१४ महिनापछि परिवार भेटिँदा...- मधेस - कान्तिपुर समाचार

१४ महिनापछि परिवार भेटिँदा...

मानव सेवा आश्रममा आश्रित बिहार दरभंगाकी रीना देवीको पारिवारिक पुनर्मिलन
शंकर आचार्य

पर्सा — वीरगन्जस्थित मानव सेवा आश्रममा ९ महिनादेखि आश्रित ३२ वर्षीया रीना देवीको आँखा बिहीबार सबेरैदेखि आश्रमको मूल गेटतिर सोझिएको थियो । नजाओस् पनि किन ? १४ महिनापछि परिवारजनसंग भेट्ने अवसर जो उनलाई मिल्दै थियो ।

बिहान करिब ७ बजेतिर भारत बिहारको दरभंगा जिल्ला बरना पञ्चायत कुशेश्वर थाना वडा–३ बाट उनका श्रीमान् रवीन्द्र मुखिया, १० वर्षीय छोरा शिवम् र ७ वर्षीया छोरी शिवानी आश्रम आइपुगे । श्रीमान् र छोरा–छोरीलाई देखेपछि रीनाको मन थामिएन । उनको भक्कानो छुट्यो । आमालाई अँगालो हालेर शिवम् र शिवानी पनि रुन थाले । खुसीको आँसुले आँखा रसाएका रवीन्द्रले आफ्नो र बालबच्चाका आँसु पनि पालैपालो पुछ्न थाले ।

अचानक बेपत्ता भई फेरि भेटिने आशा मारिसकेकी श्रीमती रीनालाई भेटेपछि रवीन्द्रमा खुसीको सीमा थिएन । ‘मैले त यो जुनीमा उनलाई फेरि पनि भेट्छु भनेर माया मारिसकेको थिए । उनलाई भारतको दरभंगा, समस्तीपुरसम्म पुगेर खोजेको थिएँ,’ उनले भने, ‘अहिले भेट्दा सपनाजस्तो लागेको छ । भगवानले मलाई पत्नी र छोराछोरीलाई सकुशल आमासित भेटाइदिए । म मेरो खुसी शब्दमा बयान गर्न सक्दिनँ ।’

बिहीबारै पहिलो पटक अनुहार देखेका ९ महिने छोरा उज्ज्वललाई बोकेर उनले धेरैबेरसम्म म्वाइँ खाइरहे । रीनाले पनि

जेठो छोरा शिवम् र छोरी शिवानीलाई धेरै बेर सुमसुम्याइरहिन् । दिदी लिन भिनाजु र भान्जाभान्जीसँगै आएका रीनाका भाइ इन्द्रजितलाई अँगालो हालेर रीना धेरै बेरसम्म रोइन् ।

चलचित्रको कथाजस्तै लाग्ने पारिवारिक पुनर्मिलनको यो दृश्य आश्रममा आश्रय लिइरहेका अन्यका लागि पनि नौलो थियो । रीनालाई मानव सेवा आश्रम वीरगन्जका अभिभावक एवम् सामाजिक अभियन्ता प्रकाश थारूसहितको टोलीले २०७८ असोज १२ मा धनुषाको धारापानी गाउँपालिका–९ स्थित जंगलमा बेवारिसे अवस्थामा फेला पारेको थियो । मानसिक अवस्था ठीक नभएकी गर्भवती रीनालाई त्यसै दिन वीरगन्जस्थित प्रभु अस्पतालमा भर्ना गरिएको थियो । अस्पतालकी डा. लक्ष्मी थापा र मनोचिकित्सक भरत गोइतको निगरानीमा रीनाले त्यसै दिन अस्पतालमा छोरालाई जन्म दिएकी थिइन् । आश्रमले बालकको नाम उज्ज्वल मानव राखिदिएको थियो ।

रवीन्द्रका अनुसार रीनाको मानसिक अवस्था एक दशकअघिदेखि नै ठीक थिएन । उनको औषधोपचार चल्दै थियो । तर, नियमित औषधि नखाइदिने बानीले उनी पूर्णरुपले स्वस्थ्य हुन सकेकी थिइनन् । यसअघि पनि घरबाट बिनाखबर हिँडिदिने बानी भए पनि श्रीमतीलाई भेटेर घर फर्काएर ल्याउने गरेकोमा यसपटक भने असफल भएको उनले बताए । ‘मानसिक अवस्था ठीक नभएकी र गर्भवती पत्नी बेपत्ता भएपछि म धेरै चिन्तित थिए,’ उनले भने, ‘मेरो घरबाट नेपाल बोर्डर करिब १ सय ७२ किमि टाढा पर्छ, उनी हिँड्दै नेपाल आइपुगिन् होला भनेर सोचेकै थिइनँ ।’

आश्रमका अभिभावक थारूले रीनाको उनको परिवारसँग पुनर्मिलन सामाजिक सञ्जालका माध्यमबाट भएको बताए । ‘मैले रीनाको तस्बिरसहित उनी आश्रममा आश्रित रहेको स्टाटस फेसबुकमा राखेको थिएँ,’ उनले भने, ‘त्यसपछि एक जना अपरिचितले आफूले रीनालाई चिनेको भन्दै उनको ठेगाना र गाउँको मुखियाको सम्पर्क नम्बर पनि दिए । मैले मुखियाजीलाई फोन गरें । उनैले रवीन्द्रसँग कुरा गराइदिएका हुन् ।’

रीनालाई श्रीमान् रवीन्द्रले बिहीबारै घर लगेका छन् । आश्रमका केन्द्रीय सदस्य एवम् वीरगन्ज शाखा प्रमुख देवेश मानव सेवाले रीना औषधोपचारपछि पूर्णरूपले स्वस्थ्य भइसकेको बताए । २०७४ जेठ १५ यता आश्रममा आश्रित ५६ जनाको पारिवारिक पुनर्मिलन गराइसकेको उनले बताए । तीमध्ये भारतीय र बंगलादेशी नागरिक पनि छन् । यस अवधिमा आश्रममा सडकबाट उद्धार गरी १ सय ५६ जनालाई ल्याइएकोमा १८ जनाको मृत्यु भइसकेको छ । ४७ जना स्वेच्छाले घर गएका थिए ।

प्रकाशित : असार १७, २०७९ १७:१२
प्रतिक्रिया
पठाउनुहोस्

बढी सामाजिक सुरक्षा भत्ता बाँड्दा राष्ट्रले धान्नै नसक्ने अवस्था आउन सक्छ : सिलवाल

'भत्ता दिएर अल्छी बनाएर राख्ने कि आर्जन गर्नका लागि राज्यले प्रेरित गर्ने'
कान्तिपुर संवाददाता

काठमाडौँ — नेकपा (एमाले) का सांसद नवराज सिलवालले लोकप्रियताका लागि बढी सामाजिक सुरक्षा भत्ता बाँड्दा राष्ट्रले धान्न नसक्ने अवस्था सक्ने बताएका छन् ।


शुक्रबार प्रतिनिधिसभाअन्तर्गतको राज्य व्यवस्था तथा सुशासन समितिको बैठकमा ‘सामाजिक सुरक्षा ऐन, २०७५ लाई संशोधन गर्न बनेको विधेयकमाथिको छलफल’मा सांसद सिलवालले श्रम गर्नसक्ने एकल महिलाहरुलाई भत्ता दिनुभन्दा आयआर्जनका काममा लाग्न राज्यले प्रेरित गर्नुपर्ने बताए ।

कुनै श्रममा तथा आयआर्जनमा नजोडिएका एकल महिलालाई मात्र भत्ता दिनुपर्ने उनको धारणा थियो । ‘जो सक्षम छ । जो एकल छ, ऊ कमाउँछ । श्रम गर्नसक्छ । पढेको छ । उसलाई भत्ता दिएर अल्छी बनाएर राख्ने कि आर्जन गर्नका लागि, अवसरको लागि पनि प्रेरित गर्ने राज्यले । सक्षम, योग्य छ भने उसले भत्तामा बस्ने होइन कि काम गर्न थाल्ने । त्यस्ता खालकामहिलाहरु अन्य कुनै श्रमको, आयआर्जन सँग नजोडिएको अवस्थाको भनेर लेखौँ ,’उनले भने ।

प्रकाशित : असार १७, २०७९ १७:१२
पूरा पढ्नुहोस्
प्रतिक्रिया
पठाउनुहोस्
x
×