दसैंमा घर जाने टिकट लिन नयाँ बसपार्कमा ठेलमठेल भीड

तस्बिर : केशव थापा

काठमाडौँ — दसैंका लागि आज आइतबारबाट टिकट बुकिङ खुला गरिएको छ । बुकिङ खुला गर्नु अघिल्लो दिन शनिबार नयाँ बसपार्कमा यात्रु बोक्ने गाडीको प्राविधिक पक्षको चेकजाँच गरिएको थियो । अघिपछि पनि शंका लागेको गाडीको कन्डिसन चेकजाँच गरेर मात्र गन्तव्यमा पठाइने यातायात व्यवस्था विभागले जनाएको छ ।

प्रकाशित : आश्विन ५, २०७६ १०:१३

बुकिङ सुरु भएसँगै नयाँ बसपार्कमा घर जानका लागि टिकट बुकिङ गर्ने यात्रुहरुको ठेलमठेल भीड बढेको छ । यातायात व्यवस्था विभागका महानिर्देशक गोगनबहादुर हमालका अनुसार असोज १० गतेबाट सुरु गर्ने भनिएको नागरिक सहायता कक्ष टिकट बुकिङसँगै सुरु हुने भएको छ । बसपार्कमा भने शनिबारबाटै उक्त कक्षको सुरुवात गरिएको महानिर्देशक हमालले जानकारी दिए । उनका अनुसार दसैंका लागि यात्रु बसको समस्या छैन । केही नयाँ बससमेत थपिएका छन् । ‘यात्रु बस पुग्दो छ, चिन्ता गर्नुपर्ने अवस्था छैन,’ उनले भने, ‘यात्रुलाई ठगिन नदिन चाडबाडभरि दैनिक अनुगमन गर्नेछौं ।’

उनका अनुसार टिकट बुकिङ गौशाला, नयाँ बसपार्क, चाबहिल, कोटेश्वर, बल्खु, कलंकी, नागढुंगालगायत स्थानमा रहनेछ । जहाँ ट्राफिक प्रहरी, यातायात व्यवस्था विभागका कर्मचारी, उपभोक्ता समाजका प्रतिनिधि रहनेछन् । यातायात व्यवसायी राष्ट्रिय महासंघका महासचिव सरोज सिटौलाका अनुसार आइतबार बिहान ७ बजेदेखि साँझ ६ बजेसम्म टिकट बुकिङ खुला रहनेछ । ‘यात्रुको चाप र आँकडा हेरेर बसको संख्या निर्धारण हुनेछ,’ उनले भने, ‘दसैंका लागि उपत्यकाबाट यात्रु बाहिरिन थाले पनि अग्रिम टिकट बुकिङ गर्नेहरू घटस्थापनाबाट जान थाल्छन् ।’

ADVERTISEMENT
ADVERTISEMENT
प्रतिक्रिया
पठाउनुहोस्

बागेश्वरीको सम्पत्ति सार्वजनिक

कान्तिपुर संवाददाता

बाँके — नेपालगन्जस्थित बागेश्वरी मन्दिरको व्यवस्थापन गुठीले २० वर्षपछि चलअचल सम्पत्तिको विवरण सार्वजनिक गरेको छ । पत्रकार सम्मेलनमार्फत शनिबार दुई वर्ष यताको चलअचल सम्पत्तिको अवस्था सार्वजनिक गरिएको हो । 

नेपालगन्ज उपमहानगर प्रमुख धबलशमशेर राणाको अध्यक्षतामा २०७४ भदौ १२ देखि गुठी व्यवस्थापन समिति छ । यही समितिले दुई वर्षमा दानपेटीमा संकलन भएका गरगहना खुलाएको थियो । पत्रकार सम्मेलनमा दिइएको जानकारीअनुसार सुनका आँखिया २ थान, नथुनी २ थान, तार १ थान, तिलहरी ४ थान, बिन्दिया १ थान छ । चाँदीको गरगहनामा छत्तर ६ थान, पाउदान १, बेलपत्र १, सिंहासन १, आँखिया २, लक्ष्मीको मूर्ति १, गणेशको १ र बिन्दिया १ थान छ । नयाँ समिति सञ्चालनमा आएपछि २१ लाख १० हजार १ सय ६५ बैंक मौज्दात रहेको खुलाइएको छ । यस अघिको व्यवस्थापन समितिमा १६ लाख ३८ हजार ७ सय ८६ रुपैयाँ थियो । यस्तै बागेश्वरी मन्दिरको नाममा रहेको अचल सम्पत्ति खोजी र संरक्षणका लागि व्यवस्थापन समितिको २०७४ कात्तिक ५ को बैठकले नेपालगन्जकी उपमेयर उमा थापाको संयोजकत्वमा ५ सदस्य उपसमिति गठन गरेको थियो । उक्त समितिले खोजी गरेको तथ्यसमेत सार्वजनिक गरिएको छ । बागेश्वरी गुठीको साविक इन्द्रपुर गाविसअर्न्तगत विसं २००५ को लगतमा ९२ बिघा ७ कटा ११ धुर जग्गा रहेको देखिन्छ । हाल नापीअनुसारको जग्गा हाल ८४ बिघा १० कठा १० धुर हुनुपर्ने देखिएको छ ।

खोजी गर्दा इन्द्रपुरको जग्गामा संलग्न कागजातमा कैफियतसहितको जग्गाधनी दर्ता प्रमाणपुर्जा, हाल कायम रहेका जग्गाधनीको लालपुर्जा भएको, साविक फिल्डबुक र मन्दिरको नामबाट रैकरमा परिणत गर्ने गरी २०५७ आसोज १७ मा निर्णय भएको फायल समेत भेटिएको छ । यद्यपि २०२७ र २०२८ सालमा मन्दिरको नामबाट रैकरमा परिणत गरेका स्रेस्ताको कागजात हालसम्म प्राप्त हुन सकेको छैन । यी कागजात कसरी हराए भनेर खोजीकै क्रममा रहेको उपसमिति संयोजक थापाले सुनाइन् । ‘हामी खोजीकै क्रममा छौं,’ उनले भनिन्, ‘यसमा सबैको साथ चाहिन्छ ।’ अध्ययनका क्रममा मन्दिरबारे प्राप्त सदन र आदेशहरू प्राचीन एवं ऐतिहासिक भएकाले अध्ययनका लागि सरकारी सार्वजनिक र गुठी जग्गा संरक्षणसम्बन्धी जाँचबुझ आयोगलाई जिम्मा लगाएको उनले बताइन् । खोजीका क्रममा विसं १९३६ मा रणदीपसिंह राजबहादुरबाट भएको सदनदेखि २००४ सालको जनरल मोहनशमशेर जबराबाट भएको आदेशसम्मका ७ वटा अभिलेख प्राप्त भएको छ । दानपेटीमा आएका दक्षिणा र दानमा २५ प्रतिशत महन्तले राख्ने ७५ प्रतिशत गुठीले राख्ने परम्परा छ । यसै परम्पराअनुसार दानपेटी खोल्दा मन्दिरले जम्मा ८६ हजार १ सय ६० रुपैयाँ प्राप्त गरेको उल्लेख छ । त्यस्तै नयाँ व्यवस्थापन समिति सञ्चालनमा आएपछि भने मन्दिरले भक्तजनबाट नगद ५७ हजार ५ सय रुपैयाँ प्राप्त गरेको खुलेको छ । मन्दिरका दुईवटा तिजोरीमा भएका २० केजी ३ सय ४ ग्राम चाँदी र दुई तोला सुन तथा अन्य वस्तुमा मूर्ति, सिक्का आदि लगायत प्राप्त भएकाले विवरण खुलाएर नेपाल बैंक लिमिटेडको लकरमा राखिएको गुठीले जनाएको छ ।

नयाँ समितिले मन्दिरमा दुईवटा मात्रै दानपेटिका राखेको अध्यक्ष एवं मेयर राणाले बताए । ‘दुई वर्षसम्म मालपोतले बागेश्वरी मन्दिरको जग्गाजमिन खोजीमा पटक्कै सहयोग गरेन,’ उनले भने, ‘अब चौतर्फी चासोको विषय बनेपछि गुमेको सम्पत्ति फिर्ता गराउन गर्न प्रोत्साहन मिलेको छ ।’

प्रकाशित : आश्विन ५, २०७६ १०:१२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×