लालपुर्जा माग्न बाँदरझुलादेखि काठमाडौं- समाचार - कान्तिपुर समाचार
कान्तिपुर वेबसाईट
AdvertisementAdvertisement

लालपुर्जा माग्न बाँदरझुलादेखि काठमाडौं

राम मन्दिरका लागि भन्दै राज्यले बजेट छुट्याइरहँदा आफूहरु भने भूमिहीन बस्नुपरेको, निकुञ्ज र वन्यजन्तुको हैरानी खेप्नुपरेको गुनासो
जनकराज सापकोटा

काठमाडौँ — चितवन माडीको बाँदरझुलाबाट ४० जनाको टोली अधिकार माग्न आइतबार बिहानै काठमाडौंको माइतीघर मण्डल आइपुगेको छ । चेपाङ, तामाङ र दलित समुदायका उनीहरूको गाउँ एमाले अध्यक्ष एवं पूर्वप्रधानमन्त्री केपी शर्मा ओलीले राम जन्मेको ठाउँ भन्दै मन्दिर स्थापना गरेको अयोध्यापुरीबाट झन्डै दुई घण्टाको दूरीमा पर्छ ।

राम मन्दिरको विकास र विस्तार भन्दै राज्य संयन्त्रले बजेट छुट्याइरहँदा आफूहरू भने दशकौंदेखि भूमिहीन बस्नुपरेको, निरन्तर निकुञ्ज प्रशासन र वन्यजन्तुको हैरानी खेप्नुपरेको उनीहरूको गुनासो छ । त्यही सुनाउन उनीहरू राजधानी आएका हुन् ।

बाँदरझुलाको टोलीले आइतबार माइतीघर मण्डलमा केहीबेर धर्ना दिएपछि र्‍याली लिएर बानेश्वरस्थित संसद् भवनका छेउमा पुगेर कोणसभा गर्‍यो । त्यसपछि फर्केर उनीहरू फेरि माइतीघर नै आइपुगे । साँझ पर्दै गर्दा उनीहरू कहाँ बास बस्ने भन्ने चिन्तामा थिए । काठमाडौं आएको टोलीलाई अगुवाइ गरिरहेका जगराम प्रजाले ६ सय २५ घरधुरी वर्षौंदेखि भूमिहीन भएको सुनाए । ‘राज्यले देउताका नाममा लाखौं खर्चन्छ । हामीले राष्ट्रिय निकुञ्ज र त्यहाँका सैनिकहरूबाट पाएको दुःख बुझ्दैन । त्यसैले आफ्नो समस्या सुनाउन काठमाडौं आएका हौं,’ उनले भने ।

चितवनको दुर्गम पहाडी क्षेत्रका साथै तनहुँ र लमजुङका परिवार गाँसबासको खोजीमा २०४७ कात्तिकदेखि बाँदरझुलामा बसाइँ सरेका हुन् । उनीहरूको आफ्नै नाममा जमिन छैन । राष्ट्रिय निकुञ्जसँग निरन्तर द्वन्द्व झेलिरहेका छन् । केही साताअघि मात्रै स्थानीय रत्नबहादुर स्याङ्तानलाई घर अगाडि दाउरा चिरिरहेका बेला सेनाले पक्राउ गरेर लग्यो । झन्डै दुई साता थुनामा बसेर उनी साढे आठ हजार रुपैयाँ धरौटीमा छुटे । उनीमाथि राष्ट्रिय निकुञ्जको स्रोत उपयोग गरेको आरोप थियो । केही समयअघि शिवराम प्रजा जंगली भालुको आक्रमणका परेर सख्त घाइते भए । उनी कैयन् दिन अस्पतालमा उपचार गरेर बल्लतल्ल निको भए ।

चितवन राष्ट्रिय निकुञ्जले भने बाँदरझुलालाई निकुञ्जको मुख्य अतिक्रमित क्षेत्रका रूपमा लिँदै आएको छ । जगरामका अनुसार राष्ट्रिय निकुञ्ज भएकै कारण उनीहरूको बस्तीसम्म मोटरबाटो पुग्न सकेको छैन । निकुञ्जका कर्मचारीले उनीहरूलाई ट्र्याक्टरबाट खनजोत गर्न प्रतिबन्ध लगाएको छ । केही महिनाअघि भूमि आयोगले जग्गा वितरण गर्ने भन्ने सुनेपछि उनीहरू सबैले फाराम भरेर वडामा बुझाएका थिए । तर उनीहरूको फाराम वडाबाट माडी नगरपालिकाभन्दा अगाडि बढेन । कांग्रेस नेतृत्वको सरकार आएपछि चितवनकै देवी ज्ञवाली अध्यक्ष रहेको भूमि आयोग खारेज गरिदियो । गत भदौमा सरकारले फेरि अर्को आयोग बनाएको छ । ‘हाम्रो समस्या जस्ताको तस्तै छ,’ जगरामले भने ।

उनीहरूले आफ्नो समस्या स्थानीय सरकारले सुने पनि त्यसउपर सम्बोधन गर्न नसक्ने भएपछि काठमाडौं आउनुपरेको सुनाए । माडी नगरपालिका–९ को कार्यपालिका सदस्यसमेत रहेका जगरामले काठमाडौंले आफूहरूलाई न्याय देला कि भन्ने आशा राखेको बताए । उनीहरूको बसोबास क्षेत्र रहेको बाँदरझुलालाई स्थानीय सरकारले हनुमानझुला भनेर नाम बदलेको छ । आन्दोलनकारीहरूले अयोध्यापुरीमा राम मन्दिर बनाएपछि त्यहाँ हनुमान मन्दिर बनाउने दाउ राखेका छन् । जगरामले भने, ‘भगवान्का कुरा सुन्ने तर जनताको दुःख नदेख्ने यो कस्तो तरिका हो ?’

आइतबार आएका आन्दोलनकारीले माइतीघर मण्डलमा न्यायका लागि आन्दोलनरत् नेपालगन्जका महिला कालो फोम ओछ्याएर भुइँमा बसिरहेको देखे । निर्मला कुर्मी र नन्कुन्नी धोबीको न्यायका निम्ति महिनौंदेखि आन्दोलनरत उनीहरूलाई देखेर जगरामले संशय व्यक्त गरे, ‘काठमाडौंमा सजिलै न्याय पाइँदैन क्या हो ?’

प्रकाशित : पुस ५, २०७८ ०७:३३
प्रतिक्रिया
पठाउनुहोस्

भलिबल टोलीलाई एनआईसीको पोसाक

कान्तिपुर संवाददाता

काठमाडौँ — बंगलादेश जाने नेपाली भलिबल टोलीलाई एनआईसी एसिया बैंकले आइतबार खेल पोसाक हस्तान्तरण गरेको थियो । बैंकका प्रमुख कार्यकारी अधिकृत रोशनकुमार न्यौपानेले महिला टिमकी कप्तान अरुणा शाही, पुरुष टिमका कप्तान इम रानामगर र महिला टिमका मुख्य प्रशिक्षक जगदीश भट्टलाई खेल पोसाक हस्तान्तरण गरे ।

न्यौपानेले नेपालको नेतृत्व गर्दै बंगलादेशमा एसियन सेन्ट्रल जोन खेल्न जाने पुरुष तथा महिलाका सदस्यलाई उच्च मनोबलका साथ उत्कृष्ट प्रदर्शनका लागि शुभकामना दिँदै नेपालको राष्ट्रिय खेलको विकास विस्तारका लागि सबै कर्पोरेट हाउसबाट योगदान दिन अनुरोध गरे ।

सो अवसरमा प्रशिक्षक भट्टले राष्ट्रिय खेल भलिबलको विकास र विस्तारमा बैंकले देखाएको चासोमा नेपाल भलिबल संघ र समग्र भलिबल खेलाडी आभार व्यक्त गदै आगामी दिनमा पनि एनआईसी एसिया बैंकको सहयोग र सद्भाव रहिरहने विश्वास व्यक्त गरे । बिदाइ तथा खेल पोसाक हस्तान्तरण कार्यक्रममा बैंकका सहायक प्रमुख कार्यकारी अधिकृत क्रिकेटर सन्तोषकुमार राठी, बैंकका सहायक महाप्रबन्धक एवं नेपाल भलिबल संघका उपाध्यक्ष रञ्जन खड्कालगायत उपस्थित थिए ।

बैंकले महिला तथा पुरुष टिमका खेलाडी, प्रशिक्षक र अफिसियललाई जुत्ता, स्पोर्टस ब्याग, निक्याप र मोजा उपलब्ध गराएको थियो ।

प्रकाशित : पुस ५, २०७८ ०७:३२
पूरा पढ्नुहोस्
प्रतिक्रिया
पठाउनुहोस्
×