तीर्थयात्रीको जिपबाट पटाका बरामद

रवीन्द्र उप्रेती

महोत्तरी — सशस्त्र प्रहरीले तीर्थस्थल गरेर फर्किएको जिपबाट ठूलो परिमाणको पटाका बरामद गरेको छ । सशस्त्र प्रहरीको भन्सार तथा राजस्व गुल्मले मंगलबार जलेश्वर भन्सार क्षेत्रबाट भारतको बाबाधामबाट फर्किएको बोलबम जिपबाट पटाका बरामद गरेको हो । 

सशस्त्रले १ सय ८४ प्याकेट नागिन पटाका, १२ प्याकेट रकेट पटाका, बुलेट पटाका १५ प्याकेट, फलावर ३५ प्याकेट, ग्राउन्ड चक्कर २५ प्याकेट, झिरझिरे १ सय ५० प्याकेट र छुरछुरी १ सय ४० थान रहेका छन् । स्थानीय व्यापारीका अनुसार बरामद पटाकाको मूल्य ५० हजार बराबरको छ ।

गुल्मका डीएसपी विष्णु धितालका अनुसार भारत झारखण्डको बाबाधाम पुगेर फर्किएको भाडाको जीपलाई भन्सार क्षेत्र नजिक आकस्मिक चेक प्वाईन्ट खडा गरी खोजतलास गर्दा उक्त परिमाणको पटाका फेला पारिएको हो । तीर्थयात्राबाट फर्केका सवारीको चेकजाँच नहुने ठानेर तस्करले समय र साधनको दुरुपयोग गरेको सशस्त्रको अनुमान छ ।

बरामद पटाका तिहार र छठलाई लक्षित गरी अहिले नै ल्याउन लागेको बुझिएको छ । जिपमा सवार बोलबम तीर्थयात्रीले पटाकाबारे अनभिज्ञता प्रकट गरेकाले सशस्त्रले कसैलाई पक्राउ नगरेको जनाएको छ ।

प्रकाशित : श्रावण २१, २०७६ १७:१४
प्रतिक्रिया
पठाउनुहोस्

त्रिविको नियुक्ति सच्याउन डा.केसीको माग

कान्तिपुर संवाददाता

काठमाडौँ — चिकित्सा शिक्षा र सेवा सुधारका अभियन्ता डा. गोविन्द केसीले त्रिवि सेवा आयोगमा भागबन्डाका आधारमा गरिएको नियुक्ति सच्याउन माग गरेका छन् । उनले आयोगमा योग्यताका आधारमा नियुक्ति हुनुपर्नेमा जोड दिएका छन् । 

फाइल तस्बिर ।

केसीले मंगलबार विज्ञप्ति जारी गरी विश्वविद्यालयहरूमा पदाधिकारी नियुक्ति दलीय भागबन्डाका आधारमा गरिए आन्दोलन सुरु थाल्ने चेतावनीसमेत दिएका छन् । उनले सरकारद्वारा गठित न्यायिक जाँचबुझ आयोग वा समितिले दोषी ठहर गरेका व्यक्तिलाई विश्वविद्यालयहरूमा नियुक्त नगर्न ध्यानाकर्षण गराएका छन् । ‘त्रिवि सेवा आयोगभित्र भ्रष्टाचारको विकराल अवस्था हालसालै सतहमा आएको थियो । फेरि भाबन्डाकै आधारमा नियुक्ति गरिनु लज्जास्पद छ,’ डा. केसीले विज्ञप्तिमा भनेका छन् ।

उनले विश्वविद्यालयलगायत सार्वजनिक संस्थाहरूमा योग्यता र वरिष्ठताका आधारमा नियुक्ति गर्न सरकारको ध्यानाकर्षण गराएका छन् । दलीय भागबन्डाको मुसा–दौड रोकेर विश्वविद्यालय तथा प्रतिष्ठानका पदाधिकारी नियुक्तिको मापदण्ड निर्धारण कार्यदलले दिएको प्रतिवेदनलाई तत्काल कार्यान्वयन गर्नसमेत माग गरेका छन् ।

यो पनि

प्रकाशित : श्रावण २१, २०७६ १७:१४
पूरा पढ्नुहोस्
प्रतिक्रिया
पठाउनुहोस्