अत्यधिक भारले भासियो व्यापारिक मार्ग- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

अत्यधिक भारले भासियो व्यापारिक मार्ग

शंकर आचार्य

पर्सा — भारवहन क्षमताभन्दा अत्यधिक लोड गरिएका मालबाहक सवारी गुड्दा निर्माणाधीन वीरगन्ज–पथलैया व्यापारिक मार्ग भासिएको छ । सिमरा क्षेत्रमा सूर्य नेपाल प्रालिको उद्योग तथा सिमरा चोक वरपर सडक भासिन थालेको हो ।

व्यापारिक मार्ग आयोजना कार्यालय पथलैयाका सूचना अधिकृत एवम् इन्जिनियर अशोक यादवले सिमरा क्षेत्रमा यो समस्या बढी देखिएको बताए ।


हाल पनि सडक निर्माणको काम सम्पन्न भई नसकेकाले ठेकेदारले भासिएको क्षेत्रको पुनर्निर्माण गरिदिने भए पनि त्यस लगत्तै पुनः यो समस्या देखिन सक्ने सम्भावना रहेको उनले बताए । ‘तत्काललाई यो समस्या समाधान होला,’ उनले भने, ‘तर भविष्यमा यो समस्या दोहोरिन्छ ।’


समस्या समाधानका लागि कार्यालयबाटै पर्सा र बाराका जिल्ला ट्राफिक कार्यालय तथा यातायात व्यवस्था कार्यालय वीरगन्जलाई पनि पत्राचार गरिसके पनि समस्याको समाधान कतैबाट नभएको यादवले बताए ।


मालबाहक सवारी साधनको भारवहन नियमनसम्बन्धी कार्यविधि २०७४ अनुसार दुई एक्सल चार पांग्रे सवार साधनको अधिकतम वजन १२ टन, दुई एक्सल ६ पांग्रेको अधिकतम वजन १६ दशमलव २ टन, तीन एक्सलको २५ टन, चार एक्सलको ३१ टन, पाच एक्सलको ४० दशमलव २ टन कुल वजन तथा भारवहन क्षमता हुनु पर्छ ।


यो समस्याको समन्धमा समय समयमा यातायात व्यवस्था कार्यालय र ट्राफिक प्रहरी कार्यालयबीच विवाद हुने र एक अर्कालाई जिम्मेवार देखाउने पनि गर्छन् । तर, यो सडक खण्डमा गुड्ने अधिकांश मालबाहक सवारी साधनको भार दोब्बर हुने गरेको छ ।


पर्सा बारा औद्योगिक करिडोरका उद्योगका कच्चा पदार्थ बोक्ने सवारी साधन तथा वीरगन्ज नाकाबाट राजधानी लगायत अन्य क्षेत्रमा जाने मालबाहक सवारी साधनको भार पनि अत्यधिक हुने गर्छ ।


भारकै कारण त्रिभुवन राजपथको पथलैयादेखि हेटौंडा सडक खण्डको विभिन्न स्थानमा कालोपत्रे सडक नराम्रोसँग भासिएको छ । यसले सवारी दुर्घटनाको जोखिम पनि बढाएको छ ।

प्रकाशित : श्रावण ३०, २०७६ १०:३५
प्रतिक्रिया
पठाउनुहोस्

विद्युत् कटौतीले हैरान

ओमप्रकाश ठाकुर

सर्लाही — कविलासी नगरपालिका ७ को युनिभर्सल एकेडमीमा कक्षा ३ मा अध्यनरत प्रियाकुमारीले बिहान कक्षाको तयारी गर्दै गर्दा टाउको दुख्यो भनेर अभिभावकलाई हैरान पारिन् । प्रिया कक्षामा निदाएको गुनासो शिक्षकले अभिभावकसँग गरेका थिए ।

बालिकालाई निद्रा नपरेर टाउको दुःखेको थियो । यसको मुख्य कारण अनियमित विद्युत् कटौती हो ।
चर्को गर्मीमा विद्युत् कटौतीले बालबालिका रातभरि निदाउन पाएका छैनन् । राति दर्जनौं पटक विद्युत् आउने जाने भइरहन्छ । मुस्किलले ५ मिनेट मात्र रहने विद्युत् कटेको घन्टौंपछि आउने गरेको छ ।

अनावश्यक विद्युत् कटौतीले रातभरि हैरान पारेको बालिकाकी हजुरआमा बैदेही देवीले बताइन् । ‘सबभन्दा बढी गर्मी भएकै दिन विद्युत अनियमित हुन्छ, दिउँसो त छिनछिनमा विद्युत् त जान्छ नै राति सुतेका बेला पनि विद्युत कटौती हुँदा निदाउनै मुस्किल पर्छ,’ उनले भनिन्, ‘निद्रा नपुगेकै कारण नातिनीको टाउको दुख्यो र शिक्षकले पनि गुनासो गर्नुभयो ।’ उनले अनियमित विद्युत कटौतीले रातभरि निदाउन कठिन परेको गुनासो गरिन् ।

सर्लाही जिल्लाभरि सर्वसाधारणले विद्युत् कटौतीको सास्ती ब्यहोरिरहेका छन् । ‘कुन बेला विद्युत कटौती हुन्छ थाहा हुँदैन, मुलुक लोडसेडिङ मुक्त भएर अन्य मुलुकमा विद्युत् बिक्रीको योजना बनाइरहेको छ, तर यहीँ घण्टौंसम्म विद्युत अवरुद्ध हुने गरेको छ,’ रेडियो एकताका स्टेसन म्यानेजर प्रकाश मैनालीले भने, ‘घण्टौंसम्म विद्युत अवरुद्ध हुँदा रेडियो नै बन्द गर्नुपर्ने अवस्था आउँछ ।’ नेपाल विद्युत प्राधिकरणले राति राति घण्टौंसम्म विद्युत कटौती गर्दा निदाउन पनि समस्या परिरहेको उनको भनाइ छ ।

गर्मी मौषममा राति हुने विद्युत् कटौतीले सर्पदंशको सम्भावना पनि उच्च रहेको स्थानीय राजनारायण साहले बताए । उनले राति विद्युत अवरुद्ध हुँदा छत माथि खुला आकाश मुनि सुत्नुपरेको गुनासो गरे । विद्युत नभएर खुला आकाश मुनि सुत्दा आफू बिरामी परेको उनको भनाइ छ ।

विद्युत कटौतीले यस क्षेत्रका सर्वसाधारण मात्र होइन, व्यापारी, होटल व्यवसायी सबै समस्यामा परेका छन् । उनीहरूले सरकारले नाम मात्रको लोडसेडिङ मुक्त घोषणा गरेको गुनासो गर्दै आएका छन् । चर्को गर्मीमा घण्टौं हुने विद्युत् कटौतीको तत्काल समाधान गर्न स्थानीयले आग्रह गरेका छन् ।

यता, नेपाल विद्युत् प्राधिकरणले भने आपत्कालीन समस्यामा मात्र विद्युत् कटौती गर्नुपरेको जनाएको छ । ‘हामीसँग विद्युत् कटौतीको तालिका छैन, केही समस्या आए मात्र हामीले विद्युत्कटौती गर्ने हो,’ नेपाल विद्युत् प्राधिकरण लालबन्दी वितरण केन्द्रका प्रमुख विजय महतोले भने, ‘यसलाई लोडसेडिङ भन्न मिल्दैन ।’

गर्मीमा विद्युत् लोड बढी हुने भएकाले फ्युज जाने, ट्रान्सफर्मर र तारमा समस्या आउने गरेको उनले बताए । वितरण केन्द्र प्रमुख महतोले अगामी आर्थिक वर्षदेखि नवलपुर सवस्टेसन सञ्चालनमा आएसँगै कुनै पनि समस्या नआउने जानकारी दिए ।

प्रकाशित : श्रावण ३०, २०७६ १०:३४
पूरा पढ्नुहोस्
प्रतिक्रिया
पठाउनुहोस्
×