‘हत्यालाई दुर्घटना बनाउन खोजियो’

पवन यादव

सिमरा — पीडकहरूको दबाबमा बारागढी गाउँपालिका ५ सिंहासनीका गोविन्दर साह तेलीको हत्यालाई दुर्घटनामा रूपान्तरण गर्न प्रहरीले प्रयास गरिरहेको आरोप मृतकका आफन्तले लगाएका छन् । 

बारागढी ५ सिहासनी टोल र टोकरी टोलको बीचमा जोखु चौधरीको खेतमा जेठ ९ गते राति हत्या भएको परिवारको दाबी छ । श्रीमान्को हत्या गरी त्यस स्थानबाट शव उठाई एसएस रिडर इङ्लिस बोर्डिङ स्कुलदेखि पूर्वमा रहेको मूल सडक खण्ड तामागढी र सिम्रौनगढ सडक खण्डमा ल्याई राखिदिएको आरोप मृतककी धर्मपत्नी वविता साहले लगाएकी छन् ।

‘विपक्षीहरू राजनीतिक पहुँचवाला भएको र उनीहरू घटनाबाट जोगिन जालझेल गरिरहेका छन्,’ उनले आरोप लगाइन्, ‘मेरो श्रीमान्को हत्या नै उनीहरूले गरेका हुन् ।’ गाउँको पञ्चायतीमा जायज कुरा बोलेको भन्दै श्रीमान् गोविन्दरलाई उनीहरूले ज्यान मार्ने धम्की दिंदै आएका थिए ।

उनीहरूले दिंदै आएको धम्कीलाई जेठ ९ गते राति यथार्थमा बदलिदिएको उनले आरोप लगाइन् । प्रहरीले पनि उनीहरूकै साथ दिइरहेको उनले गुनासो गरिन् ।

आफू अन्यायमा परेको र न्याय दिलाउन पहल गरिदिन उनले स्थानीय सञ्चारकर्मी, नागरिक समाजलाई समेत गुहारेकी छन् । गाउँमा भएको पञ्चायतीमा विपक्षीको तर्फबाट बोलेकाले उनको हत्या भएको साह पत्नी वविताले बताएकी छन् ।

तामागढीदेखि सिम्रौनगढसम्म निर्माण भइरहेको सडक पानीबाट भिजाएको विषयलाई लिई स्थानीयसँग भएको झैझगडामा आफ्नो पति गोविन्दरले सच्चाइको पक्ष लिएको उनले जानकारी दिइन् ।

केही स्थानीयले मिलेर पतिको हत्या गरेकाले घटनाको निष्पक्ष छानबिन गरी दोषीलाई कडा कारबाही गर्न उनले माग गरिन् । प्रहरीले राम्रोसँग अनुसन्धान नगरेको कोल्हवीमा स्कार्पियो चालकलाई हिरासतमा राखिएको र पछि छाडिएको मृतकका आफन्तले जनाएका छन् ।

कोल्हवीमा स्कार्पियो चालकलाई प्रहरीले सकार्न दबाब दिएको पीडित पक्षले दाबी गरेको छ । त्यसको केही दिनपछि जिल्ला प्रहरी कार्यालयमा बस चालकलाई ठक्कर दिएको सकार्न यातना दिइएको दाबीसमेत पीडित परिवारले लगाएको छ । व्यक्ति तथा हत्या गर्ने कारणबारे प्रस्ट जानकारी दिंदादिंदै पनि ती व्यक्तिमाथि अनुसन्धान नगरिएको उनीहरूले गुनासो गरेका छन् ।

हत्या भएकोबारे केही व्यक्तिहरूलाई थाहा भएको र ती व्यक्तिको नाम दिंदादिंदै पनि प्रहरीले ती व्यक्तिलाई गलत बयान दिन कुटपिटसमेत गरेको दाबी मृतक परिवारको छ । प्रभावशालीव्यक्तिको प्रभावमा परी प्रहरीले काम गरिरहेको आरोपसमेत पीडित पक्षले लगाएको छ ।

सत्य तथ्य अनुसन्धान गर्न र वास्तविक दोषीलाई पक्राउ गरेर कारबाही गर्न मागसमेत पीडित परिवारको छ । कुनै दबाब तथा प्रलोभनमा नपरी प्रहरीलाई न्यायको पक्षमा काम गर्न मागसमेतगरिएको छ ।

हत्यालाई दुर्घटना बनाउने खेल बन्द गर्न माग गरिएको छ । भरतपुरमा गरिएको पोस्टमार्टम रिपोर्टलाई केन्द्रमा राखी अनुसन्धान प्रक्रिया अगाडि बढाउने पीडित पक्षको माग हो । जिल्ला प्रहरी कार्यालय बारामा किटानी जाहेरी दिन जाँदा पनि प्रहरीले जाहेरी दर्ता गर्न नमानेको पीडितले आरोप लगाए ।

‘इलाका प्रहरी कार्यालय कोल्हवीले घटनाको सुरुमा अनुसन्धान गर्दा गोविन्दरलाई मारेर सडकमा ल्याई राखेको प्रारम्भिक अनुसन्धानको क्रममा बताएको थियो,’ पीडितले भने, ‘तर घटनाको अनुसन्धान जिल्ला प्रहरी कार्यालय सम्म पुग्दा दुर्घटनाको स्वरूप दिन थालियो ।’

प्रकाशित : असार ८, २०७६ १०:००
ADVERTISEMENT
प्रतिक्रिया
पठाउनुहोस्
ADVERTISEMENT

सिम्रौनगढ क्षेत्रमा खानेपानी हाहाकार

पवन यादव

सिमरा — बाराको सिम्रौनगढ नगरपालिका ७ झवानीकी ६० वर्षीया देवपतिदेवी रामले नुहाएको एक साता बढी भइसक्यो । मैलो कपडा सफा गर्न र गाईभैंसी, खसीबाख्रालाई पानी खुवाउन पनि निकै सास्ती भोग्नु परेको उनले बताइन् ।

बाराको सिम्रौनगढ नगरपालिका ७ झवानी टोलमा चापाकलबाट पानी निकाल्ने प्रयास गर्दै स्थानीय महिला ।  तस्बिर : पवन/कान्तिपुर  

खाना पकाउन र पिउनका लागि खेतमा सिँचाइ गर्न गाडिएको बोरिङको पानी ल्याएर काम
चलाउनुपरेको उनले सुनाइन् ।

शुद्ध पानी पिउनका लागि उनको घरको आँगनमा एक सय ५० फिट गहिरो चापाकलको पाइप गाडिएको छ । फागुनअघिसम्म चापाकलमा खुबै पानी आउथ्यो । एक पल्ट चापाकलको
ह्यान्डिल दबाउँदा लोटा भरिन्थ्यो । तर फागुन यता उक्त चापाकलबाट कम पानी आउँछ ।

चैतको दोस्रो सातादेखि त जति पेले पनि चापाकलमा पानी नै आउँदैन । एकैछिनमा लोटा भरिने चापाकललाई बेस्सरी पेल्दा ५/१० मिनेटमा पनि लोटा भरिँदैन । लेयर सुकेर चापाकलबाट अहिले पानी नै आउन छाडेको उनले जानकारी दिइन् ।

‘गाउँमा ३÷४ वटा चापाकलबाहेक सबै सुकेका छन्,’ उनले भनिन्, ‘जत्ति पेले पनि चापाकलबाट पानी आउँदैन ।’ उनले सुकेको चापाकल पेलेर देखाइन् । जति पेल्दा पनि पानी आएन । डेढ सय भन्दा बढी घर परिवारको बसोबास रहेको झवानी टोलको प्राय: सबै घरमा चापाकल गाडिएका छन् । राम्रो पानीका लागि डेढ सय फिटभन्दा बढी गहिरो गाडिएको प्राय: सबै चापाकलले पानी दिन छाडेका छन् । त्योभन्दा कम गाडिएको चापाकललेचाही पानी दिने गरेको स्थानीयले बताए ।
गाउँमा पानी खानका लागि सबै चापाकल डेढ सय वा सोभन्दा बढी गहिरो गाडिएको स्थानीय कोशिलादेवी रामले बताइन् । ‘पहिला यसरी चापाकल सुक्दैनथ्यो,’ उनले भनिन्, ‘विगत ३ वर्षदेखि नै गर्मीको बेलामा चापाकल सुक्ने क्रम सुरु भएको छ ।’

उमेरले ६० काटिसकेकी वृद्धा कोशिलाले चापाकल सुकेर यसपालि गाउँमै पानीको हाहाकार भएको बताइन् । चापाकलको पानी सुकेपछि सिँचाइका लागि ४०/५० फिटसम्म गहिरो गाडिएको बोरिङको अशुद्ध पानी खान बाध्य हुनुपरेको उनले बताइन् ।

गाउँभरिकै चापाकल सुकेपछि तत्कालै पानीको वैकल्पिक व्यवस्था गर्न स्थानीय बासिन्दाले सम्बन्धित सरोकारवाला निकाय र सरकारसँग माग गरेका छन् । घरबाटै कहिलै ननिस्कने बुहारीहरू पानीका लागि अहिले टाढाटाढा जानुपर्ने बाध्यता आइपरेको पीडितले बताए ।
घरबाट झन्डै एक÷डेढ किलोमिटरसम्म खेतमा चलेको मोटरबाट पानी भर्नु पर्ने अवस्था आएको स्थानीयले जनाए ।

चापाकलको पानी खाने चलन बढ्दै गएपछि गाउँमा खनिएका डेढ/दुई सय फिट गहिरो इनार प्रयोगविहीन भएका छन् । पानीको श्रोतका रूपमा रहेका इनार ठप्प भएका कारण स्थानीयलाई पानीको समस्या बढेको हो । यस क्षेत्रमा पानीको मुख्य श्रोतका रूपमा रहेको इनार र चापाकल दुबै ठप्प भएपछि गाउँमा पानीको हाहाकार भएको पीडितहरूले बताए ।

झवानी गाउँमा मात्र होइन । यस क्षेत्रका टेटा गाउँमा पनि ६० वटाभन्दा बढी चापाकल सुकेको सिम्रौनगढ नगरपालिका १० टेटाका अकलु दास तत्माले बताए । ‘एक साताअघिसम्म थोरै-थोरै पानी दिँदै आएको चापाकल अहिले पुरै सुकेको छ,’ उनले भने, ‘जति चलाए पनिचापाकलबाट पानी निस्कँदैन ।’

गाईगोरुलाई पानी खुवाउन गोठमा गाडिएको चापाकलको पानीबाट काम चलाउनुपरेको उनले जानकारी दिए । अझै बर्खा नभए अहिले सुक्न बाँकी रहेको चापाकलसमेत पानी दिन छाड्ने उनको ठम्याइ छ ।

पानी अभावको समस्यालाई समाधान गर्न सम्बन्धित निकायले ध्यान दिनुपर्नेमा उनको जोड छ । सिम्रौनगढ नगरपालिकाको वडा नं. ८ र ९ कचोर्वा, वडा नं. १० टेटा, वडा नं. १ बैरिया, वडा नं. ७ झवानी गाउँमा अहिले खानेपानीको हाहाकार भएको सिम्रौनगढ नगरपालिकाका प्रमुख मेयरविजयशंकर यादवले बताए ।

‘नगर क्षेत्रको गाउँ टोलमा गाडिएको चापाकलले पानी दिन छाडेको खबर आएपछि त्यस क्षेत्रमा खाने पानी पु¥याउन नगरपालिकाले पहल कदमी थालेको छ,’ उनले भने, ‘सिम्रौनगढ बजारमा रहेको खानेपानी ट्यांकीको पानी गाउँसम्म पु¥याउन खानेपानीको पाइप बिछ्याउन तयारी सुरु गरिएको छ ।’

एक साता सम्ममा पाइप बिछ्याएर झवानीमा पानी पु¥याउने तयारी नगरपालिकाले थालेको उनले जानकारी दिए । चापाकल सुकेर नगर क्षेत्रको विभिन्न टोलका गरी १२ हजारभन्दा बढी परिवार प्रभावित भएको उनले जानकारी दिए ।

नगरवासीलाई शुद्ध पानीको व्यवस्थापन गर्न आफु तयारीमा जुटेको उनले बनाएकाछन् । सिम्रौनगढसँगै जिल्लाको बेल्दारी,पिपरपाती, बैनौली लगायत गाउमा पनिअहिले चापाकल सुक्ने क्रम बढेको स्थानीयले जानकारी दिए ।

प्रकाशित : जेष्ठ ७, २०७६ ११:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×