बारले ओलीलाई भन्यो - प्रधानन्यायाधीश र न्यायाधीशहरूबारे संसदीय समितिमा छलफल गरियोस्
काठमाडौँ — वरिष्ठ अधिवक्ता शम्भु थापाले एमाले अध्यक्ष केपी शर्मा ओलीलाई प्रधानन्यायाधीश चोलेन्द्र शमशेर जबरालाई कुनै हालतमा नमान्ने बताएका छन् । मंगलबार बालकोटस्थित ओली निवास पुगेको बारको टोलीको तर्फबाट धारणा राखेका थापाले उक्त कुरा राखेका हुन् ।
'अदालतमा अति भएको छ । प्रधानन्यायाधीशलाई देउता, इश्वर मान भनेर सबै दलले भने पनि हामी मान्ने अवस्थामा छैनौं,' थापाले भने । उनले प्रधानन्यायाधीश र न्यायाधीशबारे संसदीय समितिहरूमा छलफल चलाउनका लागि पनि प्रमुख प्रतिपक्षी दललाई आग्रह गरेका छन् । 'यो विषयमा प्रधानन्यायाधीश र न्यायाधीशहरूलाई ल्याएर संसदीय समितिमा छलफल चलाइयोस्,' उनले भने ।
राजनीतिक दलहरूले जनताबाट प्राप्त सार्वभौम अधिकारको प्रयोग गर्न पनि थापाले आग्रह गरेका छन् । संवैधानिक ब्याख्यामा राजनीतिक दल र कानुन व्यवसायीहरूबीच फरक मत रहन सक्ने तर भ्रष्टाचारको मामिलामा सबै एकमत रहेको उनले बताए ।
'सर्वोच्च अदालतका न्यायाधीशको मूल्यांकन गर्नुपर्यो भनेर हरिकृष्ण कार्कीको प्रतिवेदनमा छ,' उनले भने, 'भ्रष्टाचारको सन्दर्भमा हामीले यसपाली शिर्षस्थको किलकिले समातेका छौं । उहाँ जाँदाखेरि धेरै जना जानेवाला छन् । एकचोटी आफ्नो दलमा हुन्छ कि विभिन्न समिति हुन्छ छलफल चलाइदिनुस् ।'
सर्वोच्च अदालतका सबै न्यायाधीशलाई संसदीय समितिमा बोलाएर कुरा सुनिदिने वातावरण बनाउन पनि थापाले आग्रह गरेका छन् ।
प्रधानन्यायाधीश जबराले नभई न्यायाधीशहरूले पेसी गोला प्रणालीबाट चलाउने व्यवस्था गरेको पनि थापाको भनाइ थियो ।
सर्वोच्च अदालत बार एसोसिएसनका अध्यक्ष वरिष्ठ अधिवक्ता पूर्णमान शाक्यले जबराविरुद्ध महाभियोग लगाउनका लागि भूमिका खेल्न आग्रह गरेका छन् ।
प्रकाशित : मंसिर २१, २०७८ १४:४२
