कान्तिपुर वेबसाईट
AdvertisementAdvertisement

‘क्युट’ केटो [फोटोफिचर]

रमेशकुमार पौडेल

चितवन — केटो अर्थात् गैंडाको बच्चा । बाघमारा मध्यवर्ती सामुदायिक वनमा अहिले एक जोडी केटोको निकै चकचकी छ । चितवनको प्रमुख पर्यटकीय क्षेत्र सौराहाको आडैमा पर्छ, बाघमारा वन । सौराहा आएका अधिकांश पर्यटक यहाँ घुम्न जान्छन् ।

‘भगौडी’ नामको पोथी गैंडा मचान आडैको हरियो चौरमा चरिरहेको भेटिन्छ । उसको आडैमा छ, १५/२० दिनको सानो गैंडा । केटो माउ छाडेर धेरै पर जाँदैन । बेलाबेला दूध चुस्छ । चौरमै यताउता गर्छ, थाके त्यहीँ पल्टन्छ । सँगै छ, अर्को तिखे माउ । तिखेसँग पनि महिनादिन जतिको केटो छ ।

१८ वर्षदेखि बाघमारामा वन हेरालु रहेका तमबहादुर तामाङ दुईवटा गैंडाले एकै पटक बच्चा जन्माएको यो पहिलो घटना भएको बताउँछन् । अर्को सिङबाङ्गे माउ पनि बच्चा जन्माउन तयारी अवस्थामा रहेको वन अध्यक्ष जितु तामाङले जानकारी दिए ।

‘आठ १० दिनभित्रै वनमा तीनवटा केटोको चहलपहल देख्न पाइनेछ,’ उनले भने । २१५ हेक्टरको यो वनमा अनेक जीवजन्तु पाइन्छ । यहाँ स्थायी रूपले बस्ने गैंडा मात्रै आठवटा छन् । बेलाबेलामा अन्यत्रबाट पनि ५/७ वटा गैंडा आउने जाने गर्छन् ।


प्रकाशित : श्रावण २२, २०७७ ०९:३८
प्रतिक्रिया
पठाउनुहोस्

धरानमा एकै परिवारका पाँच जनासहित १३ जनामा कोरोना संक्रमण

प्रदीप मेन्याङ्बो

धरान — धरानमा एकै परिवारका पाँच जनासहित १३ जनामा कोरोना पोजिटिभ देखिएको छ । धरान उपमहानगरपालिका–३ गौधारा बस्ने एकै परिवारका पाँच जनामा कोरोना संक्रमण पुष्टि भएको हो ।

धरान उपमहानगरपालिकाका स्वास्थ्य महाशाखा प्रमुख उमेश मेहताका अनुसार उक्त परिवारका ७ वर्षीय बालकसहित ८५ वर्षीय र ४० वर्षीय पुरुष तथा ८० वर्षीया महिला र ३६ वर्षीया महिलामा कोरोना पुष्टि भएको हो ।

बाँकी ८ जना संक्रमितमध्ये धरान ११ बस्ने दुई महिला, भारतबाट आएर धरान १७ स्थित एन्फा क्वारेन्टाइनमा बसेका ५ जना भारतीय गोर्खा सैनिक र धरानको तरकारी बजारस्थित एक पुरुष छन् ।

भारतबाट आएर क्वारेन्टाइनमा बसेका धरान १७ का २८ र २६ वर्षीय २ जना पुरुष, वडा नम्बर १५ का ३४ वर्षीय पुरुष, वडा नम्बर ११ का ३५ वर्षीय पुरुष र वडा नम्बर १९ का एक पुरुष छन् । वडा १९ का पुरुषको यसअघि साउन १६ गते नै स्वाब परीक्षण गर्दा नेगेटिभ रिपोर्ट आएपछि क्वारेन्टाइनबाट घर गएका थिए । तर उनका साथीहरुको रिपोर्ट पोजिटिभ आएपछि क्वारेन्टाइनमा नै बसेको र दोस्रो पटकका रिपोर्ट पोजेटिभ आएको मेहताले बताए । उनीहरु सबै भारतीय सेनामा कार्यरत हुन् ।

धरानमा ‘ट्र्राभल हिस्ट्री’ नभएका व्यक्तिहरुमा कोरोना संक्रमण देखिएकाले समूहमा संक्रमण (क्लस्टर अफ केसेज) देखिएको चिकित्सकहरुले बताएका छन् । बीपी प्रतिष्ठानका मेडिसिन विभाग प्रमुख डाक्टर संजीव शर्माले समूहमा संक्रमण फैलिएकाले सबैले सतर्कता अपाउनुपर्ने बताए । कोरोना संक्रमण रोकथाम तथा नियन्त्रणका लागि नागरिकको भूमिका महत्वपूर्ण भएको उल्लेख गर्दै उनले मास्कको अनिवार्य प्रयोग र भीडभाड नगर्न आग्रह गरे ।

प्रकाशित : श्रावण २२, २०७७ ०९:३२
पूरा पढ्नुहोस्
प्रतिक्रिया
पठाउनुहोस्
×