सिरहामा निषेधाज्ञा तोड्दै प्रदर्शन- समाचार - कान्तिपुर समाचार

सिरहामा निषेधाज्ञा तोड्दै प्रदर्शन

भरत जर्घामगर

सिरहा — जिल्ला प्रशासन कार्यालय सिरहाले पूर्व-पश्चिम राजमार्ग र सिरहा-चोहर्वा सडकखण्डमा दुई दिनका लागि निषेधाज्ञा जारी गरेपनि जनमत पार्टीका कार्यकर्ताहरूले सिरहाको मिर्चैयास्थित कटारी चोकमा मंगलबार निषेधाज्ञा तोड्दै जुलुस प्रदर्शन गरेका छन् । 

लाठी बोकेर प्रदर्शन उत्रिएका उनीहरूलाई प्रहरीले लाठी चार्ज गरेको थियो । स्थिति नियन्त्रणमा लिन एक सेल अश्रुग्यास प्रहार गरी भीड तितरबितर पारिएको थियो । केहीबेर मिर्चैया क्षेत्र तनाव बनेपनि स्थिति नियन्त्रणमा आइसकेको प्रहरीले जनाएको छ । सीके राउत नेतृत्वको जनमत पार्टीले मंगलबार र बुधबार दुई दिन सिरहा बन्दको घोषणा गरेपछि सिरहा प्रशासनले ती क्षेत्रमा निषेधाज्ञा जारी गरेको थियो ।

सिरहाका प्रमुख जिल्ला अधिकारी लालबाबु कवारीले सूचना जारी गरी निषेधाज्ञाबारे जानकारी दिएका छन् । पुस १३ र १४ गते विहान ५ बजेदेखि बेलुका ७ बजेसम्म निषेधाज्ञा जारी गरेको सूचनामा उल्लेख छ ।

पूर्वमा बलान खोलादेखि पश्चिममा कमला नदीसम्मको राष्ट्रिय लोकमार्ग र चोहर्वादेखि सिरहा सडक खण्डको पि.के.राज इन्टरप्राईजेज (पेट्रोल पम्पसम्म) ५०० मिटर आसपासका क्षेत्रसम्म निषेधाज्ञाको क्षेत्र तोकिएको छ ।

उक्त अवधिभर राष्ट्रिय लोकमार्ग र सिरहा चोहर्वा सडकखण्डमा यातायात सुचारु रहनेछ भने बाहिर हिँडडुल गर्न, भेला हुन तथा राजनीतिक सभा र गतिविधि गर्न नपाउने सूचनामा उल्लेख छ । सूचनाको उल्लंघन गरेमा कारबाही गर्ने चेतावनी समेत दिइएको छ ।

जनमत पार्टीले सिरहा बन्दको कार्यक्रम लम्ब्याएपछि प्रशासन निषेधाज्ञा जारी गर्न बाध्य भएको हो । जनमत पार्टीले माग पूरा गर्न प्रशासनले चासो नदेखाएको भन्दै १३ र १४ गते जिल्लाभर चक्काजाम गर्ने निर्णय गरेको थियो ।

औरही गाउँपालिकाले किसानमाथि दर्ता गरेको मुद्दा फिर्ता लिनुपर्ने, पक्राउ परेका किसानहरूलाई रिहा गर्नुपर्ने, औरहीका अध्यक्ष सिद्धार्थ यादवले गरेको भ्रष्टाचारको छानविन गर्नुपर्ने, किसानलाई समयमा मलखाद उपलब्ध गराउनुपर्ने लगायतको ७ बुँदे माग राखेर जनमत पार्टीले सिरहा बन्दको कार्यक्रम गर्दै आएको छ ।


आमहड्तालको उल्लंघन गरेको भन्दै पूर्व-पश्चिम राजमार्ग अन्तर्गत सिरहाको गोलबजार र मिर्चैयामा जनमत पार्टीका कार्यकर्ताहरूले आइतबार १६ वटा सवारी साधन तोडफोड र एक ट्रकमा आगजनी गरेका थिए । सवारी साधन तोडफोड र आगजनीमा संलग्न जनमत पार्टीका १८ जनालाई प्रहरीले पक्राउ गरेको छ ।

आइतबार मिर्चैया र गोलबजारमा बन्दकर्ता जनमत पार्टीका कार्यकर्ता र प्रहरीबीच झडप भएको थियो । स्थिति नियन्त्रणमा लिन प्रहरीले मिर्चैयामा १३ सेल आश्रुग्यास प्रहार गरेको थियो ।

यसैबीच सिरहाका ६ राजनीतिक दलले संयुक्त विज्ञप्ति जारी गरि पक्राउ गरेकाहरूलाई रिहाई, बन्द हड्ताल फिर्ता तथा प्रशासनद्वारा लगाइएको निषेधज्ञा फिर्ता लिई शान्तिपूर्ण रुपमा निकास खोजी जनजीवन सहज बनाउन माग गरेका छन् । कांग्रेस, एमाले, नेकपा एस, लोसपा, जसपा, माओवादी केन्द्रले मंगलबार संयुक्त विज्ञप्ति जारी गरि शान्तिपूर्ण रुपमा निकास खोजी जनजीवन सहज बनाउन माग गरेका हुन ।

यसरी भयो घटनाको सुरुवात

औरही गाउँपालिकाले किसानलाई नै वितरण गर्न गहुँ बीउ गोदाममा राखेको थियो । वितरण गर्न तयारी अवस्थामा राखिएको गहुँ बीउ स्थानीय युवाहरूको समुहको उस्काहटले किसानहरूले गोदामबाट पुस ६ गते लुटेर लगेका थिए । लुटेर लैजाँदा समेत प्रहरी भने मुकदर्शक बनेको थियो ।

गाउँपालिकाले किसानका लागि ६ सय ५० बोरा बीउ खरिद गरेको थियो । गाउँपालिकाले पुस ५ गते ४० किलोको दरले ३ सय २५ बोरा वितरण गरेको थियो ।

बाँकी रहेको ३ सय २५ बोरा बीउ वडा ५ स्थित प्राथमिक स्वास्थ्य केन्द्रमा राखिएको थियो । पुस ६ गते ११ बजेबाट वडा नम्बर ३ का किसानलाई वितरण गरिने गाउँपालिकाले जानकारी दिएको थियो । नेपाल प्रहरी त्यही पुगेका थिए । तर, बिउ वितरण हुन नपाउँदै लुटपाट मच्चिएको थियो ।

स्थानीय उच्छृंखल युवाहरूको उस्काहटमा किसानका लागि राखिएको गहुँको बिउ लुटिएको गाउँपालिका अध्यक्ष सिद्धार्थ यादवले जानकारी दिए । उनका अनुसार गहुँ बीउसँगै स्थास्थ्य केन्द्रमा राखिएको मास्क, अक्सिजन रेगुलेटर, अक्सीमिटरलगायत स्वास्थ्य उपकरण पनि लुटिएको छ । गाउँपालिका कार्यालयमा तोडफोड समेत गरेका थिए ।


गाउँपालिकाले किसानलाई ५ कठ्ठा खेतको लागि निःशुल्क गहुँको बीउ वितरण गर्न बजेट विनियोजन गरिएको थियो । पहिलो दिन २० किलोको दरले वितरण गरिएको अध्यक्ष यादवले सुनाए ।

बीउ किसानहरूले लुटेर लगेपछि गाउँपालिकाले औरही गाउँपालिका-३ का मिथिलेश यादव, तेज नारायण यादव, रामनाथ यादव र औरही गाउँपालिका-५ का सुप्रविण यादवमाथि सरकारी सम्पत्ति हिनामिना, लुटपाट सम्बन्धी अभद्र अवज्ञा मुद्धा जिल्ला प्रहरी कार्यालय सिरहामा दर्ता गराएको थियो ।

ती मध्ये प्रहरीले मिथिलेश यादवलाई पक्राउ गरेको थियो । प्रहरीमा चार जनामाथि राजनीतिक प्रतिशोध साँध्न मुद्दा दर्ता गराएर फसाउन खोजेको र एक किसानलाई पक्राउ समेत गरेको विरोधमा जनमत पार्टी आइतबारदेखि सिरहा जिल्ला बन्दको घोषणा गरेको थियो । यसअघि जनमत पार्टीका कार्यकर्ताहरूले औरही गाउँपालिका कार्यालय घेराउ गर्दै विरोध कार्यक्रम गर्दै आएका थिए ।

प्रकाशित : पुस १३, २०७८ १६:५१
प्रतिक्रिया
पठाउनुहोस्

क्रिकेट खेलाडी र क्यानबीचको विवाद सामान्य : मुख्य प्रशिक्षक दासानायके

कान्तिपुर संवाददाता

काठमाडौँ — नेपाल क्रिकेट संघ (क्यान) ले नियुक्त गरेका नेपाली क्रिकेटका मुख्य प्रशिक्षक पुबुदु दासानायके नेपाल आइपुगेका छन् । यसअघि पनि नेपाली टोलीलाई प्रशिक्षण गराएका मुख्य प्रशिक्षक पुबुदु मंगलबार नेपाल आइपुगेका हुन् । विमानस्थलमा पुबुदुलाई क्यानका क्रिकेट म्यानेजर विनोद दासले स्वागत गरे  ।

क्यानको मंसिर २५ गतेको बोर्ड बैठकले मुख्य प्रशिक्षकको रुपमा पुबुदुलाई अनुमोदन गरेपछि पुबुदुले पुन: नेपाल टोली सम्हाल्ने जिम्मेवारी पाएका हुन् । मंगलबार विमानस्थल ओर्लिपछि सञ्चारकर्मीसँग बोल्दै प्रशिक्षक पुबुदुले पुन: नेपाली टोलीको जिम्मेवारी पाएकोमा खुसी व्यक्त गरे । साथै नेपालको चुनौती सामना गर्न आफू तयार भएको पनि बताए । पहिले नेपाली टोली सम्हाल्दा र अहिले टोली सम्हाल्दा फरक भएको भन्दै प्रशिक्षक दासानायकेले नेपाली क्रिकेट नयाँ उचाइमा पुर्‍याउने जिम्मेवार थपिएको बताए । प्रशिक्षक पुबुदुले हाल नेपाली टोलीमा खेलाडी र क्यानबीचको समस्या संसारका सबैजसो देशमा हुने गरेको र नेपालको समस्या समान्य भएको भन्दै बन्द कोठाभित्र रहेर छलफल गरेको खण्डमा समाधान हुने विश्वास व्यक्त गरे । प्रशिक्षक दासानायकेले क्रिकेट अगाडि बढाउनका लागि खेलाडी र क्यानले सहयोग गर्ने विश्वास व्यक्त गरे । प्रशिक्षक दासानायकेले यसअघि सन २०११ देखि २०१५ सम्म नेपाली टोली सम्हालिसकेका छन् । उनकै प्रशिक्षणमा नेपालले पहिलो पटक सन २०१४ मा आईसीसी ट्वान्टी–२० विश्वकप खेलेको थियो । सोही हिसाबाले दासानायकेलाई नेपालको एक सफल क्रिकेट प्रशिक्षको रुपमा लिइन्छ । पूर्व मुख्यप्रशिक्षक डेव ह्वाटमोरले ओमान भ्रमणको क्रममा उतैबाट राजीनामा दिएपछि नेपाली टिम मुख्य प्रशिक्षकविहीन रहेको थियो । त्यसपछि क्यानले खुल्ला प्रतिस्पर्धाबाट पुबुदुलाई प्रशिक्षकको रुपमा नियुक्त गरेको हो ।

प्रकाशित : पुस १३, २०७८ १६:४३
पूरा पढ्नुहोस्
प्रतिक्रिया
पठाउनुहोस्
×