बैंक लुट्न खोज्ने किशोर पक्राउ 

कान्तिपुर संवाददाता

बारा — जिल्लाको सदरमुकाम कलैयामा रहेको एनसीसी बैंक लुट्न खोज्ने एक किशोर बिहीबार राति पक्राउ परेका छन् । कलैया उपमहानगरपालिका–१६ का १७ वर्षीय रोशन कुसवाहा पक्राउ परेका हुन् ।

भारतको चण्डीगढमा इन्जिनियरिङ पढ्दै गर्दा मोडलिङ गर्न नाम निस्केकोमा त्यसका लागि चाहिने खर्चको लागि बैंकमा पैसा निकाल्न गएको प्रहरीलाई उनले बयान दिएका छन् । सोही बैंकमा उनको खाता छ ।

मूल ढोकाको ताल्चा फोडेर बैंक प्रवेश गरेर विद्युत् र सीसी क्यामराको लाइन काटेर लुट्न खोज्दा बैंकका सुरक्षा गार्डले उनलाई पक्राउ गरेका थिए । सुरक्षा गार्ड साहेबप्रसाद यादवले रोशनलाई पक्राउ गरी प्रहरीलाई खबर गरेका थिए ।

अभियुक्त रोशनलाई चोरी उद्योग मुद्दामा बारा जिल्ला अदालतबाट ५ दिनको म्याद थप गरी अनुसन्धान गरिरहेको जिल्ला प्रहरी कार्यालयका एक प्रहरी अधिकारीले बताए ।





प्रकाशित : श्रावण २४, २०७६ १७:४५
प्रतिक्रिया
पठाउनुहोस्

एनसेल टावरमा आगजनीको अभियोगमा १ पक्राउ

कान्तिपुर संवाददाता

धादिङ — एनसेल टावरमा आगजनी गरेको अभियोगमा धादिङबाट १ जना पक्राउ परेका छन् । सिद्धलेक गाउँपालिकाअन्तर्गत कुम्पुरमा रहेको एनसेल टावरमा आगजनी गरेको अभियोगमा ३० वर्षीय प्रल्हाद सिंखडालाई बिहीबार प्रहरीले पक्राउ गरेको हो ।

साविकको सुनौलाबजार ६ (हाल निलकण्ठ नगरपालिका ७) बस्ने सिंखडालाई तारुखर्कबाट पक्राउ गरिएको हो । जिल्ला प्रहरी कार्यलय धादिङका प्रहरी निरिक्षक भोला अधिकारीले सिंखडा पक्राउ परेको पुष्टि गरेका छन् । गत जेठ १६ गते नेत्रविक्रम चन्द नेतृत्व समूहको कार्यकर्ताहरुले देशैभरिका एनसेलको टावरमा आक्रमण गरेका थिए ।

प्रहरी निरीक्षक अधिकारीले सिंखडा चन्द समूहका हुन् या होइनन् भन्ने अनुसन्धानमै रहेकोले सार्वजनिक नगरिएको बताए ।

प्रकाशित : श्रावण २४, २०७६ १७:२१
पूरा पढ्नुहोस्
प्रतिक्रिया
पठाउनुहोस्