हुरी प्रभावित क्षेत्रमा फलामे पुल

कान्तिपुर संवाददाता

सिमरा — हावाहुरी (चक्रवात) पीडितका लागि घर पुनर्निर्माण गर्न खटिएको नेपाली सेनाको जनता आवास पुनर्निर्माण कार्यदल बारा/पर्साले बाराको फेटा गाउँपालिका १ भुलहीमा फलामे पुल निर्माण गरेको छ ।

मुसलधारे वर्षासँगै बंगरी नदीमा आएको बाढीले उक्त स्थानमा सञ्चालनमा रहेको बाँसको अस्थायी (लचका) पुल बगाइदिएपछि स्थानीय समस्यामा परेका थिए । बाँसको पुल बगेपछि सबभन्दा बढी स्कुले बालबालिका, सेवाग्राही, घास दाउरा लिन नदी पार गर्ने स्थानीय प्रभावित भएका थिए । लचका पुल बगेपछि अकवनिया, त्रिवेणी, चिलझप्टी, रजवटिया, भरवलियाका बासिन्दा भलुहीको विद्यालय, वडा कार्यालय, चोक स्थित बजार पुग्न झन्डै ३ किलोमिटर घुमाउरो बाटो प्रयोग गर्न बाध्य थिए ।

स्थायी फलामे पुल बनेपछि स्थानीयलाई सहज भएको फेटा १ का वडाध्यक्ष जयप्रकाश दासले बताए । ‘भलुही विद्यालयमा पढन आउने पारीका विद्यार्थीलाई सबभन्दा बढी फाइदा पुगेको छ,’ उनले भने, ‘सेनाले हामी गाउँलेका लागि फलामे सेतु जोडेर सराहनीय काम गरेको छ ।’ स्थनीय सरकारले कहिले पुल बनाउथ्यो कहिले ? सेनाले २ महिनामै पुल बनाएर सञ्चालनमा ल्याइदिएको उनले बताए ।

नेपाली सेनाले स्थानीय स्रोत साधन उपयोग गर्दै झन्डै ५ लाखको लागतमा उक्त पुल निर्माण गरेको नेपाली सेनाको चन्दननाथ गण ब्रह्मपुरीका प्रमुख गणपति कर्णेल पारस विक्रम शाहले जानकारी दिए । ‘पुल निर्माण गर्न कहीं कतैबाट बजेट आएको छैन,’ उनले भने, ‘घर निर्माणका लागि ल्याएको फलाम, ढुङ्गा र तारजालीको सदुपयोग गर्दै पुल निर्माण गरेका हौं ।’

त्यहाँ पुल निर्माण गर्न गाउँपालिकाबाट २ लाख रुपैयाँको बजेट विनियोजित गरिएको थियो । गाउँपालिकाको बजेट खर्च गरिनुभन्दा अगाडि नै सेनाले स्थायी फलामे पुल निर्माण गरिदिएको फेटा गाउँपालिकाका प्रमुख अमिरीलाल प्रसादले बताए ।

प्रकाशित : भाद्र ९, २०७६ १०:२४
ADVERTISEMENT
प्रतिक्रिया
पठाउनुहोस्
ADVERTISEMENT

मध्यपहाडीको काम सुचारु

सडक साँघुरो भएपछि जिल्ला प्रशासन, प्रहरी, व्यवसायी, उद्योग वाणिज्य संघलगायतले सडकको काम सुचारू गर्न दबाब दिएका थिए
दिप्ती सिलवाल

पर्वत — मनसुनको असर, निर्माण सामग्री, कामदार अभावलगायत कारण देखाउँदै काम रोकेको मध्यपहाडी लोकमार्ग (पुष्पलाल मार्ग) निर्माण कम्पनीले रोकिएको काम थालेको छ ।

सडक विस्तारका क्रममा भत्किएको पहिरो र खाल्डाखुल्डी पुर्नसमेत आनाकानी गरेको लामा कन्स्ट्रक्सनले केही दिनयता ठूला पहिरो पन्छाउने र सडकका खाल्डाखुल्डी पुर्नेकामलाई तीव्रता दिएको हो ।

विभिन्न प्राविधिक कारण देखाउँदै कम्पनीले गत असारको पहिलो सातादेखि काम रोकेको थियो । सडक फराकिलो पार्न व्यवसायीले सबैतिर एक्साभेटर लगाउँदा पर्वत खण्डको दर्जनभन्दा बढी स्थानमा पहिरो खसेर एकतर्फी यात्रा पनि जोखिमपूर्ण बनेको थियो ।

नयाँ पुलदेखि मालढुंगासम्म करिब दुई दर्जन पहिराले सडक साँघुरो भएपछि जिल्ला प्रशासन, प्रहरी, व्यवसायी, उद्योग वाणिज्य संघलगायतले सडकको काम सुचारु गर्न दबाब दिएका थिए । स्थानीयको दबाब व्यवसायीले नटेरेपछि संघीय सांसद पदम गिरीले संसद्मा समेत यो विषय उठाएका थिए । गिरीले धौलागिरीको मेरुदण्डका रूपमा रहेको लोकमार्गको काम रोकिँदा दुर्घटना हुन सक्ने भन्दै ठेकेदार कम्पनीलाई कारबाहीको मागसमेत गरेका थिए ।

चौतर्फी दबाबपछि लामा कन्स्ट्रक्सनले गत सातादेखि काम अघि बढाएको छ । कम्पनीका पर्वत प्रतिनिधि गोविन्द भुसालले अहिले सबैतिर काम अघि बढेको बताए । ‘वर्षाको केही समय मौसमले काम गर्न नदिएर रोकेकै हो,’ भुसालले भने, ‘बजारमा हल्ला गरेजस्तो सडक बिगारेर सम्पर्कविहीन भएको होइन । तोकिएको समयमा सक्दा हामीलाई नै फाइदा हुन्छ ।’ पर्वत खण्डको सडक दुई लेनको बनाउने गरी लामा कन्स्ट्रक्सनले ०७४ वैशाखमा ३ वर्षको समय लिएर सम्झौता गरी काम अघि बढाएको हो ।

यता मध्यपहाडी लोकमार्ग आयोजनाको पर्वतस्थित कार्यालयका अनुसार बीचमा केही समय काम रोकेर ठेकेदार कम्पनीले काममा ढिलासुस्ती गरेको स्विकारेको छ । कार्यालय प्रमुख आशिष थापामगरका अनुसार वर्षाको कारण देखाएर निर्माण व्यवसायीले केही समय काम रोक्दा सर्वसाधारण मर्कामा परे ।

‘निर्माणको बेला यातायात सहज गराउन निर्देशन दिएकै हो,’ उनले भने, ‘निर्देशन बमोजिम काम हुन सकेन । अहिले उहाँहरू तात्नुभएको छ । काम फुल फेजमा अघि बढेको छ ।’ उनले असार र साउनमा काम रोकिए पनि सम्झौता अनुसारकोलक्ष्य हासिल भएको दाबी गरे ।

मालढुंगा–बेनी ८ घण्टा अवरुद्ध
कुस्मा–१ पाङको अदुवाबारीदेखि बागलुङ नगरपालिकाको बांगेचौर जोड्ने झोलुंगे पुल निर्माणका क्रममा मालढुंगा–बेनी सडक दैनिक साढे ८ घण्टा अवरुद्ध भएको छ । कालीगण्डकी नदीमाथि निर्माणाधीन पुलका लठ्ठा तन्काउनेलगायत पूर्वाधारको काम गर्नुपर्ने भएकाले सडक विभिन्न समयमा गरी अवरुद्ध गर्नुपरेको सम्बद्ध पक्षले जनाएको छ ।

पर्वत प्रशासनमा बसेको सर्वपक्षीय बैठकले निर्माणाधीन पुलको पर्वत खण्डमा लठ्ठा तान्नका लागि सहायक जग निर्माण गर्नुपर्ने भएकाले सडक बन्द गर्ने निर्णय गरेको पर्वतका प्रमुख जिल्ला अधिकारी कल्पना घिमिरे नेपालले बताइन् । आगामी शुक्रबारसम्म सडक अवरुद्ध हुनेछ ।

पुलको लठ्ठा राख्ने भाग खन्नका लागि १२ दिन दैनिक १२ घण्टा माग्नुभएको थियो,’ प्रजिअ नेपालले भनिन्, ‘तीजको समय भएकाले मागे जति समय दिन सकिएन । तीज सकिएपछि थप समय उपलब्ध गराउने सहमति भएको छ ।’ भीरबाट ढुंगा पल्टिने हुनाले सम्भावित दुर्घटना रोक्न सवारी रोकिएको हो ।

बिहान ७–९ बजे र बिहान १० देखि अपराह्न ४ः३० बजेसम्म कुस्मा–१ मालढुंगादेखि जलजला गाउँपालिका–८ दमाखोलासम्मको सडक अवरुद्ध हुनेछ । सडक हुँदा पर्वतको मालढुंगा, जलजला हुँदै म्याग्दी र मुस्ताङ आउजाउ गर्ने सवारीलाई बागलुङ बजार र म्याग्दीको रत्नेचौर हुँदै बेनी पुग्ने वैकल्पिक मार्ग प्रयोग गर्न सूचना गरिएको छ । साना र हलुका सवारी पर्वतको सहस्रधाराबाट पाङ हुँदै दमुवाखोलासम्मको वैकल्पिक सडकसमेत प्रयोगगर्न सकिने सूचनामा भनिएको छ ।

यातायात व्यवसायीले भने दिउसोको समयमा एक घण्टा सडक खोल्नुपर्ने माग गरेका छन् । हिमशिखर कन्स्ट्रक्सनले निर्माण जिम्मा लिएको पाङ–बागलुङ झोलुङ्गे पुलको अहिले फाउन्डेसनको काम भइरहेको छ । सिंगल स्पानको यो झोलुङ्गे पुल मुलुकमा हालसम्मकै सबैभन्दा लामो दाबी गरिएको छ । पुलको लम्बाइ पाँच सय ६७ मिटर र १ सय ३८ मिटर उचाइको छ ।

प्रकाशित : भाद्र ९, २०७६ १०:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT