कार्यकक्षबाटै दैनिक भेटघाट गर्छु : उपसभापति गुरुङ- समाचार - कान्तिपुर समाचार

कार्यकक्षबाटै दैनिक भेटघाट गर्छु : उपसभापति गुरुङ

कान्तिपुर संवाददाता

काठमाडौँ — कांग्रेस उपसभापति धनराज गुरुङले आफ्नो कार्यकक्षबाटै नियमित कार्यकर्ता भेटघाट गर्ने बताएका छन् । सानेपास्थित कार्यालयमा सभापतिसहित पदाधिकारीका लागि छुट्टा–छुट्टै कार्यकक्ष भएपनि नेताहरूले त्यहाँ बसेर कार्यसम्पादन गर्ने गरेका छैनन्, कार्यालयको सट्टा आफ्नो घरबाटै पार्टीका काम र कार्यकर्ता भेटघाट गर्ने चलन नै बनेको छ । तर, उपसभापति गुरुङले त्यसलाई तोडेर दैनिक कार्यालयमै बसेर काम गर्ने बताएका हुन् । 

उनले आफू दैनिक विहान ११ बजेदेखि ३ बजेसम्म केन्द्रीय कार्यालयमै बसेर पार्टीको काम र भेटघाट गर्ने बताए । १४ औँ महाधिवेशनबाट उपसभापतिमा निर्वाचित गुरुङले शनिबारमात्रै पदभार ग्रहण गरेका हुन् ।

‘काठमाडौंमै नरहेको अवस्थामा एउटा कुरा हो, नभए म कार्यालयमै बसेर पार्टीका काम गर्ने र नेता कार्यकर्ता साथीहरूका गुनासो सुन्नेछु,’ गुरुङले भने, ‘मैले दैनिक चार घण्टा कार्यालयमा बसेर काम गर्ने योजना बनाएको छु ।’

कांग्रेसमा केन्द्रीय समिति बैठक बाहेक नेताहरू केन्द्रीय कार्यालय नै पुग्दैनन् । प्रधानमन्त्री एवम् सभापति शेरबहादुर देउवाले पाँचौपटक प्रधानमन्त्री भएपछि पार्टीका बैठक प्रधानमन्त्रीको सरकारी निवासमा नराख्ने प्रतिवद्धता जनाएका छन् । तर, पार्टीका बैठक कार्यालयमै गर्नुको सट्टा नेताका निवासमा गर्ने अभ्यास कायमै छ ।


प्रकाशित : पुस ११, २०७८ १२:३७
प्रतिक्रिया
पठाउनुहोस्

जनमत पार्टीका कार्यकर्ता र प्रहरीबीच सिरहामा झडप

भरत जर्घामगर

सिरहा — सिरहाको मिर्चैया र गोलबजारमा जनमत पार्टीका कार्यकर्ता र प्रहरीबीच झडप भएको छ । कार्यकर्ता पक्राउको विरोधमा गरिएको आमहड्ताल उल्लंघन गरेको भन्दै जनमत पार्टीका कार्यकर्ताहरुले सवारी साधन तोडफोड गर्न थालेपछि प्रहरीसँग झडप भएको हो ।

प्रहरीले राजमार्ग खुलाउन खोजेपछि बन्दकर्ता झडप भएको थियो । बन्दकर्ताहरुले लाठी बोकेर जुलुस प्रदर्शन गरेका छन् । स्थिति नियन्त्रणमा लिन प्रहरीले मिर्चैयामा आठ सेल आश्रुग्यास प्रहार गरेको थियो ।

बन्दकर्ताहरूले पूर्व–पश्चिम राजमार्ग अन्तर्गत सिरहाको गोलबजार र मिर्चैयामा उनीहरुले आइतबार पाँच वटा सवारी साधन तोडफोड गरेको प्रहरीले जनाएको छ ।

औरही गाउँपालिकाले दिएको उजुरीको आधारमा प्रहरीले किसानलाई पक्राउ गरेको भन्दै जनमत पार्टीले आइतबार सिरहा जिल्लामा आमहड्ताल गरेको छ ।


गाउँपालिकाले किसानलाई नै वितरण गर्न गहुँ बीउ गोदाममा राखेको थियो । तर, गाउँपालिकाले समयमा बीउ वितरण नगरेपछि किसानहरुले गोदामबाटै पुस ६ गते बीउ लुटेर लगेका थिए ।

गोदामबाटै बीउ लुटिएपछि गाउँपालिकाले औरही गाउँपालिका–३ का मिथिलेश यादव, तेज नारायण यादव, रामनाथ यादव र वडा नम्बर ५का सुप्रविण यादवमाथि सरकारी सम्पत्ति हिनामिना, लुटपाट सम्बन्धी अभद्र अवज्ञा मुद्दा जिल्ला प्रहरी कार्यालय सिरहामा दर्ता गराएको थियो । तीमध्ये प्रहरीले मिथिलेश यादवलाई पक्राउ गरेको थियो ।

प्रहरीमा चार जनामाथि राजनीतिक प्रतिशोध साँध्‍न मुद्दा दर्ता गराएर फसाउन खोजेको र एक किसानलाई पक्राउ गरेको भन्दै जनमत पार्टीले सिरहा जिल्ला बन्दको घोषणा गरेको थियो ।

प्रकाशित : पुस ११, २०७८ १२:३१
पूरा पढ्नुहोस्
प्रतिक्रिया
पठाउनुहोस्
×