कान्तिपुर वेबसाईट
AdvertisementAdvertisement
२७.१२°C काठमाडौं
काठमाडौंमा वायुको गुणस्तर: १६६

चिनियाँ नाका खोल्न धमाधम काम [फोटोफिचर]

अनिश तिवारी

तातोपानी (सिन्धुपाल्चोक) — नेपाल-चीन जोड्ने मितेरी पुल निर्माण सुरु भएको छ । चिनियाँ सरकारी कम्पनी ‘तान् सुन रोड एण्ड ब्रीज कम्पनी’ले काम थालेको हो । ठूला दुई अत्याधुनिक उपकरण, ५ वटा एक्जाभेटर, स्यु क्यान प्रविधियुक्त रड, जस्ता सामाग्री प्रयोग गरेर मितेरी पुलको जग निर्माण भइरहेको छ ।

‘आउँदो चार महिनासम्म सक्नेछौं, मितेरी पुलको काम सकिसकेपछि अन्य भौतिक संरचनाको काम थालिनेछ ,’ तान सुन एण्ड ब्रीज कम्पनीका ठेकेदार पुबीक्वीजीको भनाइ उद्धृत गर्दै कार्यरत एक चिनियाँ इन्जिनियरले भने । उनले चिनियाँ संस्कृति पात्रोअनुसार आउँदो ‘मे’ महिना कर्मचारी दिवस भएकाले त्यसदिन नाका खोल्ने केन्द्रीय सरकारको योजना रहेको जनाए । सुख्खा बन्दरगाहको काम अन्तिम चरणमा पुगिसकेको छ ।

पुल निर्माणको अलावा चाइना रेलवे कन्ट्रक्सन ग्रुप (सिआरसीसी)ले सडक र सुख्खा बन्दरगाहको संरचना बनाउने कार्यलाई तीव्रता दिएको छ । पुल, सडक र बन्दरगाह निर्माण हुन थालेपछि नाका खुल्ने आसले सीमावासी खुसी छन् । ‘अब नाका खुल्छ रे त, यहाँ काम गर्न आउने चिनियाँ पनि त्यसै भन्छन्,’ राजधानीबाट हालै फर्केकी भोटेकोसी गाउँपालिका कोदारीकी साङडोमा शेर्पाले भनिन् । होटेल व्यवसाय गरेर परिवार धानिरहेकी शेर्पाले भूकम्प, भोटेकोसी बाढी र बर्खे पहिरोले लखेटेपछि राजधानी भागेको सुनाइन् । काम थालनी भए पनि नाका खुल्ने, नखुल्ने अन्योलता अझै छ ।

प्रकाशित : माघ १३, २०७५ १६:३५
प्रतिक्रिया
पठाउनुहोस्