बल्झिँदै आपराधिक घटना

अवधेशकुमार झा

राजविराज — एक वृद्ध दम्पतीलाई हत्या गरी घरमै जलाएको ५ महिना बित्दा पनि प्रहरीले अभियुक्तको पहिचान गर्न सकेको छैन । जिल्ला प्रहरी कार्यालय, सिआईबी, प्रदेश प्रहरी कार्यालय, प्रदेश प्रहरीको ब्युरो कार्यालय लगायतका स्थानबाट छुटाछुटै अनुसन्धान टोली खटिए पनि सप्तरीको खडग नगरपालिका ५ का ७५ वर्षीय सबुरी साह र उनकी श्रीमती ६५ वर्षीय बेचनीदेवी साहको हत्यामा संलग्नको पहिचान अझै भएन ।

साह दम्पतीको गत फागुन १४ गते राति हत्या भएको थियो । घटनापछि प्रहरीले तालिम प्राप्त कुकुर, बीपी कोइराला स्वास्थ्य विज्ञान प्रतिष्ठानको फरेन्सिक टोली समेत बोलाएर छानबिन सुरु गरेको थियो । वृद्ध दम्पतीको हत्या गरिएको घरभित्र र बाहिर धेरै स्थानमा रगतका छिटाहरू देखिएकाले दम्पतीको धारिलो हतियार प्रहार गरी हत्या गरेर जलाइएको हुनसक्ने अनुमान गरिएको थियो ।

जिल्ला प्रहरी कार्यालय सप्तरीका डीएसपी भावेश रिमालले अझै सम्म पनि अनुसन्धान पुरा नभएको स्विकारे । ‘घटना कसरी वा के कारणले भएको हो ठयाक्कै भन्न सकिने अवस्था छैन,’ डिएसपी रिमालले भने, ‘अझै हामी अनुसन्धानमै छौं ।’ उता जेठको पहिलो हप्तादेखि अपहरणमा परेका राजविराज बोरियाका तुलसी दासको अझै पतो छैन । चिनेजानेका व्यक्तिले बोलाएर गएका उनी फर्किएर आएका छैनन् । बोलाउने व्यक्तिले नै अपहरण गरेको दासको परिवारको आरोप छ । तर, बोलाउने व्यक्ति समेत फेला नपरेको प्रहरीको भनाइ छ ।

साउनको दोस्रो साता डाकनेश्वरी नगरपालिका १ की कंचनकुमारी यादवको शव झुण्डिएको अवस्थामा फेला पर्‍यो । माइती पक्षले कर्तव्य गरी पति र सासू–ससुराले मारेको आरोप लगाइरहँदा प्रहरीले भने उनको हत्या वा आत्महत्या हो भन्ने ठम्याउन सकेको छैन । कंचनका पति अरबिन्दलाई प्रहरीले नियन्त्रणमा लिएर अनुसन्धान भइरहेको जनाएको छ । ‘पोष्टमार्टम रिर्पोट आइसकेको छैन, आएपछि थप कुरा खुल्छ,’ डिएसपी रिमालले बताए ।

साउन ५ गते नै अग्नीसाइर कृष्णासवरण गाउँपालिका ३ की रन्जु यादवको पनि शंकास्पद मृत्यु भयो । माइती पक्षले सासु ससुराले कर्तव्य गरी मारेको जाहेरीका आधारमा प्रहरीले ससुरा महेन्द्र यादव र सासु लीलादेवी यादवलाई पक्राउ गरी अनुसन्धान गरिरहेको छ ।

खरचुहियाका साह दम्पतीको हत्या, तुलसी दासको अपहरण तथा दुई महिलाको शंकास्पद मृत्यु सम्बन्धी घटना उदाहरण मात्र हुन् । जिल्लामा अपराधका अन्य कयौं घटना भएको लामो समय बितिसक्दा पनि प्रहरीले अझै पनि अनुसन्धान पूरा गरी कारण ठम्याउन सकेको छैन । अपराधका घटनाका विषयमा प्रहरी अनुसन्धान नजिक पुग्न नसक्दा एकातिर प्रहरीको अपराध अनुसन्धानमाथि नै प्रश्न चिह्न खडा भएको छ भने अर्को तर्फ समाजमा त्रासको स्थिति सृजना हुने गरेको छ ।

प्रकाशित : श्रावण २८, २०७६ १०:३४
प्रतिक्रिया
पठाउनुहोस्

गण्डकको पानी १२ ब्लकसम्म

कान्तिपुर संवाददाता

पर्सा — भारतले गण्डक नहरमा कम पानी छोडेपछि नहरको १२ नम्बर ब्लकसम्म मात्र पानी पुगेको छ । बारा र रौतहटको सीमासम्म पानी पुगे पनि यस वर्ष पनि नहरको पानी रौतहटसम्म पुग्न नसकेको नारायणी सिँचाइ व्यवस्थापन डिभिजन कार्यालय बहुअरीका प्रमुख इन्जिनियर राजेन्द्रप्रसाद साहले जानकारी दिए । 

‘पानी नै कम आएकाले रौतहटका किसानको खेतमा यस वर्ष धान बालीमा पानी पुर्‍याउन सकिएन,’ उनले भने । हाल नहरमा करिब ४ सय ५० क्युसेक मात्र पानी आएको साहले बताए ।

भारतबाटै न्यून परिमाणमा पानी आएको उनलेबताए । भारतमा नहरमा ८० आरडीमा नहरको साइफन चुहिएको र त्यहा बोरा राखेर पानी प्रवाह गर्ने काम भइरहेको जानकारी आफूले भारतीय पक्षबाट पाएको साहले बताए । नहरको सोही खण्ड भएर नेपालमा पानी आउने भएकाले भारतबाटै कम पानी आउँदा नेपालमा स्वाभाविक रूपमा पानी कम हुने उनले बताए ।

भारतीय पक्षले नहरको मर्मत सम्भारको काम अविलम्ब सक्ने बताउँदै आए पनि त्यसमा कति समय लाग्ने यकिन नभएको उनले बताए । यो समस्या बारे आफूले विभागलाई पत्राचार गरिसकेको उनले बताए । विभागले परराष्ट्र मन्त्रालयमार्फत भारतीय पक्षसँग पनि संवाद गरिरहेको जानकारी आफूले पाएको साह बताउँछन् ।

नेपाल र भारतबीच भएको गण्डक सम्झौताअनुसार नहरमा भारतले नेपाल तर्फ ८ सय ५० क्युसेक पानी छाड्नु पर्ने हो । तर, बर्सेनि कुनै नकुनै प्राविधिक समस्या देखाएर भारतले नहरमा कम पानी दिँदै आएको छ ।

नवलपरासीको भैंसालोटनस्थित नेपाल भारत सीमामा निर्मित व्यारेजबाट भारतीय पक्षले पानी छोड्ने गर्छ । भारतसँगको सम्झौताअनुसार बर्सेनि धान सिजनका लागि असार १५ र गहुँ सिजनका लागि पुस १० देखि नहरमा पानी आइसक्नुपर्छ ।

सन् १९७५ र ७६ मा दुई चरणमा भारत सरकारले नेपाल सरकारलाई गण्डक नहर हस्तान्तरण गरेको हो । पर्साको जानकीटोलाबाट नेपाल प्रवेश गर्ने र रौतहटको बागमतीमा गएर मिसिने नहरलाई पूर्वी नहर भनिन्छ ।

८१ किमि लामो यो नहरले पर्सा, बारा र रौतहटको ३१ हजार ४ सय हेक्टर जग्गालाई सिंचित गर्ने लक्ष्य थियो । तर भारतबाटै पर्याप्त पानी नछोडिने भएकाले पर्सा र बाराका पूर्वी भेगसम्म मात्र पानी पुग्छ । रौतहटमा पानी पुग्दैन । रौतहटसम्म पानी लग्न हाल बारामा जमुनी सिँचाइ आयोजना निर्माणाधीन छ । जसबाट गण्डक नहरमा पानी झारिनेछ ।

प्रकाशित : श्रावण २८, २०७६ १०:३३
पूरा पढ्नुहोस्
प्रतिक्रिया
पठाउनुहोस्