पर्साका युवाको हत्या आरोपमा थप ३ पक्राउ  - मधेस - कान्तिपुर समाचार
कान्तिपुर वेबसाईट
AdvertisementAdvertisement

पर्साका युवाको हत्या आरोपमा थप ३ पक्राउ  

शंकर आचार्य

पर्सा — ठोरी गाउँपालिका–५ ठूलो बाघमोर्चाका २३ वर्षीय प्रवीण पाख्रिनको हत्या आरोपी ३ जनालाई प्रहरीले पक्राउ गरेको छ । उनीहरुलाई काठमाडौं महानगरपालिका–३ महाराजगन्जबाट पक्राउ गरी ल्याइएको हो ।

जिल्ला प्रहरी कार्यालयका प्रवक्ता डिएसपी ओमप्रकाश खनालका अनुसार पक्राउ पर्नेहरुमा ठोरी–५ बाघमोर्चाका २३ वर्षीय सरोज स्याङ्बो, वीरगन्ज महानगरपालिका – ३२ रामवनका २० वर्षीय किशन लोप्चन र १७ वर्षीय किशोर छन् ।

पाख्रिनलाई शुक्रबार साँझ ४ बजेर ४५ मिनेटमा ठोरी–५ स्थित बाघमोर्चा मन्दिरको छेउमा पक्राउ गरी युवाहरुको समूहले ढुंगाले टाउको र अनुहारमा प्रहार गरी अचेत बनाई फरार भएको प्रहरीको अनुसन्धानमा खुलेको छ । उनको वीरगन्जस्थित एलएस न्यूरो हस्पिटलमा आइतबार बिहान ११ बजे उपचारको क्रममा मृत्यु भएको थियो । उक्त घटनाको अनुसन्धानको क्रममा प्रहरीले स्थानीय एक १७ वर्षीय किशोरलाई शनिबार नै नियन्त्रणमा लिई ज्यानसम्बन्धी कसूरमा अनुसन्धान गरिरहेको थियो ।

घटनाबारे हालसम्मको अनुसन्धानले मृतक र आरोपीहरु सबै साथी भाइ रहेको र घटनाको दिन उनीहरुबीच झैझगडा भएपछि तत्कालै आक्रोशमा पाख्रिनको हत्या गरेको पत्ता लगाएको छ ।

प्रकाशित : जेष्ठ १०, २०७९ १५:५२
प्रतिक्रिया
पठाउनुहोस्

नवौं राष्ट्रिय खेलकुद सर्‍यो

‘सबै पक्षको सल्लाहमा नवौं राष्ट्रिय खेलकुद प्रतियोगिता सार्ने निर्णय भएको हो’
कान्तिपुर संवाददाता

काठमाडौँ — गण्डकी प्रदेशमा हुने नवौं राष्ट्रिय खेलकुद चार महिना पछाडि सरेर असोज–कात्तिकमा हुने भएको छ । राष्ट्रिय खेलकुद परिषद्को सिफारिसमा मन्त्रिपरिषद् बैठकले मंगलबार यो निर्णय गरेको हो । त्यसअनुसार अब असोज २८ देखि कात्तिक ३ सम्म नेपाली खेलकुदको सबैभन्दा ठूलो खेल महोत्सव हुनेछ । 

यसअघि प्रतियोगिता जेठ २२ देखि २८ सम्म हुने तय भएको थियो । युवा तथा खेलकुदमन्त्री महेश्वरजंग गहतराजले मंगलबार पत्रकार सम्मेलन गर्दै सबै पक्षको सल्लाहमा प्रतियोगिता सार्ने निर्णय भएको जानकारी गराए । उनले भने, ‘अब हामीसँग प्रतियोगिता आयोजनाका लागि पर्याप्त समय छ । त्यसैले यसअघिका प्रतियोगितामा भएका सबै कमीकमजोरी सच्याएर सफल आयोजना गर्नेछौं ।’

उनले थपे, ‘बजेट कार्यान्वयन अवधि पनि पुगेन । हामीले फास्ट ट्र्याकमा बजेट ल्याउने योजना बनाएका थियौं, त्यो भएन । स्थानीय निर्वाचनले गर्दा पनि सबै तयारी पुगेन । आयोजक गण्डकी प्रदेशले पनि तयारी नपुगेको बतायो । अब मौसम, शैक्षिक कार्यक्रम, सांस्कृतिक चाडपर्व सबै मिल्ने गरेर नयाँ मिति तय गरेका छौं ।’ प्रतियोगिता पछाडि सरे पनि यसलाई लिएर पूर्वनिर्धारित कार्यक्रम भने त्यसैअनुसार सञ्चालन हुनेछ । नवौं राष्ट्रिय खेलकुद चीनमा हुने १९ औं एसियाली खेलकुदको छनोट र तयारी पनि रहेको छ । एसियाली खेलकुद स्वयं पछाडि सरेको स्थितिमा राष्ट्रिय खेलकुद पनि पछाडि सरेको हो । प्रतियोगितामा ३६ खेल समावेश हुनेछन् ।

समावेश खेलमा एथलेटिक्स, ब्याडमिन्टन, टेबलटेनिस, क्रिकेट, फुटबल, टेनिस, हक्की, बक्सिङ, भलिबल, जिम्न्यास्टिक, कबड्डी, भारोत्तोलन, सुटिङ, पौडी, ह्यान्डबल, जुडो, कुस्ती, सफ्ट टेनिस, स्क्वास, तेक्वान्दो, उसु, बास्केटबल, शारीरिक सुगठन, चेस, खोखो, कराते, आईटीएफ तेक्वान्दो,सेपाकटाक्रो, गल्फ, फुल कन्ट्यान्ट कराते, आर्चरी, फेन्सिङ, साइक्लिङ, ट्रायथलन, रग्बी र प्याराग्लाइडिङ रहेको छ । रग्बी पहिलो पटक समावेश गरिएको हो । दुई परम्परागत ठेलो र क्यानोइङलाई प्रदर्शनी खेलका रूपमा राखिएको छ ।

राष्ट्रिय खेलकुद परिषद्का सदस्य–सचिव टंकलाल घिसिङले नवौं राष्ट्रिय खेलकुदको तयारीसम्बन्धी राखेपको ११२ औं बोर्ड बैठक बसी निर्देशिका तथा बजेटको प्रकृया अगाडि बढाएको जनाउँदै लोगो, मस्कट र नारा सार्वजनिक भइसकेको बताए । उनले टिम छनोटका लागि सबै प्रदेश र संघहरूलाई पत्राचार भइसकेको बताए ।

प्रकाशित : जेष्ठ १०, २०७९ १५:४७
पूरा पढ्नुहोस्
प्रतिक्रिया
पठाउनुहोस्
×