भारतीय ग्राहक आउन थालेपछि बढे होटल- मधेस - कान्तिपुर समाचार

भारतीय ग्राहक आउन थालेपछि बढे होटल

दशगजानजिकै राजमार्ग क्षेत्रमा दर्जनभन्दा बढी सुविधासम्पन्न होटल
भरत जर्घा मगर

सिरहा — भारतीय सीमासँग जोडिएको हुलाकी राजमार्गअन्तर्गत सिरहाको ठाडीदेखि सन्हैठासम्म एक सयभन्दा बढी साना–ठूला होटल खुलेका छन् । यसअघि यस राजमार्ग क्षेत्रमा सामान्य चिया–नास्ता पसलबाहेक ठूला होटल थिएनन् । दशगजानजिकै राजमार्ग क्षेत्रमा खुलेका होटलका ग्राहक भने भारतीय नागरिक हुन् । 

भगवानपुर गाउँपालिका–४ स्थित दशगजाको ५० मिटर आसपासमा १८ भन्दा बढी होटल खुलेका छन् । ती होटलमा अधिकांश भारतीय ग्राहक हुन्छन् । दिनभर सुनसान हुने होटल साँझ परेसँगै भरिभराउ हुन्छन् । बिहार सरकारले ६ वर्षअघि मदिरा बिक्रीवितरणमा रोक लगाएपछि मदिरा सेवनको उपयुक्त थलो यतातिर होटल बनेका हुन् । सीमा क्षेत्रका नेपालतर्फ खुलेका होटलहरूमा उताबाट आउने ग्राहकबाट राम्रो आम्दानी हुन थालेको बताउँछन् ठाडीका होटल व्यवसायी कैलाश साह ।

‘६ वर्षअघिसम्म यस क्षेत्रमा खाजा खानेसमेत राम्रा होटल थिएनन्’ उनले भने, ‘यताका ग्राहकले मात्र होटल व्यवसाय चल्दैन्थ्यो,’ उनी भन्छन्, ‘जब भारतमा मदिरामा कडाइ भएपछि मदिरा सेवन गर्न र बसोबास गर्न भारतीय ग्राहकहरू यता आउन थाले, जसले गर्दा भारतीय रुपैयाँ नेपाल भित्रिन थाल्यो भने आयआर्जन पनि बढ्यो ।’

व्यवसायीहरूका अनुसार भारतीय सीमा नाका ठाडीदेखि, बरियारपट्टी, गणेशपुर, कमलपुर, औरही सहित सन्हैठासम्म दुई दर्जन स्थानमा पछिल्लो पटक सयभन्दा बढी होटलहरू खुलेका छन् । त्यहाँ दुई सयभन्दा बढीले रोजगारीसमेत पाएका छन् । जसले गर्दा वैदेशिक रोजगारीमा जाने केही युवाले घर पायक रोजगारी पाएको उनले सुनाए । हुलाकी राजमार्गअन्तर्गत बरियारपट्टीमा सामान्य चिया, खाजाको होटल सञ्चालन गर्दै आएका कृष्णा साहले होटललाई स्तरोन्नति गरेर व्यवस्थित बनाएका छन् । उनको होटलमा रेस्टुरेन्टसहित सुविधा छ । ‘नेपाली ग्राहकसँगै पछिल्लो पटक भारतीय ग्राहक आउन थालेपछि होटललाई स्तरोन्नति गरे,’ उनले भने ।

भारतीय ग्राहककै कारण दैनिक ४० हजार रुपैयाँसम्मको बिक्री बढेको उनले बताए । ‘हाम्रो आम्दानीको स्रोत भनेकैं भारतीय ग्राहक हुन,’ उनले भने, ‘भारतीय ग्राहककै कारण होटल व्यवसाय फस्टाएको छ ।’ उनले होटलमा १० जनाभन्दा बढीलाई रोजगारी दिएका छन् । हुलाकी राजमार्ग बीच भागमा परेको औरही गाउँपालिकाका अध्यक्ष सिदार्थ दास यादवले औरही क्षेत्रमा मात्र एक दर्जन भन्दा बढी होटल र रेस्टुरेन्ट खुलेको बताए ।

‘पहिला चिया र तराईमा प्रचलित समोसा तरकारी खाजामात्र पाइने सामान्य होटलहरू थिए,’ उनले भने, ‘एकातिर हुलाकी राजमार्गको विस्तार र अर्कोतर्फ भारतीय ग्राहकका कारण सुविधा सम्पन्न होटलहरू खुल्न थालेका छन् ।’ होटलहरूमा युवा पुस्ताले धमाधम लगानी गर्न थालेको र भारतीय ग्राहकले यस व्यवसायमा थप ऊर्जा थपेको उनले सुनाए । ‘यताकाहरू सीमापारि गएर दैनिक आवश्यक वस्तु किनेर व्यापार बढाइदिन्छन् भने अहिले सीमापारिका ग्राहकहरू आएर यताको व्यापार बढाइदिएका छन्,’ उनले भने, ‘अहिले दोहोरो व्यवसाय चलेको छ, जसले गर्दा भारतीय रुपैयाँ पनि नेपाल भित्रिएको छ, आम्दानी बढेको छ ।’

होटल तथा मदिरा व्यवसायी संघ सिरहाका संस्थापक अध्यक्ष रवीन्द्र श्रेष्ठ सीमा क्षेत्रमा होटल र रेस्टुरेन्ट खुल्ने क्रम बढेको बताउँछन् । ‘पहिला सीमा क्षेत्रमा खाना खाने होटलहरू थिएनन्,’ उनले भने, ‘अहिले त्यस क्षेत्रमा होटल खोल्ने होडबाजी नै चलेको छ, यसले पनि होटल व्यवसाय फस्टाएको छ ।’ संघका अनुसार जिल्लामा १२ सय होटल दर्ता छन् । ती होटलहरूमा २० हजारभन्दा बढी युवाले रोजगारी पाएका छन् । सगरमाथा डिलर एसोसिएसनका पूर्वाञ्चल उपाध्यक्ष प्रदीप गुप्ता सीमा क्षेत्रमा खुलेका होटलहरूमा मदिराको कारोबार बढेको बताउँछन् । भारतीय ग्राहक बढेपछि मदिरा खपत वृद्धि भएको उनको भनाइ छ ।

सीमा क्षेत्रका नेपालतर्फ खुलेका होटलहरूमा उताबाट आउने ग्राहकले मदिरा सेवनपछि अभद्र व्यवहारका कारण सुरक्षा चुनौती बढेको स्थानीयको गुनासो छ । ‘यताका होटलमा साँझ पर्नासाथ समूह बाँधेरै बिहारबाट आउनेको घुइँचो लाग्छ, भारतीय ग्राहकले होटल भरिभराउ हुन्छ,’ स्थानीय कन्हैया भट्टले भने, ‘मदिरामा लठिएर होहल्ला गर्ने र अश्लील शब्द प्रयोग गर्दा स्थानीय त्रासमा बस्न बाध्य छन् ।’ भगवानपुर गाउँपालिका–२ का श्रीचन पासवानले लागूऔषधसँगै मदिरा तस्करीमा बालकहरूको प्रयोग भइरहेको बताए ।

प्रकाशित : वैशाख १९, २०७९ ०८:४२
प्रतिक्रिया
पठाउनुहोस्

गाउँपालिकाको ३४ लाख हिनामिना

रकम हिनामिना गर्न गाउँपालिका अध्यक्ष जागेश्वर यादवको समेत मिलेमतो
भरत जर्घा मगर

सिरहा — सिरहाको विष्णुपुर गाउँपालिकाका प्रशासन शाखाका कर्मचारीले ३४ लाख रुपैयाँभन्दा बढी राजस्व खातामा दाखिला नगरी हिनामिना गरेको पाइएको छ । गाउँपालिकाका प्रशासन शाखाका नायब सुब्बा महेन्द्रप्रसाद यादवले आर्थिक वर्ष २०७७/७८ मा गाउँपालिकाको लेखा शाखामा विभिन्न शीर्षकमा सेवाग्राहीबाट राजस्वबापत संकलित ५५ लाख २७ हजार ७७ रुपैयाँमध्ये ३४ लाख २३ हजार ७ सय ९० रुपैयाँ हिनामिना गरेका हुन् । रकम हिनामिना गर्न गाउँपालिका अध्यक्ष जागेश्वर यादवको समेत मिलेमतो देखिएको छ ।

प्रमुख प्रशासकीय अधिकृत दीपकुमार यादवले स्थानीय तह आय लेखांकन प्रणाली सफ्टवेयरमार्फत २०७७ साउन १ देखि २०७८ असार ३१ गतेसम्म एक वर्ष अवधिमा संकलन भएको रकम नायब सुब्बा बैंक दाखिला नगरी अन्यत्र चलाएको पाइएको जानकारी दिए । राजस्व रकम बैंक दाखिला गरेको नदेखिएपछि आर्थिक कार्यविधि तथा वित्तीय उत्तरदायित्व ऐन, २०७६ बमोजिम हिनामिना रकमको २५ प्रतिशतले हुन आउने ८ लाख ५५ हजार ९ सय ४७ रुपैयाँ ५० पैसा जरिवानासहित ४२ लाख ७९ हजार ३ सय ३७ रुपैयाँ ५० पैसा बैंकमा दाखिला गर्न १५ चैतमा पत्र काटिएको जानकारी दिए ।

राजस्वको रकम खातामा जम्मा गर्न ताकेतासहितको पत्र काटेको १४ दिन बितिसक्दा पनि खातामा अझै रकम जम्मा नभएको प्रमुख प्रशासकीय अधिकृत यादवले बताए । गाउँपालिकाले सम्पूर्ण आर्थिक कारोबार विष्णुपुरस्थित मेगा बैंकको शाखाबाट गर्दै आएको छ । नासु यादवले राजस्व रकम गाउँपालिकाको आन्तरिक राजस्व खातामा दाखिला नगरी गाउँपालिका अध्यक्ष जागेश्वर यादवले भनेअनुसार गर्दा गल्ती भएको स्विकारेका छन् ।

‘गाउँपालिका अध्यक्षले मुद्दामामिलामा खर्च चाहिएको छ, पछि मिलाउँला भनेपछि विश्वासमा परेर दिँदै गए, अहिले म अप्ठ्यारोमा परें,’ नासु यादवले भने, ‘कानुनी रूपले मेरो गल्ती देखिएकाले चैत मसान्तसम्म गाउँपालिकाको राजस्व खातामा जम्मा गर्छु ।’

विष्णुपुर गाउँपालिकाका अध्यक्ष यादवले राजस्व हिनामिना काण्डमा आफूलाई बदनाम गर्ने योजनासहित कर्मचारीहरूले मेरो नाम मुछेको बताएका छन् । राजस्व हिनामिनाको विषयमा तत्कालीन राजस्व प्रमुख नायब सुब्बा महेन्द्रप्रसाद यादवले मलाई बदनाम गर्ने नियतले नाम मुछेको उनको आरोप छ ।

अध्यक्ष यादवले तत्कालीन प्रमुख प्रशासकीय अधिकृत रवीन्द्रकुमार महत र राजस्व प्रमुख यादवले योजनाबद्ध तरिकाले मलाई बदनाम गरिरहेको बताए । ‘मैले नियमित रूपमा राजस्व रकम जम्मा नभएको जानकारी पाएदेखि नै ताकेता गर्न प्रशासकीय अधिकृत महतलाई निर्देशन दिए पनि उनले तत्परता देखाएनन्,’ उनले भने, ‘पछि महालेखाले समेत ताकेता गर्नुपर्ने अवस्था आयो, अहिले मलाई बदनाम गर्ने कोसिस भइरहेको छ ।’

महत २०७७ भदौ २४ देखि २०७८ फागुन २९ सम्म प्रमुख प्रशासकीय अधिकृतको जिम्मेवारीमा थिए । महतले यस अवधिमा एक पटक २०७८ भदौ ४ गते आन्तरिक राजस्व रकम बैंकमा दाखिला गर्न यादवको नाममा पत्र काटेका थिए । उनले सोही पालिकाको शिक्षा शाखा प्रमुखका रूपमा कार्यरत दीपकुमार यादवलाई २०७८ फागुन ३० गते प्रमुख प्रशासकीय अधिकृतको जिम्मेवारी दिएका थिए ।

गाउँपालिका यादवले नियमित राजस्व जम्मा नभएपछि पटकपटक प्रशासकीय अधिकृत महतलाई निर्देशन गरे पनि उनले एक पटकमात्र पत्र काटेको बताए । उनले भने, ‘मैले राजस्व नियमित जम्मा भइरहेको छैन भन्ने जानकारी पाउनासाथ जम्मा गर्न लगाउन पत्र लेख्न अनुरोध गरे, तर उनले धेरैपछि मात्र पत्र काटे ।’ उनले पछिल्लो पटक पनि १५ गते नयाँ प्रशासकीय अधिकृतलाई पत्र काट्न लगाइसकेको बताउँदै अब चैत मसानन्तसम्म रकम नबुझाए कानुनी प्रक्रियामा जाने बताए ।

प्रकाशित : वैशाख १, २०७९ १३:५५
पूरा पढ्नुहोस्
प्रतिक्रिया
पठाउनुहोस्
×