‘जिउँदो सहिद’ का गुनासै गुनासा- मधेस - कान्तिपुर समाचार

‘जिउँदो सहिद’ का गुनासै गुनासा

मधेस आन्दोलनका क्रममा ७ वर्षअघि शरीरमा गोली लागेपछि मुन्सी पटेल
शंकर आचार्य

पर्सा — ओछ्यानमै थलिए । वीरगन्ज– २८ बगही घर भएका ३६ वर्षीय पटेल राजनीतिक दलका नेतृत्वसँग भने पटक्कै खुसी छैनन् । ‘जिउँदो सहिद’ का रुपमा परिचित उनको गुनासो छ, नेतृत्वले सहिदका परिवारजनलाई बिर्सिए ।


स्थानीय तहको निर्वाचन नजिकिएपछि भोट माग्न विभिन्न दलका उम्मेदवारहरू उनको छाप्रोमा धाउन थालेका छन् । आन्दोलनको बलमा भएका परिवर्तनहरू संस्थागत नभएको र आफूजस्ता जिउँदो सहिद तथा सहिदका परिवारजनलाई बिर्सिएको उनले गुनासो गर्ने गरेका छन् । ‘हामीलाई जिउँदो सहिद उपमा दिइएको छ, तर कस्तो पीडा भोगिरहेका छौं, सुनिदिने कोही भएन,’ पटेल भन्छन्, ‘चुनाव आएपछि सबै भोट माग्न आउँछन्, तर हाम्रा लागि बोलिदिने कोही भएन ।’ उनले आफूलाई बासको समस्या भएको बताए ।

वीरगन्ज–२२ मनियारी घर भएका ४० वर्षीय उपेन्द्रप्रसाद यादव पनि ‘जिउँदो सहिद’ हुन् । २०७२ भदौ १५ मा प्रहरीले चलाएको गोली उनको देब्रे खुट्टामा लागेको थियो । देब्रे खुट्टाको भर छैन । ४ छोराछोरीका अभिभावक उनी अहिले परिवार पाल्न कुखुराको चल्ला बेच्ने गर्छन् । ‘अहिले भोट माग्न आउनेहरू थुप्रै आश्वासन र सपना देखाएर फकाउन खोज्दै छन्,’ उनले भने, ‘खुट्टामा हालेको २ वटा रड पैसा नभएर झिक्न पाएको छैन, घर भत्किएर बस्ने लायक रहेन, मेरो पीडा कसले बुझिदिने त ?’

सखुवाप्रसौनी–५ घर भएका ३८ वर्षीय पन्नालाल यादव अर्का जिउँदो सहिद हुन् । २०७२ भदौ १४ मा मधेस आन्दोलनकै क्रममा प्रहरीले चलाएको गोली उनको दाहिने खुट्टाको घुँडामा लाग्यो । करिब ५ वर्ष थला परे । अहिले जसोतसो हिँड्न सक्ने भएका छन् । उपचारमा उनले व्यक्तिगत ५५ लाख रुपैयाँ खर्च गरेको बताए । गत स्थानीय निर्वाचनमै उनले वडाध्यक्षको पदमा उम्मेदवारी दिन चाहेका थिए । तर पार्टीबाट टिकट पाएनन् । यस वर्ष पनि टिकट नपाएको बताए । ‘म जनप्रतिनिधि बनेर जनताको सेवा गर्न चाहन्थे, तर मलाई कहिल्यै अवसर दिइए्,’ उनले भने, ‘भन्नलाई जिउँदो सहिद भनिन्छ, अवसर पाइँदैन ।’

प्रकाशित : वैशाख २६, २०७९ ११:३४
प्रतिक्रिया
पठाउनुहोस्

निर्वाचन नजिकिँदा पर्सामा अपराध र उजुरी घट्दै

शंकर आचार्य

पर्सा — प्राय भीडभाड भइरहने जिल्ला प्रहरी कार्यालय र मातहतका प्रहरी इकाइहरुमा पहिले जस्तो भीडभाड र चहलपहल छैन । व्यक्तिगत तथा सामूहिक रुपमा उजुरी लिएर आउनेहरुको संख्या पनि घटेको छ ।

अपराधको दर कम भएको छ भने अपराध गरेर हिरासतमा पर्नेहरुको संख्या पनि घट्दो मात्रामा रहेको जिल्ला प्रहरी कार्यालयले जनाएको छ ।

जिल्ला प्रहरी कार्यालयका प्रवक्ता डीएसपी ओमप्रकाश खनालका अनुसार स्थानीय तहको चुनाव नजिकिँदै गर्दा अपराध र अपराधीसँग जोडिएका अनौठो खाले प्रवृत्ति देखिएको छ ।

‘हाम्रो बिगतको पनि अनुभवले यस्तै देखाउँछ, देशमा जब जब निर्वाचनको माहोल बन्दै र निर्वाचन नजिकिँदै जान्छ, साबिकको भन्दा अपराध घट्ने र उजुरबाजुर गर्ने प्रवृत्ति पनि घटेर जान्छ,’ डीएसपी खनालले भने, ‘यसपटक पनि त्यस्तै प्रवृत्ति दोहोरिएको हुनु पर्छ । जिल्ला प्रहरी र मातहतका इकाइहरुमा भीडभाड घट्दो क्रममा छ ।’

पछिल्ला दिनहरुमा जग्गा जमिन, साँध सिमाना, रिसइबी राखेर कुटपिट गरेको, घर निर्माण गर्दाको विवाद भएर पर्ने उजुरीको संख्या करिब ७५ प्रतिशतले घटेको उनले बताए ।

यस बाहेक ज्यान मार्ने उद्योग, सार्वजनिक अपराध, बैंकिङ कसुरका अपराध जस्ता दैनिकजसो भइरहने अपराधको संख्या पनि घटेको उनले बताए ।

जिल्ला प्रहरी कार्यालय र यसको मातहतका जिल्लाभरका इकाइहरुमा रहेका हिरासतमा नयाँ थुनुवा थपिने क्रम पनि घटेको उनले बताए ।

‘सामान्यत: जिल्ला प्रहरी कार्यालय र यस मातहतका इकाइहरुको हिरासतमा दैनिक १ सय ५० जनासम्म थुनुवा हुने गरेकोमा हाल भने यो संख्या घटेर १ सयको हाराहारीमा झरेको छ,’ उनले भने, ‘उजुरबाजुर र सबैखाले अपराधको दर घटेपछि स्वभाविक रुपमा थुनुवाको संख्या पनि कम हुने हो ।’

गाउँघरमा निर्वाचन नजिकिएसँगै धेरै सर्वसाधारणहरु विभिन्न उम्मेदवारको पक्षमा लागेर प्रचार प्रसारमा संलग्न भएको तथा उनीहरुलाई उजुरबाजुर गर्न सहजिकरण गरी दिने व्यक्तिहरु पनि चुनावमै व्यस्त भएको हुनाले उजुरबाजुर गर्न आउने प्रवृत्ति घटेको हुनसक्ने उनको आकलन छ। ‘केहीले आफ्ना व्यक्तिगत समस्याहरुको सम्बन्धमा निर्वाचनपछि उजुरबाजुर गर्ने सोच बनाएको हुनसक्छ,’ खनालले भने, ‘निर्वाचनपछि ह्वात्तै उजुरबाजुरको क्रम बढन सक्छ ।’

प्रकाशित : वैशाख २५, २०७९ १६:२६
पूरा पढ्नुहोस्
प्रतिक्रिया
पठाउनुहोस्
×