मध्यरातमा मलेखु खोला उर्लेपछि ...

हरिहरसिंह राठौर

ताल्तीखोला(धादिङ) — मध्यरातमा उर्लेको मलेखु खोलाले चिनियाँ लगानीमा निर्माणाधीन हुआनसी नारायणी सिमेन्ट उद्योगमा क्षति गरेको छ । बाढीले मजदुरका आवास, उद्योगका निर्माणाधीन संरचनामा पूरै क्षति गरेको छ । आइतबार रातभरको वर्षाले खोला बढ्न थाले पछि बगरमा रहेका मजदुर तथा प्राविधिक आवास खाली गराएर नजिकैको पिपल भन्ज्याङ माविमा सारिएको थियो । 

प्रकाशित : असार ३०, २०७६ १२:३९

खोलामा वाढी आए पछि अढाई सय चिनियाँ र ३ सय नेपाली मजदुरले आफ्ना सरसामान समेत झिक्न पाएनन् । आवासलाई घेरेर बाढी दुवैतर्फ पसे पछि २ जना कोरियन र ५ जना चिनियाँ बीचमै फँसेका थिए । उनीहरुको बिहान ५ बजे स्थानीय र प्रहरीको सहयोगमा उद्धार गरिएको उद्योगका स्थानीय प्रबन्धक तुलसी थापाले बताए ।

गत फागुन १७ गते सभामुख कृष्णबहादुर महराद्वारा शिलन्यास गरिएको उक्त सिमेन्ट कम्पनी १७ अर्ब लगानीमा निर्मार्ण गर्न चीनकै हन्दन सिनोमा कम्पनीले ठेक्का लिएको थियो ।  २०५० साल साउन ४ गतेको बाढीले धान खेत बगर बनाए पछि करीब ४ सय रोपनी सोही बगर अधिग्रहण गरि उक्त सिमेन्ट उद्योग निर्माण गर्न लागिएको हाे । 

दैनिक ६० हजार बोरा सिमेन्ट उत्पादन गर्ने लक्ष्यसहित सञ्चालन गर्न लागिएको सिमेन्ट उद्योगको आगामी ९ महिना भित्रमा उत्पादन थाल्ने लक्ष्य थियो । 

बाढीले ३ वटा जीप, २ टिप्पर, २ डोजर पनि बगाएको छ । काठमाडौं इन्जिनियरिङ कलेजबाट अध्ययन भ्रमणमा आएका विद्यार्थीहरुको बस पनि बगाए पछि विद्यार्थीहरु अलपत्र परेका स्थानीय प्रबन्धक थापाले बताए । 

निर्माणाधीन उद्योग पृथ्वीराजमार्गको मलेखु देखि १६ किलोमिटर भित्र पर्छ  । १७ अर्ब लगानीमा निर्माण भइरहेको हुआसिन–धादिङ सिमेन्ट कम्पनीबाट विश्वकै अत्याधुनिक सिमेन्ट उत्पादन गरिने दाबी गरिएको थियो । नेपालमा प्रत्यक्ष वैदेशिक लगानी गर्ने सबैभन्दा ठूलो कम्पनी भएको पनि प्रबन्धक थापाले दाबी गरेका थिए  ।

उद्योगमा सिमेन्ट उद्योगमा चिनियाँ कम्पनीको ८० प्रतिशत र नेपाली कम्पनीको २० प्रतिशत शेयर रहेको छ । अहिले नेपाली लगानीकर्ताको प्रतिनिधित्व बैद्य ग्रुपको तर्फबाट सुरज बैद्यले र चिनियाँ लगानीकर्ताहरुको प्रतिनिधित्व हुवासिन सेन्ट्रल एसिया इन्भेष्टमेण्ट (हुवान) कम्पनी लिमिटेडले गरिरहेको छ ।

प्रतिक्रिया
पठाउनुहोस्

बाढीपहिराे पीडितकाे उद्धार र राहतमा सहभागी हुन देउवाकाे आग्रह

रासस

काठमाडौँ — कांग्रेस सभापति एवं पूर्वप्रधानमन्त्री शेरबहादुर देउवाले मुलुकभर बाढी र पहिरोका कारण भएको जनधनको क्षतिप्रति दुःख व्यक्त गर्दै पार्टीका सबै सदस्य र शुभचिन्तकहरुलाई उद्धार र राहतमा सहभागी हुन आग्रह गरेका छन् ।

उनले साेमबार एक विज्ञप्तिमार्फत पार्टीका सबै सदस्यलाई उद्धार र राहतमा सहभागी हुन आग्रह गर्दै सरकारलाई प्रभावित क्षेत्रमा प्रभावकारी ढङ्गले कार्य गर्न आग्रह गरेका छन् । साथै उनले प्रभावित क्षेत्रमा उद्धार र राहतको कार्य सरकारले कति व्यवस्थित ढङ्गले गरिरहेको छ, त्यसको अनुगमनसमेत प्रमुख प्रतिपक्षी दलका नाताले कांग्रेसले गर्नेसमेत जानकारी पनि गराएका छन् ।
केही दिनयता मुलुकको विभिन्न भागमा अविरल वर्षा र पहिरोका कारण भएको जनधनको क्षतिप्रति यसअघि कांग्रेसको जारी केन्द्रीय कार्यसमितिको बैठकले दुःख व्यक्त गरेकोछ ।
‘प्राकृतिक विपत्तिको यो घडी जारी केन्द्रीय कार्यसमितिको बैठक स्थगन गरेर सम्पूर्णरूपले उद्धार र राहतमा समर्पित हुने निर्णय हामीले गरेका छौँ । विपत्तिको समय आन्तरिक राजनैतिक विषय हुन् या राष्ट्रिय राजनीतिका अन्य मुद्दा, सबैखाले राजनैतिक आग्रह–पूर्वाग्रहभन्दा माथि उठेर पीडामा परेका दिदीबहिनी–दाजुभाइको सेवामा समर्पित हुनु हामी सबैको परम कर्तव्य हो’, विज्ञप्तिमा उल्लेख छ ।
सभापति देउवाले वर्षा र पहिरोका कारण अमूल्य जीवन गुमाउने छ दर्जनभन्दा बढी नागरिकको परिवारजनप्रति गहिरो समवेदना व्यक्त गर्दै सबै मृतकको आत्माको चिरशान्तिको कामना गरेका छन् ।

प्रकाशित : असार ३०, २०७६ ११:५६
पूरा पढ्नुहोस्
प्रतिक्रिया
पठाउनुहोस्