी निकास दिने प्रयास जारी छ ।’ वीरगन्जका प्रमुख सिंहले आफूले महानगरपालिकाको कार्यालयमा एक/दुई दिनभित्रै शिक्षालगायतका समिति गठन गर्न लागेको र समितिले गर्ने निर्णय लागू गरिने बताए । उनले भने, ‘शिक्षा समितिले जे निर्णय गर्नेछ, विद्यालयको हकमा त्यही लागू हुनेछ, त्यसपछि अभिभावकको माग पनि सम्बोधन हुन्छ ।’

प्रकाशित : असार १८, २०७९ १२:५३
प्रतिक्रिया
पठाउनुहोस्

बेनी–जोमसोम सडक अवरुद्ध

रासस

म्याग्दी — म्याग्दीको उत्तरी क्षेत्र हुँदै हिमालपारीको जिल्ला मुस्ताङलाई राष्ट्रिय राजमार्गसँग जोड्ने बेनी–जोमसोम सडक शनिबार बिहानदेखि अवरुद्ध भएको छ ।

म्याग्दी र मुस्ताङको सिमानामा पर्ने काभ्रेभिरमा गए राती पहिरो खसेपछि ७६ किलोमिटर दूरीको बेनी–जोमसोम सडकमा यातायात सेवा बन्द भएको हो । बेनी–जोमसोम–कोरला सडक आयोजनाका सुपरभाइजर ईन्द्रसिंह शेरचनले सडकको बिचमा ठुलो ढुङ्गा खसेर अवरोध भएको बताए । 'सडक खुलाउने काम भइरहेको छ,' उनले भने ।

सडक स्तरोन्नतिको ठेकेदार कम्पनी शर्मा–गजुरमुखीको डोजर परिचालन गरेपनि सफल नभएपछि विस्फोटक पदार्थको प्रयोग गरेर ढुङ्गा फुटाउन सडक आयोजनामार्फत जिल्ला प्रशासन कार्यालयमा प्रस्ताव गरिएको छ । नेपाली सेनाको टोलीलाई विस्फोटक पदार्थको प्रयोग गरेर ढुङ्गा फुटाई सडक खुलाउन काभ्रेभीर पठाइएको जिल्ला प्रशासन कार्यालयले जनाएको छ । सडक अवरुद्ध हुँदा बेनीबाट मुस्ताङतर्फ र मुस्ताङबाट म्याग्दीतर्फ आउने जाने सवारीसाधन बीच सडकमा रोकिएका छन् ।

अत्यावश्यक कामले गन्तव्यमा पुग्नुपर्ने सवारीसाधन परिवर्तन गरेर यात्रा गर्न बाध्य छन् । स्थानीयवासी, मुस्ताङ घुम्ने पर्यटक र मुक्तिनाथ दर्शनका लागि आउने र जाने भक्तजनलाई समस्या भएको छ ।

प्रकाशित : असार १८, २०७९ १२:५२
पूरा पढ्नुहोस्
प्रतिक्रिया
पठाउनुहोस्
×