यादवको स्मृतिमा सालिक स्थापना
बारा — प्रजातन्त्रका सेनानी भागवतप्रसाद यादवको स्मृतिमा सालिक स्थापना गरिएको छ । सिम्रौनगढ नगरपालिका–९ कचोर्वाको बसवरियामा उनको सालिक स्थापना गरिएको हो । स्वर्गीय भागवतप्रसाद यादव स्मृति प्रतिष्ठानका अध्यक्ष तथा सिम्रौनगढका नगर प्रमुख विजयशंकर यादवले अर्धकदको शालिक स्थापना गरिएको बताए । ‘प्रजातन्त्र, देश र जनताका लागि बुवाले पुर्याउनुभएको योगदानलाई जीवन्त राख्न आफ्नै प्रयासमा सालिक स्थापना गरेको हुँ,’ यादवका छोरा समेत रहेका विजयशंकरले भने ।
वि.सं. १९७९ असार ९ मा जन्मेका यादवको निधन २०५१ वैशाख ५ मा ८१ वर्षको उमेरमा भएको थियो । बीपी कोइरालाका समकालीन यादवले कोइरालासँगै राणाकाल र पञ्चायत व्यवस्थाविरुद्ध संघर्ष गरेका थिए । त्यस क्रममा उनी पटकपटक गरी ३५ वर्षसम्म भारतमा प्रवास जीवन बिताउनुपरेको थियो । सालिकको सोमबार गृहमन्त्री बालकृष्ण खाँणले अनावरण गरेका थिए ।
