मेसिनबाटै रोपाइँ [तस्बिरहरु]

रमेशकुमार पौडेल

चितवन — असार १५ का दिन आइतबार राष्ट्रिय धान दिवस मनाउने कार्यक्रममा पश्चिम चितवनको दिब्यनगरमा बिहानैदेखि स्थानीयको जमघट थियो । धान रोप्ने भनेपछि हली, खेतला बाउसे जहाँ पनि जुट्छन् । पछिल्लो समय खेत जोत्न हलो र गोरुभन्दा ट्रयाक्टर लगाउने चलन बढ्दो छ । तर रोप्ने तरिका प्राय पुरानै छ । बीउ गोड्यो, मुठा पार्‍यो अनि हिल्याएको खेतमा लगेर रोपाहाराहरु लहरै भएर रोप्यो ।

धान दिवस मनाउन दिब्यनगरमा भेला भएकाहरुले अल्लि फरक दृश्य देखे । त्यहाँ पनि हलो र ट्रयाक्टर त थियो नै तर रोप्ने तरिका फरक थियो । यो पटक मेशिनबाट सुरु भएको रोपाइँ हेर्न पाउँदा स्थानीयले अनौठो माने । तीन हप्ताअघि रोपेको बीउ मेशिनमा राखेर रोपाइँ भएको थियो । बीउ पनि परम्परागत ब्याडमा नभएर ट्रेमा राखिएको थियो । ट्रेको बीउ मेशिनमा राखेर रोपाइँ गरेको दृश्य प्रायलाई नौलो थियो ।

यसरी रोपाइँ सुरु भएको नयाँ घटना नै भने हैन । चितवनमै पनि ठाउँ ठाउँमा पाँच छ वर्षअघि यसरी रोप्ने गरेको दृश्यहरु फाट्टफुट्ट देखिन्थे । तर दिब्यनगरका दयानिधी र नरेन्द्र दवाडी दाजु भाइले धान रोपाइँमा आधुनिक औजार उपकरणको प्रयोग गर्ने निश्चय गरेर यो प्रविधि अंगालेका हुन् । धान काट्न पनि मेशिन नै प्रयोग गर्ने दवाडी दाजुभाइको भनाइ छ ।

सरकारी निकाय कृषि ज्ञान केन्द्र चितवन कार्यालयका प्रमुख सुधिर श्रेष्ठ धान खेतीमा औजार उपकरणको उपयुक्त रुपमा प्रयोग गरे उत्पादन दोब्बर हुने सम्भावना हुन्छ । यसले लागतमा पनि कमी ल्याउँछ । त्यसैले कार्यालयले यस्ता औजारको उपयोग बढाउन अर्थात यान्त्रिकीकरणलाई कार्यालयले जोड दिएको उनले बताए ।


प्रकाशित : असार १५, २०७६ १५:४८
प्रतिक्रिया
पठाउनुहोस्

राष्ट्रपति ट्रम्पले टेके उत्तर कोरियामा पाइला

रोयटर्स

सियोल — डोनाल्ड ट्रम्प उत्तर कोरियाली भूमिमा पाइला राख्ने पहिलो अमेरिकी राष्ट्रपति बनेका छन् । आइतबार राष्ट्रपति ट्रम्पले दुई कोरियाको सीमाना छुट्टाउने सैनिक रहित क्षेत्रमा कोरियाली नेता किम जोङ उनसँग भेटवार्ता गरेका हुन् । गत फेब्रुअरीमा यी दुई नेताबीच कोरियाको आणविक कार्यक्रमको विषयलाई लिएर शिखर सम्मेलन भएको थियो ।

राष्ट्रपति ट्रम्प र नेता किमले दुई कोरियालाई छुट्याउने क्षेत्रमा उभिएर हात मिलाएका थिए । किमसँग भेटवार्ता गरे लगत्तै ट्रम्पले सैनिकरहित क्षेत्रबाट उत्तर कोरियामा पाइला टेकेका थिए ।

'यो विश्वको लागि ठूलो दिन हो र मेरा लागि पनि यहाँ आउनु गर्वको कुरा हो । ' राष्ट्रपति ट्रम्पले भने, 'धेरै ठूला कार्यहरु भइरहेका छन् । ' किमसँग भेट्नुअघि राष्ट्रपति ट्रम्प र दक्षिणी कोरियाली राष्ट्रपति मुनले अमेरिकी र दक्षिणी कोरियाली अधिकारीहरुसँग केहीबेर छलफल गरेका थिए ।

यसअघि ट्रम्पले ट्विट गर्दै तेस्रो शिखर सम्मेलनका लागि आमन्त्रण गर्दै किमसँग भेट्न ज्यादै उत्सुक रहेको बताएका थिए । 'हेरौँ अब के हुन्छ ' सोलमा व्यापारीहरुसँग कुरा गर्दै ट्रम्पले भने, ' एउटा ह्यान्डसेक भनेको धेरै हो । '

यी दुई नेताबीच सन् २०१८मा पहिलोपटक भेटवार्ता भएको थियो । पहिलो वार्ता फलदायी रहेको बताइएपनि दोस्रो शिखर सम्मेलन बिना निष्कर्ष टुंगिएको थियो ।

अन्तर्राष्ट्रिय सञ्चारमाध्यमहरुका अनुसार उनीहरु दुईबीच भएको पछिल्लो वार्ता बिना कुनै निष्कर्ष टुंगिएसँगै सम्बन्ध केही चिसिएको थियो । सम्बन्ध चिसिएपनि दुई नेताबीच चिठ्ठी आदनप्रदान भने भइरहेको थियो ।

ट्रम्पसँग भेट्नुअघि किम निर्धारित समयमा नै उक्त स्थानमा आइपुग्नेमा अन्यौल रहेको सञ्चारमाध्यमहरुले जनाएका छन् ।

प्रकाशित : असार १५, २०७६ १४:१०
पूरा पढ्नुहोस्
प्रतिक्रिया
पठाउनुहोस्
×