शिवालयमा बोलबमको भीड

कान्तिपुर संवाददाता

काठमाडौँ — साउन महीनाको अन्तिम सोमबार बिहानैदेखि पशुपतिनाथ मन्दिरलगायत देशभरका शिवालयमा पूजा एवं दर्शन गर्ने भक्तजनको भीड लागेको छ । साउन महीना र सोमबार भगवान् शिवको महीना एवं बार भएकाले प्रत्येक वर्ष यस समयमा भक्तजनको घुइँचो शिवालयमा हुने गरेको छ ।

प्रकाशित : श्रावण २७, २०७६ १९:१५

साउनको सोमबार विशेषगरी महिला भक्तजनको भीड बढी देखिन्छ । हरियो र रातो पहिरजनमा सजिएका महिलाको भीडले पशुपतिमा तीजको झल्को दिन्छ । साउनको सोमबार व्रत बसी भगवान् शिवको पूजा–आराधना गरेमा मनोकाङ्क्षा पूरा भई सुख, शान्ति र ऐश्वर्य प्राप्त हुने विश्वास छ । कति भक्तजन भने भजनकीर्तनसहित नाचगान गरेर रमाइलो गरिरहेका छन् । पैदल यात्रा गर्ने भक्तजनले ठूलो स्वरमा बोलबम भन्दै नारा लगाएका थिए ।

साउनको अन्तिम सोमबार आज बिहानैदेखि सुन्दरीजलबाट शुद्ध जल ल्याई पशुपतिनाथ मन्दिरमा चढाउने भक्तजनको पनि भीड लागेको छ । भोलेनाथ काँवरिया सङ्घको आयोजनामा भएको आजको बोलबममा हजारौँ भक्तजन सहभागी भएका थिए । बोलबम मेला भर्न आइतबार साँझ नै भक्तजन सुन्दरीजल पुगेका थिए । आइतबार साँझ सुन्दरीजल पुगेका भक्तजन रातभर भक्ति सङ्गीत एवं भजनकीर्तन गरी बसेका थिए । राति १२ बजेपछि स्नान एवं जल सङ्कल्प गरी खाली गोडा करीब ११ किमी पैदल यात्रा गरेर पशुपतिनाथ मन्दिरसम्म आएका थिए । 

यसैगरी उपत्यकाका गोकर्णेश्वर, नागेश्वर, सन्तानेश्वर, डोलेश्वरलगायत शिवालयमा पनि बिहानैदेखि भक्तजनको भीड थियो ।साउन महीनाभर सुन्दरीजलबाट शुद्ध जल ल्याई पशुपतिनाथमा चढाउने भक्तजनको भीड लाग्छ । सोमबार र शनिबार बढी भीड हुने गरेको छ । पहिले तराईवासी मात्र सहभागी हुने गरेको बोलबम यात्रामा हाल पहाड एवं हिमालवासीको सहभागिता बढ्न थालेको छ । 

प्रतिक्रिया
पठाउनुहोस्

दुई सातामै उप्कियो कालोपत्र

कान्तिपुर संवाददाता

दमौली — तनहुँको छाब्दी मार्गमा गरिएको कालोपत्र दुई साता नपुग्दै भत्किएको छ । छाब्दीबराही मन्दिर जाने मुख्य मार्ग तीनै तहका सरकारको चार करोड रुपैयाँ लगानीमा कालोपत्र गरिएको थियो । ‘उपभोक्तासँग समन्वय नगरी सिधै ठेक्का दिइएको थियो । कालोपत्र धेरै दिन टिकेन,’ छाब्दी मार्ग उपभोक्ता समितिका अध्यक्ष मणिजंग बस्नेतले भने ।

बस्नेतले उपभोक्तासँग समन्वय नगरे पनि सडकको स्तरोन्नति हुँदा स्थानीय खुसी रहेको तर त्यो खुसी २ साता पनि नटिकेको बताए । वर्षायाममा हिलो र हिउँदमा धुलाम्मे हुने सडकमा कालोपत्र गरिएको थियो । झरी परिरहेका बेला कालोपत्र गरिएको स्थानीयले बताए । कमसल निर्माण सामग्री राखेर झुक्याइएको स्थानीय लक्ष्मी पन्तले बताइन् । ‘ठेकेदारले आँखामा छारो हाल्ने काम मात्रै गरे,’ उनले भनिन् ।
संघीय सरकारको १ करोड लगानीमा उक्त मार्गमा पहिलो चरणमा व्यास नगरपालिका–१ स्थित कुन्छाली गाउँदेखि व्यास नगरपालिका–१२ भड्खालासम्मको ८ सय मिटर कालोपत्र गरिएको थियो । भड्खालादेखि गौडापहरासम्म दोस्रो खण्डमा व्यास नगरपालिकाको २ करोड र गौडापहरादेखि छाब्दी मन्दिरसम्मको तेस्रो खण्डमा प्रदेश सरकारको एक करोड बजेटबाट कालोपत्र गरिएको हो ।

संघ र प्रदेशको बजेटबाट कालोपत्रे हुने सडकको ठेक्का डायमन्ड कन्स्ट्रक्सन प्रालि दमौलीले पाएको थियो । व्यास नगरपालिकाको ठेक्का जीएस कन्स्ट्रक्सन प्रालि दमौलीले पाएको थियो । जीएस कन्स्ट्रक्सनका प्रमुख आरसी पौडेलले मुख्य सडकमा जोडिएको शाखा सडकबाट लोड गाडी जबर्जस्ती लगिँदा भत्किएको बताए ।

प्रकाशित : श्रावण २७, २०७६ १९:१२
पूरा पढ्नुहोस्
प्रतिक्रिया
पठाउनुहोस्